Wanem Nao Bae Helpem Mi for Exercise?

• Why nao mi shud exercise?

• Why nao mi no laek for exercise?

• Wanem nao mi savve duim mekem mi savve exercise and stap healthy?

• Mas balance

• Wanem olketa nara young wan talem

Why nao mi shud exercise?

Lo samfala kantri, olketa young wan no savve duim staka physical samting and datwan hem affectim health blo olketa. Dastawe Bible sei “training wea man duim for mekem body strong savve helpem hem.” (1 Timothy 4:8) Tingim olketa samting hia:

• Exercise savve mekem iu hapi and feel gud. Exercise savve mekem brain releasem olketa chemical wea mekem iu feel gud and hapi. Samfala pipol sei taem iumi duim exercise hem olsem iumi drinkim medicine wea mekem man hapi.

  “Sapos mi go ranran lo early morning then mi savve fit for duim staka samting and enjoyim datfala day. Taem mi ranran hem mekem mi feel hapi.”—Regina.

• Exercise savve mekem iu luk gud. Taem iu duim exercise wea no ova tumas, datwan savve mekem iu kamap strong and feel hapi abaotem iuseleva.

  “Last year mi nating savve duim wanfala chin-up, bat distaem mi hapi bikos mi savve duim tenfala! And mi barava hapi bikos mi lukaftarem body blo mi.”—Olivia.

• Exercise savve mekem iu stap laef for longfala taem. Exercise savve helpem heart and lungs blo iu. Exercise savve helpem iumi for no kasem sik lo heart wea olketa kolem coronary artery disease, wea mekem staka pipol for dae.

  “Taem iumi gohed duim exercise, iumi showimaot lo Creator blo iumi dat iumi tinghae lo body wea hem givim lo iumi.”—Jessica.

Important samting for tingim: Taem iumi duim exercise, datwan savve barava helpem health blo iumi lo future and hem savve mekem iumi hapi distaem tu. Tonya, wanfala young woman sei: “No enitaem bae iu sei ‘Mi wish mi no go hiking or go ranran.’ Samfala taem mi trae for mekem excuse for no exercise, bat taem mi exercise, evritaem mi feel hapi mi duim datwan.”

Why nao mi no laek for exercise?

Maet hem bikos lo olketa samting olsem:

• Mi no garem feeling for laek duim exercise. “Lo tingting blo mi, olketa young pipol tingse no eni samting bae spoelem olketa. Taem man young, hem hard for tingim taem lo future wea hem bae kasem olketa health problem. Iu tingse olketa olo pipol nomoa savve kasem problem saed lo health.”—Sophia.

• Mi no garem taem. “From mi busy tumas, mi mas markem taem for kaikai gud and sleep, bat for markem taem for duim exercise nao hem no isi.”—Clarissa.

• Mi no member lo gym. “Hem savve expensive for stap healthy bikos iu mas pei for go lo gym!”—Gina.

Samting for tingim:

Wanem nao main reason wea mekem iu no laek for exercise? Maet hem no isi for iu change, bat bae iu kasem gud samting taem iu duim datwan.

Wanem nao mi savve duim mekem mi savve exercise and stap healthy?

Samfala idea hem olsem:

• Iu nao garem responsibility for health blo iu.—Galatia 6:5.

• No mekem olketa excuse. (Eklesiastes 11:4) Olsem example, iu no need for joinim wanfala gym for start for duim exercise. Tingim wanfala exercise wea iu enjoyim and then duim datwan followim wanfala schedule.

• Sapos iu no savve wanem exercise for duim, askem olketa narawan wanem kaen exercise olketa duim.—Provebs 20:18.

• Mekem wanfala schedule. Markem olketa goal and raetem daon gogo blo iu for helpem iu kasem datfala goal.—Provebs 21:5.

• Faendem samwan for iutufala savve exercise tugeta. Datwan savve helpem iu for gohed followim schedule blo iu.—Eklesiastes 4:9, 10.

• Samfala taem samting savve stopem iu for exercise, bat no givap taem datwan hem happen.—Provebs 24:10.

Mas balance

Bible sei olketa man and woman mas “no ova tumas long eni samting wea [olketa] duim.” (1 Timothy 3:2, 11) So iu mas balance lo exercise wea iu duim. Olketa wea ova tumas lo exercise savve showimaot olketa praod. Julia, wanfala young woman sei: “Sapos wanfala boy garem olketa big masol bat hem no laek iusim brain blo hem, bae hem no luk naes lo mi.”

And careful lo advaes wea pipol talem for duim moa exercise winim wanem iu fit for duim. Datwan savve spoelem body blo iu and mekem iu no “luksavve long olketa samting wea barava important” lo laef.—Philippi 1:10.

And tu, wanem iu duim for encouragem iu for exercise savve mekem iu no laek for exercise. Vera, wanfala young woman sei: “Staka gele savve keepim olketa piksa wea showim pipol wea luk naes and olketa lukluk lo kaen piksa for helpem olketa for gohed exercise. Bat wanem hem happen nao, olketa comparem olketa seleva witim olketa pipol lo piksa and datwan mekem olketa feel wikdaon. Hem moabeta for exercise for health blo iu winim wei for exercise for mekem iu luk naes nomoa.”