Taem Way for Disable Bae Finis
WANFALA woman wea cripple hem say hao planti pipol garem “gudfala body for shortfala taem nomoa.” Hem tru tumas, bikos long distaem or bihaen, weak point bilong body savvy showaot long evriwan! Dastawe, bigfala bisnis kamap for sellim olketa eyeglas, contact lense, false teeth, hearing aid, electronic pacemaker, and false nee joint. Olsem Romans 8:22 hem talem, “evri creation go ahed for krae tugeta and feel pain tugeta kam kasem distaem.”
But, evriwan savvy kasem comfort from promis bilong God for mekem olketa man wea obey kasem back perfect health long wanfala raeteous “niu earth.” (2 Peter 3:13; Revelation 21:3, 4) Isaiah 35:5, 6 hem say: “Long datfala taem, eye bilong olketa wea blind bae open, and ear bilong olketa wea earpas bae no sat moa. . . . Man wea cripple bae klaemap olsem wanfala deer, and tongue bilong olketa wea no savvy toktok bae singaot withim hapi.”
Bible hem profesi hao “wanfala great crowd” bae stap laef thru long disfala wicked system wea bae finis evribit. (Revelation 7:9, 14; Psalm 37:10, 11, 29) Iumi no daotem hao bihaen datfala system hem finis evribit, olketa wea barava disable or garem olketa problem long health bae stretawe kasem healing from sik bilong olketa! (Isaiah 33:24) For showimaot olketa healing wea bae kamap long niu earth bilong God, Jesus duim semkaen healing taem hem stap long earth. (Markem Mark 5:25-29; 7:33-35.) Iumi no savvy meanim feeling bilong pipol and olketa krae bilong hapi taem olketa wea disable torowem olketa false leg or hand, crutches, and wheelchair! Withim gudfala body, olketa bae acceptim responsibility wea God givim long olketa for mekem earth kamap wanfala paradaes hom.—Luke 23:43.
Go kasem datfala taem, olketa wea disable distaem mas trae hard withim samting wea stopem olketa. Nelson, wanfala disable man long Canada, hem say: “Taem mi start for feel sorry, mi tingim toktok bilong Jesus long Matthew 24:13: ‘Man wea stand strong go kasem end nao bae sev.’” Nomata samting stopem olketa wea disable, olketa savvy kamap gud and strong long wanfala important way—long spiritual way—taem olketa stand strong long Kristian faith.—James 1:3, 4.
Olketa Witness Bilong Jehovah helpem finis planti million pipol for garem faith. Dell, disfala disable man wea iumi storyim long article bifor, hem say: “Hem hard for talemaot feeling bilong mi taem mi learnim hao olketa physical problem olsem bilong mi hem for shortfala taem nomoa.” Tru nao, bikos long paoa wea olketa kasem from disfala hope, iu no savvy say Dell—and planti moa olsem hem—olketa disable.
[Piksa long page 10]
Olketa sikman wea stap laef taem disfala system hem destroy bae heal long mirakol way