Hope wea Tru Religion Offerim
HEM fasin bilong iumi for laek storyim samting wea affectim iumi and wea mekem iumi hapi. Diswan hem wan reason why Olketa Witness Bilong Jehovah hapi for sharim nambawan message bilong Bible withim nara pipol. Datfala message, wea storyim Kingdom bilong God, garem ansa for olketa kwestin abaotem olketa samting wea barava affectim pipol distaem, olsem future, sef living, health, and hapi.—Luke 4:43.
But firstaem, wanem nao Kingdom bilong God?
Barava Hapi Hope
Kingdom bilong God hem gavman bilong God wea Son bilong hem, datfala “Prince bilong Peace,” hem rulim. Abaotem hem Bible hem say: “Wanfala pikinini hem born long iumi, wanfala son hem kasem iumi; and way for rul olsem prince bae stap long shoulder bilong hem. And hem bae garem nem . . . Prince bilong Peace. Bigfala rul bilong hem olsem prince and peace bae no savvy finis.”—Isaiah 9:6, 7.
Narafala Bible profesi wea lukluk go farawe long future kam kasem taem bilong iumi withim olketa ruler bilong hem, talem finis: “Long taem bilong olketa king hia God bilong heven bae startim wanfala kingdom wea bae nating savvy finis. . . . Hem bae smasem and finisim evri kingdom hia, and hem nao bae stap go kasem taem olowe.”—Daniel 2:44.
Disfala Kingdom bilong God, wea Kraest rulim, datfala Prince bilong Peace, bae fulfillim prea wea Jesus teachim olketa follower bilong hem for talem, hem nao: “Father bilong mifala wea stap long heven . . . , letem kingdom bilong iu kam. Letem will bilong iu kamap long earth, olsem hem stap long heven.” (Matthew 6:9, 10) Taem kingdom bilong God hem kam, wanem nao bae hem meanim for earth and for iumi? Tingim olketa promis wea Jehovah God seleva talem, wea stap insaed Bible. Olketa piksa long olketa page hia showimaot samfala long olketa.
Wanfala Message From God
Olketa nambawan promis insaed Word bilong God should no stap haed, and diswan tekem iumi back long way for story abaotem religion. Jesus talem finis hao bifor end bilong disfala system, olketa follower bilong hem bae duim samting firstaem for preach abaotem Kingdom bilong God: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.”—Matthew 24:14; 28:19, 20; Acts 1:8.
Disfala message abaotem Kingdom bilong God nao Olketa Witness Bilong Jehovah talemaot evriwea long world. Olketa pablisim Wastaoa, partner bilong disfala magasin, long 131 langwis, and long kava bilong evri 22 million copy disfala toktok hem stap, “Wea Talemaot Kingdom Bilong Jehovah.”
Olsem wisefala man, iu laek for savvy gud long olketa samting wea iu disaedem for laef bilong iu. (Proverbs 18:13) Dastawe, mifala invaetem each wan long iufala for learnim moa samting abaotem nambawan Kingdom bilong God and wanem hem savvy meanim for iu. From disfala reason, no rejectim way for story abaotem Bible. No eni nara way for story givim moa savvy, moa interesting, and moa important winim diswan.—John 17:3.
[Box/Piksa long page 20, 21]
OLKETA PROMIS FOR PARADAES EARTH
Trufala peace bae kamap long earth. “Long taem bilong hem olketa raeteous wan bae kamap, and bigfala peace bae stap go kasem taem wea moon bae nomoa.”—Psalm 72:7, 8.
Nomata olketa wea dae finis bae laef back moa. “Wanfala resurrection bae kamap for olketa wea raeteous and wea no raeteous.”—Acts 24:15.
Pipol bae kasem perfect health for olowe. “[God] bae aotem evri wata from eye bilong olketa, and dae bae nomoa, sorry and fasin for krae and pain bae nomoa tu.”—Revelation 21:3, 4.
Pipol bae buildim own haos and stap insaed. “Olketa bae buildim haos and stap insaed; and olketa bae plantim vineyard and kaikaim fruit bilong hem.”—Isaiah 65:21.
Staka kaikai bae stap. “Planti kaikai bae stap long earth; antap long olketa maunten hem bae fulap.”—Psalm 72:16.