Gudfala Living Taem Leg or Hand No Stap

“MAN for klaem hem kasem top moa.” Hem nao niuspepa talem taem Tom Whittaker kasem top bilong Maunt Everest. Planti pipol klaemapem datfala hae maunten bifor, but Tom Whittaker hem first man for duim withim wanfala leg! Whittaker hem lusim leg long accident long trak. But wanfala false leg, wanfala prosthesis, mekem hem fit for duim sport bilong hem moa. Olketa false leg or hand letem planti thousand pipol wea lusim samting olsem for garem gudfala living. Tru nao, iumi no sapraes distaem for lukim pipol wea lusim leg or hand olketa ranran, play basketball, or raedem bicycle.

Olketa iusim pis timber and iron hook nomoa long olketa firstfala kaen false leg and hand. But olketa kamap moabeta bihaen olketa war wea planti thousand garekil. Iumi no sapraes hao olketa say wanfala army doctor—Ambroise Paré from France long mek-16 century—nao workim firstfala barava false leg and hand. Distaem olketa false leg or hand iusim hydraulic, olketa stael nee joint, carbon-fiber leg wea savvy muv, silicone, plastic, and narafala kaen spesel technology wea helpem planti pipol for wakabaot and muv long gudfala way, wea olketa no tingsay diswan savvy happen. From olketa electronic part barava small tumas datwan helpem olketa hand for muv long gud way. Lukluk bilong olketa false leg or hand hem kamap moabeta tu. Olketa false leg and hand distaem garem olketa finger, and samfala luk olsem olketa garem vein tu. Tru nao, wanfala woman model wea lusim leg bilong hem from cancer kasem false leg wea lukluk bilong hem olsem barava leg, mekem hem savvy go ahed withim work bilong hem olsem model.

Tingting Hem Important

Nomata olsem, Ellen Winchell, wanfala doctor hem givim warning olsem: “Taem iu kasem problem olsem way for lusim leg or hand, iu kasem challenge long evri part long laef—saed long body, feeling, tingting, and spiritual way.” Tingim William, wea bihaen long wanfala accident olketa mas aotem leg bilong hem from hem kamap rotten. Hem say: “Wanfala main samting for winim eni challenge long laef hem nao tingting bilong iumi. Mi no tingim way for lusim leg olsem samting wea stopem mi. But, mi tingim gud saed long laef nomata long eni problem wea kamap bihaen accident bilong mi.” Ellen Winchell, wea hem tu lusim part long body, talem hao pipol wea tingim gud saed long laef savvy getius long way for no garem leg or hand winim pipol wea tingim bad saed. Olsem Bible talem, wanfala “heart wea hem hapi savvy mekem man feel gud.”—Proverbs 17:22.

Wekap! story withim samfala Kristian wea win long way for changim laef bihaen olketa lusim leg or hand. Planti say hao pipol wea lusim leg or hand mas trae for no shame or haedem problem bilong olketa. Dell wea lusim bottom haf long left leg bilong hem say: “Hem moa worse long mi sapos pipol tingsay hem tambu for storyim diswan. Long mi, datwan mekem evriwan feel nogud.” Samfala savvyman talem sapos iu no garem raet hand and iu meetim samwan, go ahed and sekhand withim left hand bilong iu. And sapos samwan hem ask abaotem false leg or hand bilong iu, story long hem abaotem diswan. Sapos iu no shame hem helpem narawan for no shame. Planti taem, story bae tan go long different samting.

Wanfala “taem for laf” hem stap. (Ecclesiastes 3:4b) Wanfala woman wea lusim hand bilong hem say: ‘Main samting, keepim way for laflaf! Iumi mas evritaem tingim hao way wea iumi ting abaotem iumi seleva hem affectim way wea pipol tingim iumi.’

Wanfala “Taem for Krae”

Bihaen hem lusim leg, Dell hem say long hemseleva, “Laef bilong mi finis nao.” Florindo and Floriano tufala evriwan lusim leg from olketa bomb long graon long Angola. Florindo hem say hem krae for threefala day and naet. Floriano garem semkaen problem withim feeling bilong hem. Hem say: “Mi 25 year nomoa. Wanday mi savvy duim evri samting, and next day mi no savvy standap. Mi feel sorry and weakdaon.”

Wanfala “taem for krae” hem stap. (Ecclesiastes 3:4a) Hem stret for feel sorry for lelebet taem bihaen iu lusim leg or hand. (Markem Judges 11:37; Ecclesiastes 7:1-3.) Ellen Winchell hem raet olsem: “Way for lusim sorry hem thru long way for feel sorry firstaem.” Way for talemaot feeling long narawan wea savvy listen long kaenfala way savvy help. (Proverbs 12:25) But way for feel sorry hem no go ahed olowe. For lelebet taem samfala pipol maet easy for kros tumas, complain, worry tumas, or no willing for story bihaen olketa lusim leg or hand. But, diskaen feeling savvy katdaon. Sapos hem no katdaon, maet bigfala sorry nao kamap—wanfala problem wea needim help from olketa doctor. Olketa famili member and fren should luksavvy long eni samting wea showimaot hao datwan wea olketa lovem hem needim help olsem.a

W. Mitchell, wea tufala leg bilong hem paralyze, hem raet olsem: “Evriwan needim pipol wea care. Iumi savvy deal withim eni samting sapos iumi garem famili and fren raonem iumi, but wanfala small problem savvy spoelem samwan wea trae seleva for deal withim laef. Way for fren no savvy kamap seleva, samwan mas startim and keepim, sapos nomoa hem savvy lus.”—Markem Proverbs 18:24.

Gudfala Living, Taem Leg or Hand No Stap

Nomata olketa disable, planti pipol wea no garem leg or hand garem gudfala living. Example, Russell hem born withim top part bilong left leg bilong hem nomoa. Nomata hem 78 year, hem go ahed evritaem for exercise and duim planti samting, nomata distaem hem iusim walking stik. Russell hem talem from hem garem fasin for hapi, nara nem wea olketa fren givim hem hem Hapi.

Douglas, wea lusim leg bilong hem long World War II, hem iusim wanfala false leg for wakabaot. Hem wanfala Witness Bilong Jehovah, wea for sixfala year hem hapi for serve olsem regular pioneer, wanfala wea preach full taem. And no forgetim Dell, wea tingsay laef bilong hem finis taem hem lusim leg bilong hem. Hem tu garem laef wea satisfy olsem wanfala pioneer, and hem savvy supportim hemseleva.

But, waswe long living bilong pipol wea lusim leg or hand long olketa kantri wea poor or wea garem war? World Health Organization hem say: “Truth bilong distaem hem way wea smallfala namba nomoa long olketa wea lusim leg or hand kasem help.” Planti mas depend long olketa stik or raverave crutches for wakabaot. Nomata olsem, samfala taem help hem stap. Floriano and Florindo, tufala wea lusim leg from bomb long Angola, kasem false leg thru long International Red Cross and gavman bilong Switzerland. Floriano hem hapi for serve olsem ministerial servant long kongregeson bilong hem bilong Olketa Witness Bilong Jehovah, and Florindo hem serve olsem elder and hem preach full taem.

Wanfala sekson wea lukaftarem olketa wea disable talem tru samting taem olketa say: “Pipol wea givap olketa nao only pipol wea disable!” Interesting samting, Bible duim bigfala samting for helpem olketa wea disable for no givap. Dell hem say: “Way for learnim truth from Bible hem barava helpem mi taem mi start for gud back.” Russell hem talem sem samting: “Hope bilong mi long Bible evritaem helpem mi thru long olketa test.” Wanem hope nao Bible givim for olketa wea disable?

[Footnote]

[Box long page 8]

Giaman Pain

Giaman feeling long leg or hand hem meanim taem man wea lusim leg or hand hem go ahed for garem feeling hao datfala leg or hand stap yet long body. Hem stretfala feeling wea pipol garem bihaen olketa operate for aotem leg or hand, and hem feel olsem hem barava stap, olsem wanfala buklet talem: “Careful long giaman feeling taem iu aot from bed or chair and iu no wearim false leg. Evritaem lukluk long daon and talem iuseleva hao leg no stap distaem.” Wanfala patient wea lusim tufala leg bilong hem ready for standap for sekhand withim doctor but, hem falldaon long graon!

Narafala problem hem giaman pain. Hem wanfala pain wea olketa tingsay hem kam from leg or hand wea lus nao. Strong bilong pain, kaen pain, and long bilong hem savvy different long evri man. Hapi samting, go-go giaman feeling and giaman pain savvy planti taem katdaon bihaen.

[Piksa long page 6]

Olketa false leg or hand distaem mekem laef moa hapi for planti pipol wea disable

[Credit Line]

Photo courtesy of RGP Prosthetics

[Piksa long page 7]

Hem stret nomoa for feel sorry bihaen iu lusim leg or hand

[Piksa long page 8]

Planti pipol wea disable garem gudfala laef