Mifala Mekem Olketa Kingdom Hall Sef During COVID-19

“Unless hem no possible bikos lo olketa gavman restriction, Governing Body encouragem evri kongregeson for startim olketa in-person meeting lo week blo April 1.” Datfala announcement hem posted lo jw.org website lo start blo March 2022, and Olketa Jehovah’s Witness evriwea lo world hapi tumas. Nomata olsem, COVID-19 pandemic no finis yet.a Wat nao olketa change mifala mekem, peim goods and equipment for protectim from datfala virus olketa wea kam lo meeting? Afta tu years wea no eni in-person meeting, hao, hem bae redi for mifala iusim olketa Kingdom Hall?

Actually, olketa brata bin redyim finis for staka months for startim bak olketa meeting lo olketa Kingdom Hall.

Olketa Difren Need, Olketa Difren Solution

Afta wan month nomoa olketa in-person meeting suspended lo 2020, Worldwide Design/Construction Department (WDC) lo Warwick, New York, start ting raonem hao COVID-19 affectim hao mifala iusim olketa Kingdom Hall and wat mifala need for duim for mekem sef olketa ples for meeting.

Wat samfala kantri needim hem difren from wat olketa nara kantri needim. Matthew De Sanctis, wea waka lo WDC sei: “Wanfala problem lo samfala kantri nao hem hard for garem olketa facility for wasim hand. If olketa Kingdom Hall no garem wata, olketa need for peim, or karem kam from river or well. Lo olketa nara kantri, samfala gavman adjustim olketa requirement for iusim air condition, air ventilation, and olketa saen abaotem health and hygiene.”

Wat nao olketa brata duim for followim olketa change hia? Matthew sei olketa faendaot hao lo staka Kingdom Hall, “olketa solution wea simpol and no expensive barava waka gud.” Olsem example, lo Papua New Guinea, olketa setimap olketa basic handwashing station wea iusim olketa 20 liter (5.3 gallon) plastic baket wea garem tap. So organization fit for provaedem evriting hia for wanfala rural Kingdom Hall for only $40 (U.S.). Organization peim winim 6,000 hae quality handwashing station from wanfala company lo Asia for olketa Kingdom Hall lo Africa.

Olketa nara adjustment hem for installim or modifyim olketa fan and air ventilation unit for impruvim air circulation insaed Kingdom Hall. Staka kongregeson peim olketa boom pole for olketa roving microphone mekem audience no pasim microphone from wan hand go lo nara hand. Mifala sanitizim tu olketa touch point olsem olketa door handol and tap wea savve spredim olketa virus. Lo olketa toilet, samfala kongregeson installim olketa sensor tap wea savve automatic for on. Lo Chile, for mekem olketa change hia hem kost samting olsem $1,400 (U.S.) for each Kingdom Hall.

Nomata hem important for mekem olketa Kingdom Hall sef, organization mek sure tu for iusim gud olketa donated selen. Olsem example, lo samfala kantri olketa kasem olketa tax exemption from gavman for peim olketa handwashing station and boom pole. Olketa branch office waka tugeta for sevem selen taem olketa peim things lo bulk. Staka taem olketa branch and Global Purchasing Department mekem arrangement for peim olketa item directly from olketa manufacturer, so datwan reducim no price nomoa bat taem for duim delivery tu.

“Feel Sef wea Mi Needim”

Olketa arrangement for mekem olketa Kingdom Hall sef protectim and comfortim olketa wea start attendim olketa in-person meeting. Dulcine, wanfala sista lo Peru sei hem “fraet lelebet” taem hem herem mifala bae meeting moa lo Kingdom Hall. Hem sei: “No longtaem afta COVID-19 pandemic start, mi covid. So mi wari for go lo Kingdom Hall from mi savve hem possible for mi kasem moa datfala virus. Bat taem mi arrive lo Kingdom Hall, mi noticim hao olketa elder duim staka samting for mekem hem sef olsem for garem olketa hand-sanitizing station, microphone boom pole, and for disinfectim hall bifor and afta each meeting. Evriting hia mekem mi feel sef wea mi needim.”b

Sara, wanfala sista lo Zambia, feisim difren challenge. Hem sei: “Hasband blo mi dae from COVID-19 samfala months finis. Mi warim hao mi bae feel for attendim in-person meeting and for firstaem wea mitufala no go tugeta.” Bat wat nao happen? Hem sei: “Olketa in-person meeting pruvim dat Jehovah stap witim iumi during olketa last day. Winim enitaem bifor, mi kasem encouragement, love, and sapot wea mi needim from olketa elder and evri brata and sista.”

Olketa narawan wea mifala worship tugeta evriwea lo world appreciatim tumas privilege for meeting bak lo olketa Kingdom Hall blo olketa. Thankiu for olketa donation blo iu, and staka donation hia pipol mekem thru lo donate.jw.org. Olketa donation hia helpem mifala for mek sure olketa ples for tru worship comfortable and sef for meet tugeta.