LAEF BLO CHRISTIAN
Redi Distaem for Medical Emergency
Why nao hem gud for redi? Medical emergency and for admit lo hospital hem savve happen enitaem wea iumi no expectim. So bifor eni emergency kamap, iusim olketa samting wea hem available for helpem iumi for redi, mekem iumi fit for kasem best medical treatment. Taem iumi duim datwan, hem showim iumi respectim laef and law blo Jehovah abaotem blood.—Ac 15:28, 29.
Wat nao iu savve duim for redi?
Taem iu redi for fillimap disfala durable power of attorney (DPA) card,a hem gud for iu ting raonem and prea abaotem. Pablisa wea baptaes finis savve askem literature servant for DPA card for hemseleva, and Identity Card (ic) for olketa smol pikinini blo hem
Taem wanfala sista babule, hem savve askem olketa elder lo kongregeson for datfala Information for Olketa Mami wea Babule (S-401). Disfala document bae helpem hem for mekem gudfala disison abaotem eni medical situation wea maet kamap taem hem babule and bonem baby
If medical situation blo iu bae needim eniting saed lo blood or bae iu admit lo hospital, talem lo olketa elder lo kongregeson blo iu and letem olketa lo hospital for savve wanfala minister blo Olketa Jehovah’s Witness bae visitim iu
Hao nao olketa elder savve help? Olketa savve helpem iu for fillimap DPA card blo iu. Bat, olketa elder bae no mekem eni medical disison for iu or storyim tingting blo olketa seleva abaotem wanem iuseleva mas disaedem. (Ro 14:12; Ga 6:5) Taem iu talem olketa elder lo kongregeson blo iu hao iu feisim wanfala medical situation wea maet join witim blood, bae olketa stretawe contactim Hospital Liaison Komiti (HLC) for iu.
Hao nao HLC savve helpem iu? Olketa brata wea serve lo HLC kasem training for storyim biliv blo iumi abaotem blood lo olketa wea waka lo medical and law. Olketa savve story witim olketa doctor and nurse abaotem samfala idea for kasem medical treatment wea no iusim blood transfusion. Sapos iu needim, olketa savve faendem wanfala doctor wea savve willing for helpem iu.
WATCHIM VIDEO HAO FOR DISAEDEM OLKETA MEDICAL TREATMENT WEA IUSIM BLOOD, AND THEN ANSAREM OLKETA KWESTIN HIA:
Wat nao iu lanem from disfala video wea savve helpem iu for redi for wanfala medical emergency wea join witim blood?
a Leson 39 blo Enjoyim Laef for Olowe! buk savve helpem iu for mekem olketa disison saed lo medical wea join witim blood.