Wanem Nao Future for Gun Kontrol?
LONG olketa year wea just go pas, olketa gavman evriwea long world storyim planti wei for faet againstim wei for baem and sellim olketa smol gun wea no fitim law. United Nations General Assembly storyim diswan tu. Olketa redyim olketa report, talem olketa idea, and mekem olketa resolution. Bat, pipol wea tok againstim sei wei for lukluk gud long olketa blak-market minim olketa main wan wea baem and sellim gun—olketa gavman seleva—no insaed diswan.
For tok stret, hem hard for luksavve wanem kaen wei for sellim gun nao hem fitim and no fitim saed long law. Planti gun wea olketa sellim wea no fitim law, bifor olketa sellim fitim law. Olketa gun wea firstaem olketa sellim long army or long police, planti taem pipol stealim and sellim long blak market. And tu, planti wea baem olketa gun sellim go long nara sekson moa nomata sekson wea sellim firstaem no savve or letem diswan. Wanfala article insaed Arms Control Today hem sei: “Olketa gavman mas duim samting winim saport for katem daon wei for baem and sellim gun wea no fitim law, and tu for lukluk gud long part bilong olketa seleva for baem and sellim gun.” Nomata planti pipol hope olketa nation bae gogo katdaon long wei for baem and sellim olketa smol gun, wanfala niusman hem sei: “From faevfala main member bilong [United Nations security] council nao insaed wei for baem and sellim winim 80% bilong olketa gun long world, maet iumi shud no hae hope tumas.”
For join witim problem for kontrolem gogo bilong olketa smol gun and hae-paoa gun hem wei wea olketa gun hia isi nomoa for wakem. No olsem wei for wakem olketa machine for faet olsem tank, aeroplane, and warship wea samfala kantri nomoa duim, winim 300 company insaed samting olsem 50 nation nao wakem olketa hae-paoa gun. Bigfala namba bilong olketa company wea wakem gun mekem namba bilong olketa gun kamap big and tu hem mekem moa chance for supplyim olketa militant, olketa grup wea againstim gavman, and criminal organization.
Samting wea Kosim Staka Raoa
Kam kasem distaem, iumi bin storyim wei for iusim olketa smol gun insaed olketa kantri wea war go ahed. Bat, staka raoa kamap tu saed long wei for kontrolem gun long olketa kantri wea no eni war. Pipol wea saportim olketa law for kontrolem gun sei moa gun hem lead go for moa kill-kill. Olketa sei long United States, wea no strict tumas for kontrolem diswan and wea garem staka gun, namba bilong olketa kill-kill hem moa hae, bat long England, wea strict for kontrolem gun, namba bilong kill-kill hem smol. Pipol wea againstim olketa law saed long gun-kontrol sei long Switzerland planti pipol isi for kasem gun, bat wei for kill-kill hem no big.
For mekem diswan moa hard, olketa wea studyim diswan sei total bilong olketa kill-kill long United States wea no iusim gun hem moa hae winim total namba bilong olketa kill-kill long planti kantri long Europe. Nomata olsem, samfala nara kantri garem namba bilong kill-kill wea no iusim gun wea moa hae winim total namba bilong olketa kill-kill long United States.
Samting wea happen evritaem, hem for iusim—and iusim long rong wei—olketa namba for saportim wanfala tingting. And long subject bilong gun kontrol, hem luk olsem hao for evri point, narafala point wea luk olsem hem gud hem stap for againstim datwan. Olketa problem hia garem enikaen samting insaed. Bat, olketa savveman agree hao planti samting, witim wei for ownim gun, hem insaed long wei for kill-kill and raf fasin.
Strongfala National Rifle Association long United States talem disfala toktok staka taem: “Olketa gun no killim dae pipol; pipol nao killim dae pipol.” For fitim tingting hia, wanfala gun, nomata olketa wakem for kill, hem no kill seleva. Wanfala man nao mas pullim trigger, maet hem min for duim or from accident. Samfala no agree, olketa sei gun mekem hem moa isi for pipol killim dae pipol.
Hammerim Sword for Kamap Hou
Olsem Bible talem, bae hem hard for stretem problem bilong wei for killim dae pipol sapos iumi aotem nomoa olketa gun from pipol wea min for kill-kill. Crime hem wanfala problem bilong living, hem no problem wea kamap from man garem gun nomoa. Really ansa hem long wei for changem tingting and feeling bilong pipol. Spirit muvim profet Isaiah for raet olsem: “[God] bae judgem olketa nation and stretem planti pipol. And bae olketa mas hammerim sword bilong olketa for kamap hou and spia bilong olketa for kamap naef for katem tree. Nation bae no iusim sword againstim narafala nation, and olketa bae no lanem war moa.”—Isaiah 2:4.
Diswan hem no barava hard tumas olsem samfala maet tingim. Profesi bilong Isaiah hem fulfill distaem midolwan olketa trufala Christian evriwea long world. Wei wea olketa changem long tokpiksa wei samting for faet for kamap samting bilong peace, hem showimaot deep feeling for want for mekem God hapi and for stap long peace witim nara pipol. Gogo, anda long Kingdom bilong God, evriwan long earth bae stap long full peace and sef living. (Micah 4:3, 4) Olketa gun bae no killim pipol dae. Pipol bae no killim pipol dae. Olketa tul for kill-kill bae finis evribit.
[Olketa piksa long page 10]
‘Olketa bae hammerim sword bilong olketa for kamap hou’