Thunderstorm—Maeti King Bilong Olketa Cloud

From man wea raet for Wekap! long Australia

PLANTI pipol interest tumas long olketa cloud start kam from taem olketa pikinini. Wanfala man wea 80 year ting back long taem wea hem pikinini and hem laydaon long gras and lukim olketa cloud wea luk olsem olketa “wakabaot long skae.” Hem tingim hao planti taem hem savvy askim wanem nao olketa cloud. Waswe, olketa nao cotton? Why nao evriwan luk different? Datwan luk olsem ship, narawan olsem horse wea jump. And then wanfala olsem wanfala maeti haos. Olketa go ahed for mekem hem hapi tumas taem olketa flae akros long skae and change go long olketa different shape and size. Kam kasem distaem, hem say hem laek lukim olketa cloud wea luk olsem olketa “playim game” long skae. Maet iu laekem sem samting tu.

But, maet best cloud nao hem olketa wea savvy “toktok.” Nem bilong olketa hem cumulonimbus, or thunderhed. Olketa luk blak and danger, and savvy kasem 16 kilometer or moa long skae, and olketa nao mekem thunderstorm. Olketa storm cloud savvy shaen withim laetning and givim warning bilong thunder taem olketa kamap big long skae. Long naet olketa maet mekem bigfala noise and garem staka laet wea winim eni firework bilong man. Olketa blow and givimaot rain and ice and then go nao, and leavim naesfala smel bilong klin rain long graon wea maet drae tumas bifor.

Hao Nao Olketa Thunderstorm Start

Long distaem man savvy lukluk long planet Earth from space. Hem lukim olketa cloud wea olsem mat wea kavarem earth. Man for raet, Fred Hapgood talem iumi hao “evritaem haf bilong earth, wea 250 million square kilometer, garem [olketa cloud]—olketa wea flat, raon, garem pattern, thin, luk olsem lace, fat, garem different kaen laet, spread olabaot, and wea flae and savvy finis evriwea long world.” Olketa thunderstorm join withim olketa cloud hia—tru nao, samting olsem 15,000,000 thunderstorm kamap long earth evri year, and klosap 2,000 thunderstorm go ahed evritaem.

Wanfala thunderstorm hem start taem strongfala cold air kavarem air wea wet and no strong tumas. Samting nao, maet hot from sun, different weather, or olketa maunten, hem mekem hot wet air for go ap thru long cold air. Olketa air current hem start, and strong bilong hot wea stap long air and datfala wata hem change for kamap wind and electrik.

Best ples for olketa thunderstorm start hem long bottom haf long earth. Diswan showimaot why South America and Africa nao tufala continent wea kasem staka thunderstorm and why olketa say Central Africa and Indonesia garem staka thunderstorm winim eni nara ples. Kampala, Uganda, hem ples wea garem record bilong 242 day bilong thunderstorm for wan year. But, olketa thunderstorm kamap long planti narafala ples long earth tu.

Olketa Firework Long Skae

Tufala mark bilong wanfala thunderstorm wea showaot klia hem nao thunder and laetning. But wanem nao kosim disfala barava spesel samting, wea mekem iumi fraet tu? Laetning hem sutaot taem electrik bilong tufala different ples kamap big and winim air wea givim protection. Diswan savvy happen insaed wanfala cloud, midolwan olketa cloud, or midolwan long olketa cloud and graon. For lelebet taem laetning hem mekem air kamap barava hot tumas—hot olsem 30,000 degrees Celsius long taem wea laetning aotem electrik bilong hem.

Laetning garem different kaen nem olsem streak laetning, fork laetning, or sheet laetning. Sapos laetning hem luk olsem wanfala river, hem nao streak laetning. But sapos hem luk olsem hem divaed or garem branch, then olketa kolem fork laetning. Sapos hem laet insaed wanfala cloud, diswan hem sheet laetning. Olketa savvyman talem iumi hao planti laetning wea iumi lukim hem cloud-go-long-graon laetning.

Laetning savvy spoelem samting wea laef—maet killim dae and givim kill tu long olketa man and animal. Pipol long olketa sandbis and golf course and wea aotsaed long bush area savvy insaed long bigfala danger bikos olketa no garem eni protection from disfala electrik.—Lukim box long page 13.

Thirti percent nomoa long pipol wea laetning bangam olketa savvy dae, and man bae no garekil for longtaem sapos pipol givim first aid kwiktaem. But, nomata samfala story talem different samting, planti taem laetning savvy bangam sem ples moa!

Laetning hem startim planti fire. Diswan savvy destroyem olketa big sekson bilong land. Luk olsem laetning nao startim 10 percent long olketa fire insaed long forest long United States. From diswan fire burnim winim 35 percent bilong full forest and bush area long datfala kantri.

But laetning savvy help tu. Olsem example, olketa forest savvy kasem gud samting long samfala way. Olketa small fire wea laetning startim savvy mekem olketa gras katdaon. Diswan savvy daonem danger bilong olketa bigfala fire wea savvy burn go kasem top bilong olketa tree. Long gudfala way laetning savvy changim tu nitrogen gas, wanfala gas wea olketa plant no savvy iusim. Laetning savvy changim disfala gas go long olketa nitrogen part wea evri plant and seed needim for grow, wea provaedem protein wea evri animal mas garem. Olketa say hao 30 go kasem 50 percent bilong nitrogen oxide wea stap long rain kamap thru long laetning and hao 30 million ton bilong nitrogen evri year kamap long world thru long disfala way.

Nambawan Help Bilong Wanfala Storm

Wanfala thunderstorm savvy kapsaetem staka wata. Main reason for bigfala rain insaed shortfala taem nomoa hem from strongfala wind insaed long big storm hem holem staka wata and then hem aotem wantaem. Olketa measurem rain olsem wea 200 millimeter falldaon insaed wan hour. Hem tru, nogud saed stap tu long olketa bigfala rain olsem.

Taem wanfala storm hem muv long slow way, smallfala sekson bilong land kasem staka long datfala rain, and diswan savvy mekem flood kamap. Insaed long storm olsem, wata wea ran hem mekem olketa stream and river for flood. Olketa say bigfala haf long olketa samting wea flood spoelem long United States hem from olketa thunderstorm.

But, rain wea kamaot from olketa thunderstorm hem savvy provaedem planti gudfala samting. Staka wata nao go long graon and olketa reservoir and dam. Research hem showimaot hao 50 go kasem 70 percent bilong rain long samfala area kamaot from olketa thunderstorm, so long olketa ples olsem storm rain hem barava important tumas long evriting wea laef.

Waswe Long Hail?

Olketa thunderstorm savvy spoelem staka samting tu from olketa garem hail. Hail hem kamap taem rain hem kamap ice and start for grow big taem wind wea muv ap and daon pushim olketa. Samfala report say hao olketa hailston savvy big tumas and hevi. Long Germany olketa reportim hao long 1925 wanfala hailston hem falldaon wea 26 centimeter long. Hevi bilong hem winim tu kilogram. Wanfala hailston wea big winim eni narawan long United States hem falldaon long Kansas long 1970. Raon bilong disfala hailston hem 44 centimeter long bigfala part bilong hem and hevi bilong hem nao 776 gram. Wanfala hailston wea big olsem and wea falldaon from olketa cloud savvy killim man dae.

But lucky nao, klosap evritaem hail hem small tumas and no savvy killim man dae. And tu, kaen thunderstorm wea mekem hail savvy spoelem small area nomoa. But, way wea hail hem spoelem kaikai bilong world hem kostim planti million dollar evri year.

Olketa Tornado and Thunderstorm

Barava danger samting wea kamaot from olketa thunderstorm hem wanfala tornado. Klosap evri tornado join withim thunderstorm, but no evri thunderstorm garem tornado. Wanfala tornado hem thin sekson bilong air wea tan long raf way. Waed bilong hem maet kasem planti hundred meter, wea start from wanfala thunderhed cloud go kasem graon. Speed bilong wind long olketa strongfala tornado savvy winim 400 or 500 kilometer long wan hour. Way wea barava strongfala wind wea tan hem join withim air wea muv ap long midol bilong tornado savvy destroyem olketa building and torowem eni samting olabaot long skae. Olketa tornado kamap long planti kantri long world.

Samting wea no strong olsem tornado but savvy spoelem staka samting hem nao stret-laen wind wea kamaot from air wea muv daon and wea muv kwiktaem. Air wea muv daon savvy kosim strongfala wind long graon wea savvy kasem speed olsem 150 kilometer long wan hour. Air wea muv kwiktaem hem moa strong and savvy winim 200 kilometer insaed wan hour.

Hem klia tumas iumi mas respectim olketa thunderstorm and savvy long danger bilong olketa. Olketa samting hia hem part bilong creation wea staka samting stap for iumi learnim yet.

[Box/Piksa long page 13]

Protection Againstim Laetning

Emergency Management Australia givim samfala idea for protectim iumi long taem bilong wanfala thunderstorm.

Protection Long Aotsaed

◼ Lukaotem protection long trak wea garem strongfala roof or insaed wanfala building; stap klia long olketa smallfala building, tent, and olketa tree wea standap seleva.

◼ Sapos iu aotsaed and no eni protection stap, bendaon (seleva), moabeta insaed wanfala hol, withim tufala leg tugeta, and aotem evri samting wea metal from body. No laydaon, but no mekem iuseleva big winim nara samting raonem iu.

◼ Sapos hair bilong iu standap or iu herem noise from olketa samting wea stap klosap long iu, olsem olketa rock and fence, stretawe ranawe go long different ples.

◼ No flaem olketa kite or toy aeroplane wea garem wire long hem.

◼ No holem eni samting wea long or wea metal, olsem fishing rod, ambrela, and golf club, long olketa open ples.

◼ No touchim or standap klos long eni building wea metal, olketa wire fence, or metal kaleko-laen.

◼ No raedem olketa horse or bicycle or draev insaed trak wea no garem roof.

◼ Sapos iu draev, go easyeasy or parkim trak farawe from eni samting wea hae olsem olketa tree or paoa laen. Stap insaed olketa trak withim strongfala roof, but no touchim or lean long eni metal part long trak.

◼ Sapos iu swim, lusim wata stretawe and faendem ples for stap.

◼ Sapos iu insaed boat, go long sandbis kwiktaem. Sapos hem no sef for duim olsem, lukaotem sef ples under long haefala building, olsem wanfala bridge or wharf. Mek sure iu graondem mast and rope bilong wanfala sailboat go long wata.

Protection Long Insaed

◼ Stap klia long olketa window, electrik samting, pipe, and narafala metal samting.

◼ No iusim telephone. Sapos iu need for mekem emergency phone kol, duim kwiktaem.

◼ Bifor storm hem kam, aotem eni wire wea joinim TV antenna long aotsaed and olketa paoa cable long radio and television. Aotem olketa computer paoa cable. Stap klia long eni electrik samting.

[Credit Line]

From buk Severe Storms: Facts, Warnings and Protection.