Why Lusim Smoke?

SMOKE hem no for pipol wea wantem long and hapi laef. Man wea smoke for longfala taem garem 50 percent chance for dae from hem. Director-general bilong World Health Organization (WHO) hem sei: “Cigarette hem . . . samting wea olketa wakem long kleva wei wea garem inaf nicotine for hukim man for full laef bilong hem and then killim hem dae.”

So, wanfala reason for lusim smoke hem bikos wei for smokem tobacco putim health and laef bilong man long danger. Winim 25 sik wea savve killim man dae hem join witim smoke. Olsem example, smoke nao main samting wea lead go long heart attak, stroke, bronchitis, emphysema, and samfala kaen cancer, main wan nao lung cancer.

Tru, man savve smoke for planti year bifor hem kasem wanfala kaen sik hia. Long semtaem, smoke no mekem pipol for laekem man. Olketa advertisement showim piksa bilong pipol wea smoke olsem olketa luk naes and healthy. Bat tru samting hem difren. Smoke savve mekem mouth smel nogud and teeth and olketa finger garem yellow-brown color. Hem savve mekem olketa man for no savve garem pikinini. Hem savve mekem man kofkof and short wind. Feis bilong man wea smoke maet luk wrinkle kwiktaem and kasem samfala nara problem long skin.

Hao Smoke Hem Affectim Nara Pipol

Bible hem sei: “Iu mas lovem neiba bilong iu olsem iuseleva.” (Matthew 22:39) Love for neiba bilong iu—and olketa famili member nao barava klos neiba bilong iu—hem wanfala strong reason for lusim smoke.

Smoke savve spoelem nara pipol. Bifor, man savve laetem cigarette long eni ples nomoa and no eniwan againstim diswan. Bat tingting bilong pipol hem change distaem bikos moa pipol luksavve long olketa danger for breathim smoke wea kam from cigarette bilong nara man. Olsem example, samwan wea no smoke wea maritim man for smoke hem garem 30-percent chance for kasem lung cancer winim sapos hem maritim man wea no smoke. Pikinini wea stap witim dadi and mami wea smoke savve kasem pneumonia or bronchitis long tufala first year long laef bilong hem winim pikinini wea stap long haos wea no eniwan smoke.

Babule woman wea smoke putim baby bilong hem long danger. Nicotine, carbon monoxide, and samfala nara danger chemical wea insaed smoke bilong cigarette savve go insaed long blood bilong mami and go stret long baby insaed long bele. Diswan savve mekem baby for dae insaed bele, or taem hem born, or bihaen hem just born. And tu, danger for baby seknomoa dae hem thri taem moa hae for wanfala mami wea smoke taem hem babule.

Hem Kost Tumas

Nara reason for lusim smoke hem bikos hem kost tumas. Wanfala study wea World Bank duim showimaot kost for lukaftarem health bilong pipol wea smoke hem kasem klosap $200 (U.S.) billion evri year. Bat datfala namba no showimaot haomas safa and pain nao kasem pipol wea sik from tobacco.

Hem isi for faendaot haomas selen nao cigarette hem kostim man wea smoke. Sapos iu smoke, tekem haomas selen iu spendem long cigarette for wan day and taems 365. Datwan bae showim haomas selen iu spendem long wan year. Tekem datfala namba and taems ten, and bae iu lukim haomas nao bae iu spendem long cigarette sapos iu smoke for nara tenfala year. Maet iu sapraes long ansa. Tingim samting iu savve duim witim datfala selen.

Waswe, Hem Sef for Change?

Tobacco bisnis advertisem cigarette wea garem lelebet tar and nicotine—olsem light or mild cigarette—for daonem danger wea smoke mekem long body. Bat, pipol wea change go long cigarette wea garem lelebet tar and nicotine barava wantem nicotine for semsem olsem haomas olketa garem bifor. Dastawe for kasem diswan, olketa wea change for iusim cigarette wea garem lelebet nicotine smokem moa cigarette, barava breath deep taem olketa smoke, or smokem full cigarette. Nomata for olketa wea no duim diswan, gud samting wea body kasem from diswan hem smol nomoa taem iu markem witim gud samting wea body kasem taem man lusim smoke evribit.

Waswe long pipe and cigar? Nomata for longtaem nao tobacco bisnis mekhae long pipe and cigar, smoke wea kamaot from tufala savve killim man dae olsem cigarette. Nomata sapos man no breathim smoke from cigar or pipe, bigfala danger stap for hem kasem cancer long lip, mouth, and tongue.

Waswe, tobacco wea man no smokem hem sef? Tufala kaen nao stap: snuff and chewing tobacco. Snuff tobacco hem powder, wea olketa sellim long tin or smol bag. Planti taem, olketa wea iusim savve putim insaed long botom lip or cheek. Olketa sellim chewing tobacco long olketa longfala roll, wea stap insaed smol bag. Olsem nem bilong hem showim, man hem kaikaim diswan, no suckim. Snuff and chewing tobacco savve mekem mouth smel nogud, teeth luk blak, cancer long mouth and wind pipe, man huk long nicotine, white soa insaed mouth wea savve kamap cancer, gum long mouth kamap wik, and teeth no strong. Hem klia, hem no wise for change from wei for smokem go long wei for suckim or kaikaim tobacco.

Gud Samting wea Kamaot Taem Iu Lusim

Tingim sapos iu man wea smoke longtaem. Wanem nao happen taem iu lusim? Insaed 20 minute wea iu smokem last cigarette, blood pressure bilong iu bae katdaon kasem normal. Bihaen wan week, body bilong iu bae no garem nicotine. Bihaen wan month, kofkof bilong iu, nose blok, wei for feel taed, and short wind bae start for katdaon. Bihaen faev year, chance bilong iu for no dae from lung cancer hem go ap 50 percent. Bihaen 15 year, danger for iu kasem sik long heart bae katdaon go kasem olsem man wea no smoke.

Kaikai bae teist gud long iu. Mouth, body, and kaleko bilong iu bae smel beta. Bae iu no wari moa for faendem selen for tobacco. Bae iu feel olsem iu winim samting. Sapos iu garem pikinini, example bilong iu bae helpem olketa for no smoke. Maet bae iu laef longtaem. And tu, iu bae duim samting fitim will bilong God, bikos Bible hem sei: “Letem iumi klinim iumiseleva from evri samting wea spoelem body.” (2 Corinthians 7:1) No tingse hem tu leit for iu lusim smoke; sapos iu lusim kwiktaem, hem gud tumas.

Why Hem Hard Tumas for Lusim

Hem hard for lusim smoke—nomata for olketa wea barava laek for lusim. Main reason hem bikos nicotine wea stap insaed tobacco hem wanfala drug wea barava hukim man. WHO hem sei: “Long wanfala list wea showimaot hao strong nao olketa drug wea savve affectim mind and fasin and wea hukim man, paoa bilong nicotine for hukim man hem winim heroin [and] cocaine.” Long difren wei from heroin and cocaine, nicotine no showimaot klia hao man garem hae feeling, so hem isi for ting smol long paoa bilong hem. Nomata olsem, datfala lelebet hae feeling nao mekem planti pipol go ahed for smoke mekem olketa garem datfala feeling olowe. Nicotine barava affectim feeling bilong iu; hem savve daonem hevi. Bat, feeling for barava needim nicotine nao savve lelebet kosim datfala hevi wea cigarette hem daonem.

Hem hard for lusim smoke tu bikos smoke hem kamap part long living bilong man. Witim wei wea nicotine hukim man, gogo man wea smoke start for evritaem just laetem cigarette and smokem nomoa. ‘Hand bilong iu getius long hem nao.’ ‘Hem for pasim taem nomoa,’ samfala maet sei.

Mek-thri reason wea mekem hard for lusim hem bikos tobacco hem kamap part long evriday laef. Tobacco bisnis spendem klosap six billion [U.S.] dollar evri year for advertisement wea showimaot pipol wea smoke luk naes, strong, healthy, and kleva. Planti taem advertisement showim olketa raedem horse, swim, plei tennis, or duim eni nara naesfala samting. Olketa movie and television program showim pipol wea smoke—and no olsem rabis pipol evritaem. Olketa stoa sellim tobacco and iu savve baem long klosap eni ples. Klosap evriwan long iumi no stap farawe from samwan wea smoke. Iu hard for ranawe from olketa samting hia wea savve affectim man.

Sorre tumas, no eni medicine stap for helpem iu finisim feeling for laek smoke olsem wanfala aspirin savve finisim hed soa. For win long disfala hard faet for lusim smoke, man mas garem reason wea muvim hem. Olsem taem man laek katdaon long weight bilong hem, hem mas strong for followim disison bilong hem for longtaem. Responsibility for win hem stap long man wea smoke.

[Piksa long page 5]

Huk Long Smoke Taem Man Young

Wanfala study long United States showim hao 1-fala long 4-fala young pipol wea traem cigarette gogo kamap huk long smoke nao. Diswan semsem tu witim namba wea traem cocaine and heroin. Nomata 70 percent long young pipol wea smoke olketa sorre from olketa start smoke, tu-thri nomoa fit for lusim.

[Piksa long page 5]

Wanem Nao Insaed Smoke Bilong Cigarette?

Smoke bilong cigarette garem tar, wea garem winim 4,000 chemical. Long olketa chemical hia, 43 nao savve startim cancer. Samfala nao cyanide, benzene, methanol, and acetylene (fuel wea olketa iusim long olketa torch). Smoke bilong cigarette garem tu nitrogen oxide and carbon monoxide, wea tufala evriwan poison gas. Main samting insaed hem nicotine, drug wea savve barava hukim man.

[Piksa long page 6]

Helpem Samwan Iu lovem for Lusim

Sapos iu no smoke bat iu savve long danger bilong smoke, maet iu feel nogud taem olketa fren and famili go ahed for smoke. Wanem nao iu savve duim for helpem olketa for lusim? Wei for komplen olowe, askem, forcem, and mekfani long olketa bae no mas waka. Tumas toktok wea daonem hem bae no waka tu. Winim wei for lusim, man wea smoke maet lukaotem smoke for daonem pain long feeling wea kamaot from olketa kaen wei olsem. So trae for minim wei wea hem hard tumas for lusim and hao for samfala hem hard winim narawan.

Iu kanduit forcem man for lusim smoke. Strong from insaed and feeling for barava sure for lusim smoke mas kam from man wea smoke. Iu need for faendem samfala loving wei for encouragem and saportim feeling for want for lusim smoke.

Hao nao iu savve duim datwan? Long taem wea fitim, maet iu talem datfala man hao iu lovem hem and iu wari abaotem fasin bilong hem for smoke. Minim hao iu bae stap for saportim eni disison bilong hem for lusim. Bat sapos iu duim diswan olowe, bae hem no waka gud and bae no garem eni mining.

Wanem nao maet iu duim sapos samwan wea iu lovem hem disaed for lusim smoke? No forget hao hem maet feel sik witim, from body barava huk long smoke, and hem bae feel nogud and sorre. Maet hed bilong hem savve soa and hem no savve sleep gud tu. Talem hem feeling hia hem for lelebet taem nomoa and hem showimaot body hem change for fitim niufala and healthy living. Showimaot iu hapi and talem gud samting. Talem hem iu hapi tumas from hem trae for lusim smoke. Long datfala taem wea hem feel sik, helpem hem for stap klia long olketa samting wea savve mekem hem wari and mekem hem start smoke moa.

Waswe sapos hem start smoke moa? Trae for no ova tumas long feeling bilong iu. Showimaot kea. Ting long diswan olsem taem for iufala evriwan lane, wea bae mekem moa isi for hem win next taem.

[Piksa long page 7]

Tobacco bisnis spendem klosap six billion (U.S.) dollar evri year long advertisement