Hao Nao Baby Should Sleep?

STAKA baby raonem world dae from disfala sik Sudden Infant Death Syndrome (SIDS). Long United States, diswan hem main samting wea kosim dae long olketa baby midolwan age 1 month and 12 month. Waswe, eni way stap for daonem disfala danger? Olsem The Journal of the American Medical Association (JAMA) talem, research wea olketa duim samfala year go pas showimaot danger bilong SIDS hem barava go daon taem olketa baby sleep long backsaed bilong olketa and no long bele. Long samfala kantri olketa startim samfala program for letem dadi and mami luksavvy hao way wea baby sleep hem join withim SIDS. Long Australia, England, Denmark, New Zealand, and Norway, SIDS go daon 50 percent bihaen tufala year wea olketa mekem spesel campaign long pablik for apim way for layim baby long backsaed bilong hem taem hem sleep.

Hao nao way wea baby sleep long bele bilong hem join withim SIDS olketa no barava savvy, but samfala man wea studyim diswan talem hao way for layim baby long bele bilong hem maet mekem baby breathim back air wea hem breathim aot, and diswan maet mekem carbon dioxide insaed long blood kamap big. And tu body bilong baby maet kamap hot tumas from body no savvy lusim hot taem baby laydaon long bele. Nomata wanem, planti taem baby no tane bihaen mami layim hem long backsaed or long bele. Research showim tu hao hem moabeta for layim wanfala healthy baby long backsaed bilong hem, winim way for layim long saed.

Why nao olketa mami choosim wanfala way for sleep winim narawan? JAMA go ahed for talem hao planti taem olketa mami followim nomoa kastom—olketa mekem baby sleep long sem way wea mami or olketa long area bilong olketa duim. Or maet olketa followim way olketa lukim long hospital. And tu samfala mami tingsay baby bilong olketa savvy sleep gud long wanfala way winim narawan. Planti mami layim baby long backsaed bilong hem long first month and bihaen change moa for layim long bele. “Kaen way olsem hem mekem mifala worry,” JAMA talem, “bikos danger bilong SIDS hem big tumas long olketa baby midolwan age 2 go kasem 3 month.” Olketa doctor trae hard for talem olketa dadi and mami wea garem small baby abaotem samting wea olketa say hem simple and gudfala way for daonem danger bilong SIDS—hem for layim wanfala healthy baby long backsaed bilong hem taem hem sleep.a

[Footnote]