Nius wea Iumi Savve Trustim and Strongim Faith blo Iumi

Olketa Jehovah’s Witness barava tingim olketa spiritual brata and sista blo olketa. (1 Peter 2:17) Plande lo iumi garem sem feeling olsem Tannis, wea hem wanfala sista blo iumi lo Kenya. Hem sei: “Mi laekem tumas for savve hao olketa brata and sista blo mi lo world gohed.” Hao nao Tannis and staka million nara Witness faendaot wat nao happen lo olketa nara brata and sista? Start lo 2013, iumi savve herem wat nao kasem olketa taem iumi luk go lo Nius sekson lo website, jw.org.

Nius sekson hia garem olketa trufala report abaotem Olketa Jehovah’s Witness. Hem garem olketa report abaotem olketa niu Bible release, disaster relief waka, olketa construction project, and olketa nara important samting wea happen. Hem garem olketa report abaotem olketa brata and sista blo iumi wea stap lo prison bikos lo faith blo olketa. Datfala Nius sekson garem tu olketa encouraging experience abaotem olketa preaching campaign and Memorial. Hu nao duim research lo olketa nius article hia, and hao nao olketa preparem?

Hao for Disaedem and Reportim Olketa Nius Story

Office of Public Information (OPI) hem lukaftarem datfala Nius sekson lo website. Disfala department hem stap lo world hedquarter and hem stap anda lo Coordinators’ Komiti blo Governing Body. Winim 100 brata and sista waka lo OPI for raetem report, duim research, tek photo, and transleitim olketa article, and plande lo olketa nao remote volunteer. Samfala brata and sista hia duim waka for contactim olketa lo gavman, olketa savveman and teacher, and olketa lo media. Winim 80 Pablik Information Desk (PID) lo olketa branch office raonem world helpem datfala department lo world hedquarter.

For preparem wanfala nius story, OPI waka witim PID lo olketa branch office. Taem olketa brata blo iumi mekem disison for raetem wanfala nius story, olketa duim research and kasem tru information abaotem datwan. For kasem information olsem, olketa interviewim pipol and story witim olketa expert. Bihaen olketa kasem tru information, olketa raetem article, chekim, proofreadim, addim olketa piksa, and then olketa sendem lo Coordinators’ Komiti for olketa appruvim.

Olketa Tinghae lo Nius Sekson

Hao nao tingting blo olketa brata and sista blo iumi abaotem datfala Nius sekson lo website? Cheryl, wanfala sista lo Philippines sei: “Mi barava laekem tumas for startim day blo mi lo wei for readim olketa nius report abaotem organization blo Jehovah and pipol blo hem.”

Plande wea readim Nius sekson lo jw.org website sei hem difren from wanem olketa readim from olketa nara nius media. Tatiana, wea stap lo Kazakhstan sei: “Mi tinghae lo nius wea mi readim lo jw.org bikos mi savve trustim and hem storyim tru samting.” Wanfala sista lo Mexico wea nem blo hem Alma sei: “Olketa nius report lo Nius sekson lo website barava encouragem iumi sapos iumi comparem datwan witim olketa nogud samting wea iumi herem lo nius.”

Information lo Nius sekson lo website hem tru bat hem savve strongim faith blo iumi tu. Bernard, wea stap lo Kenya sei: “Nius sekson lo website hem helpem mi for tingim olketa brata and sista blo iumi raonem world olsem part lo famili blo mi, nomata wea olketa stap. Mi savve iusim nem blo olketa and story abaotem olketa lo olketa prea blo mi.” Wanfala sista wea nem blo hem Bybron, wea stap lo Kenya tu, sei: “Mi evritaem hapi taem mi lukim olketa article abaotem olketa niu Bible release lo difren languis! Olketa article olsem remindim mi hao Jehovah hem no fevarem eniwan.”

Nomata olketa nius story abaotem olketa brata wea kasem persecution savve encouragem iumi. Jackline wea stap lo Kenya sei: “Taem mi tingim wei wea olketa no givap, datwan hem strongim faith blo mi. Mi evritaem trae for lanem wat nao helpem olketa for no givap. Mi lanem hao olketa ‘simpol’ samting olsem prea, Bible reading, and for singim olketa song savve barava strongim olketa brata blo iumi.”

Wanfala sista lo Costa Rica wea nem blo hem Beatriz hem tinghae lo olketa nius story abaotem olketa natural disaster. Hem sei: “Datfala Nius sekson lo website helpem mi for luksavve hao organization provaedem wanem olketa brata and sista needim kwiktaem and lo wei wea showimaot love. Datwan pruvim lo mi diswan hem organization blo Jehovah.”

Iumi hapi tumas for gohed kasem olketa niu report abaotem olketa brata and sista blo iumi raonem world! Iumi kasem olketa report olsem bikos lo donation wea iu givim for waka raonem world, wea plande lo iufala savve givim online lo donate.jw.org. Thankiu tumas for olketa kaenfala contribution blo iu.