Hao Dog Savve Smelem Samting

Olketa wea duim research sei taem olketa dog smelem olketa nara dog, olketa bae luksavve lo age blo olketa, sapos olketa man or mere dog, and sapos olketa hapi or nomoa. Pipol trainim olketa dog tu for faendem olketa bomb and drug. Plande taem pipol iusim eye blo olketa for savve wanem nao stap raonem olketa, bat olketa dog savve iusim nose blo olketa. Hem olsem olketa savve lukluk witim nose blo olketa.

Tingim diswan: Wanfala dog savve smelem staka samting winim iumi. Disfala organization U.S. National Institute of Standards and Technology sei wanfala dog “savve smelem nomata barava sismol samting. Sapos man putim wan quarter teaspoon sugar insaed lo bigfala Olympic swimming pool, hem olsem wanfala dog savve teistim datfala sugar.”

Why nao dog savve smelem staka samting winim iumi?

• Nose blo dog hem wet so hem moa isi for hem smelem olketa sismol samting.

• Dog garem tufala tube lo nose, wanfala hem for brith and narawan hem for smelem samting. Taem dog smelem samting, air hia hem go lo area lo nose wea helpem dog luksavve lo smel.

• Area lo nose blo dog for smelem samting hem 130 square centimeter or winim datwan, bat area lo nose blo olketa man hem 5 square centimeter nomoa.

• Dog savve garem 50 taems moa cell for smelem samting winim iumi.

Olketa samting hia helpem dog for luksavve lo evri difren kaen smel lo wanfala samting. Olsem example, samfala savveman sei iumi savve smelem supsup, bat wanfala dog savve smelem each kaikai wea insaed lo datfala supsup.

Olketa man wea duim research lo Pine Street Foundation, wanfala organization wea studyim cancer, sei brain and nose blo dog hem waka tugeta and hem “savve smelem samting wea no eni machine lo earth savve duim.” Olketa scientist gohed for wakem olketa machine wea olsem electronic “nose” for smelem olketa bomb, olketa samting wea gavman tambuim, and olketa sik (olsem cancer tu).

Wanem nao tingting blo iu? Waswe, hao wanfala dog savve smelem samting hem kamap seleva nomoa? Or waswe, samwan designim?