Cabbage White Butterfly Mekem Tufala Wing blo Hem Olsem Leta V

Olketa butterfly needim sun for hotem olketa masol wea olketa iusim for flae, then olketa savve flae. Bat taem staka cloud lo skae, olketa masol blo cabbage white butterfly savve hot kwiktaem winim olketa nara butterfly and hem redi for flae bifor olketa. Why nao olsem?

Tingim diswan: Plande butterfly savve spredim tufala wing or satem tugeta mekem sun savve hotem tufala wing bifor olketa savve flae. Bat datfala cabbage white butterfly savve mekem wing blo hem for sheip olsem leta V. Olketa man wea duim research sei diskaen butterfly mas openem tufala wing blo hem lo sheip olsem leta V mekem sun savve hotem kwiktaem. Taem hem stap lo position olsem, laet from sun savve hotem olketa masol lo body blo hem wea tufala wing join lo hem, mekem hem savve flae.

Olketa man wea duim research lo University blo Exeter, England, trae for wakem olketa solar panel wea moabeta followim wei wea disfala butterfly mekem tufala wing blo hem olsem leta V. Olketa faendemaot dat taem olketa mekem solar panel for sheip olsem V, hem savve mekem klosap 50 percent moa paoa.

Olketa luksavve tu taem sun hem kasem wing blo disfala butterfly, tufala wing hia savve shaen kam. Olketa copyim diswan and wei wea butterfly mekem tufala wing for olsem leta V for wakem olketa solar panel wea no hevi tumas and wea waka gud. Wanfala lo olketa savveman hia wea duim research, Richard ffrench-Constant, sei datfala cabbage white butterfly “hem nambawan insect wea savve tumas for kasem paoa from sun kwiktaem.”

Wanem nao tingting blo iu? Waswe, iu tingse hao datfala cabbage white butterfly mekem tufala wing blo hem for olsem leta V hem kamap seleva nomoa? Or waswe, samwan nao designim?