Hao Iu Savve Lusim

OLSEM taem iu lane for raedem bicycle, for lusim tobacco hem hard samting long firstaem wea iu traem. So sapos iu disaed strong for lusim, iu mas redy for traem planti taem go kasem taem iu lusim. Taem iu fail, no ting iu lus nao. Tingim datwan olsem wei for lane, nomata iu foldaon lelebet iu savve win long samting wea iu trae for duim. Samfala idea long daon hem helpem samfala finis. Maet olketa helpem iu tu.

Redyim Mind Bilong Iu for Lusim

■ Firstaem, iuseleva mas sure hao gud samting bae kamaot from wei for lusim smoke. Listim olketa reason why iu laek for lusim smoke, and evri gud samting wea bae kamap. Bihaen iu lusim smoke, wei for lukluk moa long disfala list bae strongim disison bilong iu. Feeling for laek mekem God hapi nao nambawan reason for iu lusim smoke. Bible hem sei iumi shud lovem God witim full mind, heart, soul, and strong bilong iumi. Iumi no savve duim datwan sapos iumi huk long tobacco.—Mark 12:30.

■ Ting raonem wei bilong iu for smoke for faendaot wanem taem and why nao iu smoke. Maet hem gud for raetem long pepa wanem taem and wea nao iu smokem evri cigarette long wan day. Diswan bae helpem iu for luksavve wanem difren kaen taem nao maet pullim iu for smoke bihaen iu lusim.

Planim Wanfala Date for Lusim

■ Chusim wanfala date for iu lusim smoke, and markem long kalenda bilong iu. Hem gud for chusim wanfala day wea iu bae no kasem nara hevi. Taem datfala day kam, lusim smoke evribit—kwiktaem and evribit.

■ Bifor datfala date kam for iu lusim smoke, torowem olketa ashtray, masis, and lighter. Wasim evri kaleko bilong iu wea smel tobacco.

■ Askem saport from olketa wea iu waka witim, olketa fren, and famili for encouragem iu taem iu trae for lusim smoke. No fraet for askem pipol for no smoke taem iu stap.

■ Planim samfala samting for iu duim long day wea iu bae lusim smoke. Maet iu go long wanfala ples wea tambuim smoke, olsem long museum or cinema. Iu savve duim exercise tu—swim or raedem bicycle or go wakabaot farawe.

Deal Witim Sik Bilong Finis

Sapos iu man for smoke tumas, luk olsem iu bae kasem disfala sik bilong finis, wea start samfala hour bihaen iu smokem last cigarette. Maet insaed diswan hem wei for feel nogud kwiktaem, no patient, no laekem pipol, wari, feel sorre, no savve sleep, no rest gud, laek kaikai tumas, and barava laekem cigarette. Maet doctor bilong iu savve givim iu medicine wea bae help for daonem olketa feeling hia. And tu, iu savve duim samfala samting for helpem iu winim disfala faet.

■ Long first tu-thri week wea diswan bae hard, kaikaim samting wea no givim tumas energy, and drinkim staka wata. Samfala faendem hao taem olketa hangre lelebet nomoa, hem gud for kaikaim vegetable wea iu no kukim, olsem carrot or celery. Sapos iu duim exercise, iu bae balancem wei for kamap fat and tu daonem feeling wea mekem body seksek.

■ No stap long ples or difren kaen taem wea bae pullim iu for smoke.

■ Faet againstim rong tingting wea maet pullim iu for smoke. Lukim samfala tingting wea staka pipol garem taem olketa feel sik witim: ‘Bae mi smoke tuday nomoa for feisim disfala hard taem.’ ‘Smoke nomoa hem only rabis fasin bilong mi!’ ‘Tobacco mas olraet nomoa; from samfala man for smoke laef winim 90 year.’ ‘Wanfala samting mas mekem mi dae.’ ‘Mi no enjoyim laef sapos tobacco no stap.’

■ Sapos iu klosap givap, weit firstaem. Sapos iu weit for ten minute nomoa, strongfala feeling bilong iu for laekem shud katdaon. Samfala taem maet tingting wea sei bae iu nating smoke moa hem tumas for tingting bilong iu. Sapos iu feel olsem, tingting nomoa for lusim smoke for tuday nomoa.

■ Sapos iu want for servem God, prea for help. Loving Creator bilong iumi savve givim “help long barava taem” for olketa wea trae for live followim will bilong hem. (Hebrews 4:16) Bat no ting wanfala mirakol bae happen. Iu mas duim samting fitim prea bilong iu.

Stap Olsem Man wea Lusim Smoke

■ Thrifala first month nao barava hard, bat nomata bihaen datwan iu shud, taem hem fitim, no stap witim pipol wea smoke and ples wea maet pullim iu for smoke.

■ No trikim iuseleva for tingse iu savve smoke samfala taem, nomata sapos iu lusim smoke finis for wanfala year or moa.

■ Againstim test for smokem “wanfala cigarette nomoa.” Hem isi for wanfala cigarette nomoa for lead go long samfala moa, and kwiktaem nomoa iu bae spoelem evri hard waka wea iu duim for lusim. Bat, sapos iu wikdaon and smokem wanfala cigarette, no eni reason stap for iu smokem narawan. Sapos iu start smoke moa, lusim moa.

Planti million pipol wea smoke win for lusim. Witim strong and wei for no givap, iu tu savve duim!