Lukluk Long World
Bible Proofreading Mistek
“Long mek-17 and mek-18 century, olketa savvy mekem planti mistek taem olketa printim Bible,” Bible Review magasin say, “but datwan no meanim olketa ting small long hem.” Olsem example, Bible wea pipol kolem Stupid Bible kamaot taem Charles I hem rul. Long Psalm 14, olketa wea printim mekem mistek and changim wanfala word. From diswan, first verse hem say: “Stupid wan hem say long heart bilong hem God hem stap.” From diswan olketa mas peim fine bilong 3,000 pound. Narafala kampani, Barker and Lucas, kasem fine bilong 300 pound long 1631 from olketa aotem wanfala word insaed wanem pipol kolem Adultery Bible. Diswan kosim bisnis bilong olketa for brekdaon. Bible bilong olketa say: “Iu mas duim adultery.” Semsem tu hem datfala Sin Nomoa Bible, bilong 1716. Winim way for Jesus talem man hem healim “no sin moa,” olketa raet hao Jesus say for hem “sin nomoa.” Withim diswan tu hem Vinegar Bible, wea olketa pablisim long 1717. Winim way for heding bilong Luke chapter 20 hem say “Parabol bilong Vineyard,” hem say, “Parabol bilong Vinegar.”
TV and Olketa Accident
Pikinini wea iusim tumas taem for lukluk TV bae laek followim olketa danger samting wea olketa lukim. Olsem study bilong Dr. José Umberos Fernández bilong Spain showimaot, chance for pikinini garekil hem go ap withim evri hour wea pikinini hem stap front long TV. Fernández say maet diswan happen bikos TV showim samting wea no savvy really happen. Wanem nao dadi and mami savvy duim for changim diswan? Greek niuspepa To Vima say dadi and mami should share for choosim olketa program wea pikinini bilong olketa lukluk long hem and helpem olketa for iusim “eye wea judgim samting and wea careful,” winim way for believim evri samting.
Fish Compass
Wanem nao gaedem olketa rainbow trout? Olketa New Zealand scientist faendemaot hao fish hia garem “wanfala magnetic compass long nose,” New Scientist magasin hem reportim. Planti bird and reptile and samfala mammal savvy followim magnetic pull bilong earth. But olketa scientist nating faendem olketa cell wea pullim samting go north, cell wea olketa say garem magnetite. Olketa wea duim research long University bilong Auckland faendemaot hao taem wanfala trout hem kasem wanfala magnetic pull, diswan affectim wanfala nerve fiber insaed long hem. Datfala fibre leadim olketa go long nose bilong fish, wea olketa faendem olketa nerve cell wea garem magnetite.
Raf Fasin From Soccer
Barava strongfala feeling midolwan samfala team wea play long World Cup soccer competition last year hem startim olketa celebration wea planti long olketa end withim raf fasin. Long Mexico, olketa kolem winim 1,500 police for kontrolem olketa supporter bilong Mexico team. Niuspepa bilong Mexico, El Universal, say Police holem winim 200 pipol. Wanfala firecracker wea olketa torowem long taem bilong faet hem bosta long face bilong wanfala young supporter, wea destroyem part long hed bilong hem. Long Argentina, Belgium, and Brazil, olketa celebration kamap nogud tu, wea kosim pipol for garekil and samfala for go long prison. Niuspepa bilong Mexico City reportim hao police kasholem samting olsem 1,000 pipol long France from samting wea join withim World Cup, and France tambuim 1,586 pipol for no go back moa long datfala kantri.
Hand Bilong Iu and Health
“Taem man sneeze and kavarem mouth withim hand or blowim nose bilong hem, hem need for wasim hand bifor hem holem wanfala telephone or openem door,” The Medical Post bilong Canada hem talem. The Post raetem toktok bilong U.S. Association for Professionals in Infection Control and Epidemiology, wea say “80% bilong olketa sik wea kasem man planti taem hem spread thru long hand and way for holem samting, and no thru long air.” Dr. Audrey Karlinsky from University bilong Toronto encouragim way for was hand evritaem and for soapem hand “for 10 go kasem 15 second, and careful for klin midolwan olketa finger and underneath olketa fingernail.” Bihaen diswan, hem say iu should wasimaot soap from hand bilong iu.