Tingting Bilong Bible

Medical Treatment wea Iu Chusim—Hem Important?

OLKETA man evritaem kasem sik and garekil. Taem olketa kasem olketa enemy hia bilong gudfala health, planti lukaotem help long medical treatment. Jesus Christ luksavve diswan savve helpem iumi, taem hem sei “olketa wea healthy no needim doctor, bat olketa wea garem sik nao needim.”—Luke 5:31.

Man wea raetem datfala toktok long Bible hem Luke, wanfala doctor. (Colossians 4:14) Maet long gogo bilong tufala, aposol Paul kasem help from savve bilong Luke olsem doctor. Bat waswe, Bible givim eni instruction long wanem kaen medical treatment fitim Christian for acceptim? Waswe, medical treatment wea iu chusim hem important?

Olketa Bible Principle

Bible savve leadim man for disaed long wisefala wei saed long medical treatment. Olsem example, Deuteronomy 18:10 -12 talem klia Jehovah “barava heitim” divination and magic. Wei for duim “spiritism” wea Paul givim warning abaotem, hem minim tu tufala samting hia wea God tambuim. (Galatians 5:19-21) Dastawe, olketa tru Christian stap klia long eni treatment wea join witim spiritism.

Bible showimaot tu Creator barava tinghae long wei wea laef and blood hem holy. (Genesis 9:3, 4) From Olketa Jehovah’s Witness disaed strong for obeyim komand for ‘go ahed for stap klia from blood,’ olketa rejectim medical treatment wea brekem Bible komand for stap klia from blood. (Acts 15:28, 29) Diswan no minim olketa rejectim evri medical treatment. Olketa lukaotem best treatment for olketa seleva and pikinini bilong olketa. Bat olketa askem doctor for givim treatment wea fitim biliv bilong religion bilong olketa.

Ting Raonem Gogo Bilong Iu

King Solomon givim warning hao “eniwan wea no garem savve hem bilivim evri toktok, bat man wea wise hem ting raonem gogo bilong hem.” (Proverbs 14:15) Nomata taem wanfala medical treatment wea man chusim hem no barava againstim olketa Bible principle, hem shud ‘ting raonem gogo bilong hem.’ No evri medical treatment savve helpem man. Taem Jesus sei ‘olketa wea garem sik needim doctor,’ hem no appruvim evri medical treatment long taem bilong hem. Hem savve samfala medical treatment hem tru wan and samfala hem laea wan.a

Long distaem tu, samfala treatment maet iusles, or laea wan nomoa. Sapos man no chus gud hem savve kasem samfala danger. Hem gud for luksavve tu hao samting wea helpem wanfala man maet no fitim—or savve spoelem tu—nara man. Taem hem mas disaedem medical treatment, wise man bae tingting gud long evri samting wea stap for chusim winim wei for ‘trustim evri toktok,’ nomata hem kasem advaes from samfala fren wea laek help. Hem bae showimaot “stretfala tingting” taem hem lukaotem information wea hem fit for trustim mekem hem savve disaed long gudfala wei.—Titus 2:12.

Garem Stretfala and Balance Tingting

Hem stret for warim health bilong body bilong iu. Wei for lukaftarem health bilong body long balance wei hem showimaot iu tinghae long present bilong laef and God wea givim. (Psalm 36:9) Nomata olketa Christian lukaotem medical treatment wea fitim olketa, olketa bae want for balance long olketa samting saed long health. Olsem example, sapos wanfala healthy man ova tumas for interest long health and exercise, diswan savve mekem hem no tingim “olketa samting wea moa important.”—Philippians 1:10; 2:3, 4.

Wanfala sik woman long taem bilong Jesus “spendem evri selen bilong hem” for lukaotem help bilong olketa doctor for sik bilong hem wea stap longtaem. Wanem nao happen? Winim wei for hem kasem healing, sik bilong hem kamap moa worse, wea mekem hem feel wiki. (Mark 5:25, 26) Hem duim evri samting wea hem fitim for kasem help, bat no eni samting waka. Samting wea kasem hem showimaot hao medical science long taem bilong hem no garem inaf savve. Long distaem tu, nomata medical research and technology muv ahed gud, sem samting kasem planti pipol. So hem important for garem stretfala tingting long wanem medical science savve duim. Iumi no savve kasem perfect health long distaem. Olketa Christian luksavve taem bilong God for “healim olketa nation” hem long future yet. (Revelation 22:1, 2) Dastawe, iumi mas garem balance tingting long medical treatment.—Philippians 4:5.

Hem klia, samting wea iumi chusim hem important. Dastawe, taem iumi mas disaedem eni samting abaotem medical treatment, wanem iumi chusim shud showimaot iumi laek for garem gud health and keepim gudfala wei for fren witim God. Taem iumi duim olsem, iumi savve go ahed for trustim hao promis bilong Jehovah bae fulfill, hao insaed long nambawan niu world wea bae kam, “no eniwan bae sei: ‘Mi sik.’ ”—Isaiah 33:24.

[Footnote]

[Piksa long page 26]

“The Doctor,” 1891, by Sir Luke Fildes

[Credit Line]

Tate Gallery, London/Art Resource, NY