Iu Story Abaotem Religion?

“Please, iumi storyim different samting. Tufala samting nao mi nating savvy storyim—religion and politik!”

“Mi leavim religion for waef and olketa pikinini.”

“Mi no laek storyim religion distaem. Mi just kam back from church.”

IU HEREM diskaen toktok bifor? Samfala no laek for storyim religion bikos olketa ting hem samting midolwan olketa and God nomoa. Jesus seleva talem: “Taem iufala prea, go insaed long room bilong iufala and, bihaen iufala satem door, prea long Father bilong iufala wea stap long secret; then bae Father bilong iufala wea lukluk kam long secret bae blessim iufala.”—Matthew 6:6.

Long narasaed, Jesus and olketa disaepol bilong hem no say evri part bilong religion mas secret samting. Olketa evritaem willing for story abaotem olketa different spiritual subject, and diswan mekem teaching bilong olketa for kasem evriwea long world. (Acts 1:8; Colossians 1:23) But no evriwan laek story withim olketa, and samfala wea duim nating change.

Distaem tu, different pipol and kantri ting long way for storyim religion long different way. Olsem example, long planti Western kantri, pipol moa interest long olketa samting wea happen raonem olketa—education, work for selen, sports, computer, TV, and samfala moa. Long samfala nara kantri, pipol moa willing for storyim belief bilong olketa. But, nomata wanem kaen living pipol garem, olketa samting wea happen long living muvim samfala wea bifor no interest long religion for ting moa long spiritual need bilong olketa.

Way for No Acceptim Different Tingting Mekem Planti Wiki

Olketa wea nating willing for storyim religion maet lukim or stap insaed wanfala bigfala raoa wea kamaot from way for storyim religion. Wanfala man for toktok hem say “different idea long religion startim moa raoa winim different idea long politik.” Richard M. Johnson, vice president bifor bilong America, say: “Strong for religion hem samting wea barava kosim way wea mind ting daonem samting; and, sapos man iusim rong, hem startim olketa worse fasin wea man giamanim hemseleva for say hem duim for servim God.”

Waswe, iu sapraes hao olketa teaching bilong Bible wea fit for mekem pipol kamap moabeta hem kamap samting wea pipol iusim for apim fasin for judgim, hate-im, and no acceptim different tingting? For tok stret, hem no Bible teaching nao wea mekem planti for no interest long religion. But, hem way wea pipol no teachim stret. Example, tingim Kristian Way.

Thru long toktok and example, Man Wea Startim Kristian Way, Jesus Kraest, hem encouragim love for God and neibor, no ­fasin for ova tumas long feeling and for no acceptim different tingting. Tul bilong Kraest and olketa follower bilong hem long ministry hem fasin for ting raonem samting and for muvim man. (Matthew 22:41-46; Acts 17:2; 19:8) And olketa savvy prea for olketa enemy and pipol wea persecutim olketa.—Matthew 5:44; Acts 7:59, 60.

Trufala religion hem openem mind and heart, and hem pullim pipol klos tugeta. Dastawe, for olketa wea barava lukaotem truth, way for story abaotem religion withim respect savvy barava helpem olketa, olsem iumi bae lukim.

[Box long page 15]

Wanem Olketa Bigman Talem

“Sapos Jesus hem way for kasem God, hem important tumas for olketa follower bilong Jesus for sharim disfala savvy withim pipol.”—Ben Johnson, professor bilong evangelism long Columbia Theological Seminary.

“Jesus teachim olketa disaepol bilong hem for tekem gospel go long pipol. Datfala Maeti Assignment needim iumi for go long full world. Lord hem komandim olketa follower bilong hem for go long evriwea.”—Kenneth S. Hemphill, director bilong Southern Baptist Center for Church Growth.

“Sapos iumi no witness, then iumi no barava trufala Kristian. . . . Evri Kristian kasem work for kamap missionary and witness.”—Pope John Paul II.

“Staka preacher . . . moa interest long way for buildim olketa bigfala kongregeson and church construction project and long nextfala assignment bilong olketa olsem pastor, winim way for preachim message bilong Gospel wea no tok haed and wea mekem pipol no mas feel gud.”—Cal Thomas, man for raet.

“Iumi mas nok long olketa door . . . Olsem olketa Witness (bilong Jehovah) and samfala narawan, iumi mas goaot and talemaot datfala Gospel bilong Jesus Kraest.”—Thomas V. Daily, Catholic bishop.