Defendim Religious Freedom lo Olketa Smol Community

Staka handred million pipol stap lo Latin America. Staka million pipol hia garem own difren languis blo olketa and kastom blo olketa seleva. Staka lo olketa hia hem olketa spiritual brata and sista blo iumi, wea tinghae tumas lo culture blo olketa. For helpem olketa pipol lanem truth lo Bible, olketa transleitim and givimaot olketa pablikeson blo olketa Jehovah’s Witness lo winim 130 difren languis lo Latin America.a Nomata olsem, samfala lo olketa feisim olketa challenge from wei wea olketa chus for worshipim Jehovah and from olketa no join insaed olketa kastom wea big tumas lo community blo olketa wea no followim olketa Bible principle. Hao nao olketa donation wea iufala givim helpem olketa?

Helpem Olketa Go Bak lo Hom

Lo Mexico, olketa brata and sista blo iumi lo Huichol community lo olketa maunten blo Jalisco State, olketa no laek for join insaed olketa samting wea olketa religion savve duim wea konsens blo olketa no letem, and olketa duim diswan lo wei wea showimaot respect.b Bat diswan mekem samfala lo community for barava kros. Lo December 4, 2017, wanfala grup wea raf tumas attakim wanfala grup blo olketa Witness and samfala moa wea stap witim olketa. Olketa pipol hia forcem olketa Witness for lusim datfala community, distroem property blo olketa, and sei bae olketa killim eniwan wea trae for go bak.

Olketa Witness lo olketa taon klosap stretawe helpem olketa brata and sista blo iumi for kasem wanem olketa needim. Bat wat nao bae olketa duim mekem olketa go bak lo hom? Wanfala brata wea nem blo hem Agustín sei: “Mifala no garem inaf selen for baem wanfala lawyer, and mifala no savve wea nao for go for kasem olketa information abaot Law.”

From olketa brata and sista blo iumi no free for worship, Central America branch kwiktaem duim samting. First samting, olketa askem olketa police lo datfala ples for investigatem olketa crime hia. Then, olketa kasem approval from Coordinators’ Committee blo Governing Body blo olketa Jehovah’s Witness for waka witim Legal Department lo world headquarters and for openem wanfala case on behalf lo olketa brata and sista blo iumi lo Huichol. Gogo datfala case kasem Supreme Court of Justice of the Nation—wea hem highest kot lo Mexico.

Wanfala team blo olketa lawyer wea kam from olketa difren kantri redyim case wea explainim dat olsem olketa narawan mas respectim culture blo each community, olketa wea insaed lo community tu mas respectim and protectim freedom blo evriwan lo community blo olketa seleva. Evriwan garem raet blo olketa seleva nomata wea nao olketa stap.

Lo July 8, 2020, Supreme Court of Justice talem disison wea sapotim olketa Jehovah’s Witness. Olketa givim order for evriwan wea olketa raosem from community for mas kam bak. Agustín, wea iumi storyim finis, hem talemaot feeling blo hem and olketa narawan. Hem sei: “Mifala barava tinghae and hapi lo wat olketa brata duim for mifala. If olketa no helpem mifala, bae mifala no fit for duim eni samting.”

“Duim Big Samting Olsem for Wanfala Smol Grup ”

Lo datfala taem, olketa brata and sista blo iumi lo San Juan de Ilumán, wanfala vilij lo Ecuador wea hem hom blo staka pipol from Otavalo Valley, feisim semkaen challenge. Lo 2014, bihaen olketa kasem evri permit, olketa start for buildim wanfala Kingdom Hall. Bat, wanfala priest leadim grup wea winim 100 pipol for kam and stopem construction waka. Datfala community talem olketa Jehovah’s Witness for no hipap tugeta for worship.

Legal department lo Ecuador branch and lo world headquarters waka tugeta for defendim kongregeson from wei wea olketa no free for worship. Olketa brata blo iumi tekem disfala issue go lo kot. Diswan mekem community for stretawe stop for againstim olketa and letem kongregeson for meeting bak moa and for olketa completim Kingdom Hall blo olketa. Bat for protectim freedom blo olketa brata blo iumi lo future, olketa wea stand for iumi askem olketa lo kot for mekem wanfala important disison. Evriwan lo community mas respectim raet blo each wan for fitim international human rights law.

Lo July 16, 2020, Constitutional Court of Ecuador, wea hem highest court blo datfala ples, olketa herem datfala case. Olketa brata wea olketa lawyer lo Ecuador representim kongregeson. And tu, fofala lo olketa brata blo iumi wea waka olsem olketa international lawyer for longtaem tu joinim kot. Bikos lo olketa restriction blo COVID-19, olketa story from olketa difren kantri iusim videoconference. Diswan hem first taem wea wanfala kot letem legal team wea representim Jehovah’s Witness evriwea lo world for talemaot story blo olketa lo wei olsem.c Datfala team faendaot lo olketa international legal authority for confirmim hao each wan shud no letem pipol lo nara community for mekem olketa lusim human rights blo olketa seleva bikos olketa part lo datfala community.

Olketa brata blo iumi lo Otavalo Valley olketa barava laek for herem disison blo Constitutional Court. Lo datfala taem, olketa barava tinghae lo help wea olketa kasem. César, wea hem wanfala elder lo Ilumán Quichua Kongregeson, hem sei: “Only Jehovah, thru lo organization blo hem nomoa, savve duim big samting olsem for wanfala smol grup.”

Olketa lawyer wea waka lo olketa case hia, evriwan olketa Jehovah’s Witness, and olketa hapi tumas for sharem free nomoa savve blo olketa. Nomata olsem, for openem olketa case, redi for olketa case, and for storyim olketa case hia lo kot hem needim taem and selen. Olketa lawyer blo iumi and olketa nara brata spendem winim 380 hour for redyim olketa legal information and nara 240 hour for olketa transleitim olketa document for kot wea bae kamap lo Mexico. Samting olsem 40 fala lawyer from staka ples raonem world spendem staka handred hour lo case wea kamap lo Ecuador. Hao nao iumi savve peim olketa kost hia for defendim olketa brata blo iumi? Bikos lo staka contribution wea iufala givim lo wei for iusim olketa difren wei wea stap for givim contribution lo donate.jw.org. Thankiu for wei wea iufala kaen tumas.