Why Nao Iu Should Storyim

“Iron seleva savvy sharpenem iron. So wanfala man savvy sharpenem face bilong narafala man.”—Proverbs 27:17, Bible.

NAEF no savvy kamap sharp taem iu hitim withim nara naef. Man mas easyeasy withim. Long sem way, stret and rong way stap for sharpenem mind taem tufala man story tugeta, barava nao taem story hem abaotem samting wea easy for hotem man olsem religion.

Firstaem, iumi mas respectim feeling bilong nara man and showimaot diswan long toktok and fasin bilong iumi. “Toktok bilong iufala mas evritaem kaenfala, garem salt,” Bible hem say. (Colossians 4:6) Kaenfala toktok hem no saond strong, nomata taem man wea talem hem believe strong hao hem tok tru and narawan hem rong.

Kaenfala way hem showaot tu long way wea iumi listen. Way for katem story, or for no barava listen from iumi readyim next point for raoa abaotem, hem no kaenfala way for listen. Wan wea tok bae easy for luksavvy iumi no interest long tingting bilong hem and maet endim story. And tu, iumi mas nating fosem or hotem man for changim tingting bilong hem, bikos ‘God nao mekem seed bilong truth grow’ insaed heart wea willing.—1 Corinthians 3:6.

Iumi garem gudfala example bilong aposol Paul, wea iusim way for “story gud” and way for “muvim tingting” bilong man long ministry bilong hem. (Acts 17:17; 28:23, 24) Paul story abaotem religion withim pipol long evri ples hem lukim olketa, olsem long maketples and long haos bilong olketa. (Acts 17:2, 3; 20:20) Olketa Witness Bilong Jehovah trae for followim datfala example thru long way for go long evri ples pipol stap and story gud withim olketa.

Stap Klia From Way for Garem Rongfala Tingting

Nation bilong Israel just kasem Promis Land taem rongfala tingting abaotem wanfala altar klosap kosim wanfala faet midolwan olketa seleva. Pipol wea stap long east saed bilong Jordan River buildim wanfala altar, but olketa nara tribe tingsay hem altar for giaman worship. So olketa readyim army for disciplinim olketa brata bilong olketa. But gudfala tingting nao kamap firstaem. Olketa wea ready for faet sendem wanfala grup for faendemaot wanem nao datfala altar hem for. Olketa feel gud tumas taem olketa faendaot hem wanfala memory samting nomoa—“wanfala witness”—for mekem evri tribe tingim wan mind bilong olketa front long Jehovah God. Way for story sevem olketa from wanfala faet—and staka laef!—Joshua 22:9-34.

Olsem tu distaem, way for garem rongfala tingting planti taem kosim hate and fasin for ting daonem narawan. Olsem example, samfala pipol tingim Olketa Witness Bilong Jehovah olsem pipol wea ova tumas long saed long religion bikos long olketa report abaotem way wea olketa nating willing for tekem blood transfusion. But olketa wea askim olketa Witness abaotem diswan planti taem barava sapraes for learnim hao olketa garem Bible reason for diswan and hao olketa narafala treatment stap wea sef and gud. (Leviticus 17:13, 14; Acts 15:28, 29) From problem bilong blood transfusion, wanfala man for raet hem say: “Thankiu long God for Olketa Witness Bilong Jehovah from olketa startim research long olketa samting wea savvy changim blood.”

Long sem way, samfala les for story withim olketa Witness bikos olketa herem Olketa Witness Bilong Jehovah no believe long Jesus Kraest. Barava no tru! Really, olketa Witness mekhae long work bilong Jesus insaed salvation bilong iumi, olketa explainim hao hem Son bilong God, wea God sendem long earth for peim olketa man from sin and dae. Bihaen pipol story withim olketa Witness abaotem olketa samting hia, olketa lusim rongfala tingting wea olketa bin garem.—Matthew 16:16; 20:28; John 3:16; 14:28; 1 John 4:15.

Truth—Pipol Laekem or No Laekem?

Planti pipol maet sapraes hao, long saed long religion, planti taem road wea staka pipol followim hem rongfala road. Jesus Kraest seleva teach olsem: “Go insaed long smallfala gate; bikos road wea lead go for dae hem big tumas and waed, and planti pipol nao go insaed long hem; but gate hem small and road hem taet wea lead go long laef, and fewfala nomoa faendem.”—Matthew 7:13, 14.

Long taem bilong Noah, eit pipol nomoa storyim spiritual truth—Noah, waef bilong hem, threefala son bilong hem, and olketa waef bilong olketa son bilong hem. Warning message and work bilong olketa for buildim ark mekem pipol for mekfan long olketa, and tokspoelem olketa tu. Nomata olsem Noah and famili bilong hem go ahed for preach and build. (Genesis 6:13, 14; 7:21-24; 2 Peter 2:5) Olsem tu, threefala nomoa obeyim direction bilong God and stap laef taem Sodom and Gomorrah hem destroy.—Genesis 19:12-29; Luke 17:28-30.

Waswe distaem? “Sapos Kraest laef moa olsem man distaem, pipol bae killim hem moa,” wanfala man hem say long wanfala Witness bilong Jehovah. Disfala man say pipol distaem bae no laekem olketa teaching and haefala mark bilong Jesus saed long fasin olsem pipol no laekem 2,000 year bifor. Waswe, iu agree?

Sapos iu agree, iu stret, from Jesus warnim olketa disaepol bilong hem: “Evri nation bae hate-im iufala from nem bilong mi”—wanfala toktok wea kamap tru. (Matthew 24:9) Abaotem Kristian Way, olketa Jew leader long Rome talem aposol Paul: “Long evri ples pipol tok againstim disfala sekson.” (Acts 28:22) But, way wea staka pipol no laekem Kristian Way no stopem olketa follower bilong Kraest for sharim belief bilong olketa withim nara pipol. Hem no stopem pipol withim honest heart tu for story withim olketa Kristian.—Acts 13:43-49.

Message bilong Jesus hem moa important distaem. Why nao olsem? Bikos living long world showimaot iumi stap insaed “olketa last day” bilong disfala system and olketa day hia bae end withim way for aotem badfala fasin from disfala earth. ­Jesus markem taem bilong iumi withim taem bilong Noah. (2 Timothy 3:1-5; Matthew 24:37-39) So distaem hem no taem for believim eni samting nomoa, bikos pipol wea savvy long God and wea ‘worshipim hem withim spirit and truth’ bae kasem laef olowe.—John 4:24; 2 Thessalonians 1:6-9.

Hao for Faendem Stretfala Way

Francis Bacon, wanfala savvyman, man for raet, jurist and bigman long gavman long mek-17 century, encouragim olketa wea lukaotem truth “for skelem and ting­hevi.” And wanfala U.S. president bifor, Thomas Jefferson, hem say: “Way for ting raonem and free for faendemaot samting hem only way for no mek mistek. . . . Olketa nao enemy bilong mistek.” So sapos iumi barava lukaotem truth, iumi bae “skelem and tinghevi” and aftarem way for “ting raonem and free for faendemaot samting.”

For showimaot why nao diswan hem important, British scientist Sir Hermann Bondi say: “From wanfala faith nomoa fit for tru, luk olsem hem easy tumas for olketa man believe strong withim honest fasin long samting wea no tru saed long religion. Disfala samting wea klia tumas should kosim samfala for humble, for tingim hao nomata faith bilong hem strong, maet hem rong.”

So, hao nao bae wanfala man fit for luksavvy sapos hem barava stap long ‘road wea hem taet wea lead go long laef ’? Jesus teachim hao iumi mas worshipim God ‘long truth.’ So ting raonem hao sapos tufala teaching barava different, wanfala nomoa mas tru. Olsem example, man garem soul wea laef bihaen man dae or hem no garem. God bae duim samting for living bilong man or nomoa. God hem wanfala Trinity or nomoa. Olketa wea lukaotem truth laekem trufala ansa for olketa important kwestin olsem. Olketa Witness Bilong Jehovah believe hao God hem givim iumi ansa insaed Word bilong hem, Bible.a

From “evri Scripture kam from God,” main way for testim olketa different teaching hem for markem olketa withim Bible. (2 Timothy 3:16) Taem iu duim olsem, iu ‘pruvim long iuseleva, gudfala and stretfala and perfect will bilong God.’ (Romans 12:2) Waswe, iu savvy ‘pruvim long iuseleva ’ hao belief bilong iu kam from Bible? For duim diswan hem important bikos God no wantem iu for followim giaman way olsem “olketa man long earth.”—Revelation 12:9.

Waswe, Iumi Needim Olketa Teacher?

Jesus no givim olketa disaepol bilong hem samfala scroll and say: “Ansa for evri kwestin bilong iufala insaed long datwan. Go long haos and faendemaot seleva.” But, long patient and kaenfala way hem teachim word bilong God long olketa. From diswan, olketa wea acceptim teaching bilong hem followim hem taem olketa teachim nara pipol tu. Tingim example bilong disaepol Philip. Hem story withim wanfala bigman bilong Ethiopia wea garem honest heart, wea savvy finis long olketa Scripture from hem kaban withim olketa Jew. But datfala man needim help. So God leadim Philip—wanfala wea stand for Kristian kongregeson—for helpem hem. Sapos disfala bigman no willing for story abaotem religion, bae hem no fit for savvy abaotem part bilong Jesus insaed purpose bilong God. Disfala man bilong Ethiopia showimaot nambawan example for evriwan wea lukaotem truth!—Acts 8:26-39.

Waswe, iu willing for story abaotem olketa belief bilong iu and askim olketa kwestin olsem disfala man bilong Ethiopia hem duim? Iu bae kasem planti samting from diswan. Olketa Witness Bilong Jehovah hapi for storyim ­Bible withim pipol wea barava want for savvy wanem hem talem. Olketa Witness no talem own tingting bilong olketa. But, olketa want for showim pipol wanem Bible seleva talem.

Datfala bigman bilong Ethiopia learnim samfala spesel samting abaotem Jesus Kraest, olsem hao nao God bae iusim hem for salvation bilong iumi. Distaem, olketa purpose bilong God klosap nao for fulfill evribit. Olketa samting wea mekem man fraet and wea nambawan, klosap nao for happen hia long earth. Nextfala article bae showimaot way wea diswan bae affectim evriwan long earth. But, hao nao diswan bae affectim iumi hem depend long tingting bilong iumi and samting wea iumi duim.

[Footnote]

[Piksa long page 19]

Wanfala bigman bilong Ethiopia hapi for story abaotem Bible