Smol Gun, Big Problem

FOR planti year, toktok abaotem wei for kontrolem samting for faet hem abaotem olketa nuclear bomb. Iumi no sapraes long diswan, bikos wanfala nuclear bomb savve finisim wanfala full taon. Bat, no olsem olketa smol gun, pipol no iusim barava strong bomb olsem long war for winim 50 year finis.

Man for raetem history bilong army, John Keegan hem raet olsem: “Nuclear bomb no killim dae eniwan start kam long August 9, 1945. Planti long 50,000,000 pipol wea dae long olketa war start kam long datfala taem hem from olketa smol cheap gun nomoa, wea kost bilong olketa olsem smol radio wea pipol wakem tu long dat taem. Bikos olketa cheap gun no affectim laef bilong pipol long olketa rich kantri, bat only long olketa ples wea drug and terrorist saed long politik hem big, pipol long olketa rich kantri no luksavve long barava nogud samting wea kamaot from diswan.”

No eniwan really savve haomas smol gun and hae-paoa gun nao stap, bat olketa savveman sei olketa gun wea army savve iusim maet kasem 500 million. And tu, planti million rifle gun and hand gun stap wea pipol seleva ownim. Nara samting moa, pipol wakem and sellim olketa niu gun evri year.

Olketa Gun wea Pipol Laekem

Why nao pipol laek iusim olketa smol gun long olketa war wea just happen? Part long reason hem from wei wea raoa wea kamap hem join witim poor living. Planti long olketa war wea kamap insaed olketa year bilong 1990 happen long olketa kantri wea poor—poor tumas for baem niu kaen samting for faet. Olketa smol gun and hae-paoa gun cheap tumas. Olsem example, witim 250 million dollar, wea hem kost bilong wanfala aeroplane for faet, olketa savve baem 200,000 gun long datfala selen.

Samfala taem, man savve baem olketa smol gun and hae-paoa gun long price wea moa cheap winim datwan. Barava staka long olketa gun hia army givim nomoa long pipol taem olketa laek katdaon, or maet olketa pasim from wanfala faet go long narawan. Long samfala kantri staka tumas gun stap so olketa sellim for samting olsem thirti dollar nomoa or olketa changem for wanfala goat, kokorako, or wan bag second-hand kaleko.

Bat, winim wei wea olketa smol gun hia no kost big and planti stap, samfala nara reason tu stap why olketa laekem tumas. Olketa savve killim man dae. Wanfala hae-paoa gun savve sutim staka handred bullet insaed wan minute. Olketa isi for iusim and keepim tu. Pikinini wea ten year savve lane for pisisim and joinim bak wanfala hae-paoa gun. Pikinini savve kwiktaem lane tu for holem stret datfala gun and sut go long staka pipol.

Narafala reason why pipol laekem tumas olketa gun hem bikos olketa strong and savve waka for planti year. Olketa gun olsem AK-47 and M16, wea olketa soldia iusim long Vietnam War, pipol still iusim distaem. Samfala gun wea pipol iusim long Africa hem from World War I yet. And tu, hem isi tumas for karem and haedem olketa gun. Wanfala horse savve karem 12-fala gun go long wanfala militant grup wea stap long midol bush or farawe maunten. Wanfala sekson bilong olketa horse savve karem inaf gun for wanfala smol army.

Olketa Gun, Drug, and Diamond

Wei for baem and sellim olketa gun hem barava narawe. Olketa nation baem and sellim staka gun from nara nation long wei wea fitim law. Bihaen long Cold War, olketa army long East and West katdaon, and gavman givim or sellim olketa extra machine long olketa fren bilong olketa. Olsem woman for raet talem long Peace Research Institute long Oslo, Norway, start kam long 1995, United States nomoa givim awe samting olsem 300,000 rifle gun, hand gun, machine gun, and grenade gun. Olketa sei wei for givim awe olketa gun hem moa cheap winim wei for aotem evri part or keepim and protectim olketa. Samfala savveman wea studyim diswan sei kost bilong olketa smol gun and hae-paoa gun wea go from wan nation kasem narawan evri year long wei wea fitim law, hem maet samting olsem naen billion dollar.

Bat wei for baem and sellim wea no fitim law hem moa big. Olketa mas baem olketa blak-market gun. Long samfala kantri long Africa, olketa militant grup iusim planti handred million dollar for baem olketa smol gun and hae-paoa gun, no witim selen, bat witim olketa diamond wea olketa stealim from diamond-mining area. The New York Times hem sei: “Long ples wea olketa gavman raverave, olketa rebel no garem feeling for eniwan and hem isi nomoa for go thru long olketa border . . . Olketa diamond hia kamap samting wea kosim pipol for waka olsem slave, killim man dae, katem pipol, staka wea no garem haos and full kantri brekdaon saed long selen.” Hem barava nogud samting hao naesfala ston olsem wea olketa iusim for baem hae-paoa gun maet bihaen, olketa jewelry stoa sellim olsem wanfala saen bilong love for olowe wea garem hae price!

Olketa gun join tu witim wei for baem and sellim olketa drug. Hem wei bilong olketa criminal organization for tekem haed olketa drug go long wan ples and then tekem kam bak haed olketa gun. So olketa gun kamap olsem selen, wea olketa changem for drug.

Bihaen War Hem Finis

Taem war hem finis, planti taem olketa gun wea pipol bin iusim hem go long hand bilong olketa criminal nao. Tingim samting wea happen long wanfala kantri long south bilong Africa wea raf fasin saed long politik hem change for kamap raf fasin bilong olketa criminal. Raf fasin bilong politik killim dae samting olsem 10,000 pipol insaed thrifala year nomoa. Taem datfala war hem finis, raf fasin bilong olketa criminal hem kamap moa big. Wei for trae winim narawan midolwan olketa taxi draeva hem mekem olketa “taxi war” kamap, wea pipol haerem olketa criminal for sutim olketa passenger and draeva bilong olketa taxi company wea olketa raoa witim. Pipol iusim olketa hae-paoa gun bilong army for steal and nara criminal fasin. Namba bilong olketa wea killim dae narawan witim gun hem kasem 11,000 insaed wanfala year, mekem hem mek-tu kantri long world wea no insaed war bat staka pipol dae.

Taem pipol savve olketa criminal garem gun and olketa danger tumas, diswan mekem fraet and wei for no feel sef hem kamap. Long planti poor kantri, olketa wea rich stap insaed big haos wea garem strongfala security, wea wall and electric fence raonem and garem pipol wea security day and naet. Pipol wea stap insaed olketa rich kantri careful tu. Diswan hem tru nomata long olketa ples wea pipol insaed kantri no faetem each other.

So insaed olketa kantri wea war go ahed and wea “peace” hem stap, olketa gun kamap part long wei for no stap sef. No eni man savve markem nogud wei wea olketa gun affectim pipol, or iumi no savve kaontem namba wea dae, garekil, lusim samwan wea dae, and laef bilong pipol wea pisis. Nomata olsem, iumi savve world hem fulap witim olketa gun and namba go ahed for grow. Staka moa pipol go ahed for ask for samwan duim samting abaotem diswan. Bat wanem nao for duim? Wanem nao bae happen? Olketa kwestin hia nao bae iumi storyim long next article.

[Box/Piksa long page 7]

Man wea Faet Bifor Feel “Barava Stupid”

Wanfala boy soldia wea faet insaed sem war wea mekem pipol kamap refugee wea iumi storyim long first article hem seknomoa no garem eniting for duim and no garem eni selen insaed taon wea hem help for winim. Hem tok kros abaotem son bilong leader bilong hem wea draevem wanfala flash motorbike raonem taon and olketa bigman bilong war bifor wea trae hard for kasem paoa and trae winim narawan for kasem respect. “Taem mi tingim faevfala year wea mi stap insaed bush, killim dae pipol and pipol sutim mi, mi barava feel stupid,” boy hia talem. “Mifala givim laef bilong mifala for helpem pipol wea bihaen bae no rememberim hao nao olketa kasem hae position bilong olketa.”

[Credit Line]

KAVA and page 7: Boy soldia: Nanzer/Sipa Press

[Box/Piksa long page 8]

“No Eni Ples for Haed”

Hae-paoa gun bilong distaem, nomata hem savve killim man dae, hem garem spialaen. Hem iusim olketa bullet nomoa. Hem no savve killim dae pipol wea haed bihaen olketa strong wall. Taem soldia seksek long faet, maet hem no sut stret tumas. From man holem, hem savve sut stret only sapos hem stap 460 meter awe or moa klos.

U.S. army garem ansa for kaen “problem” olsem—wanfala niu, spesol gun wea fitim enikaen faet wea olketa kolem Objective Individual Combat Weapon (OICW). Hem fitim for wanfala soldia karem, and OICW bae sutim olketa bullet and tu olketa smol 20-millimeter bomb. Narafala spesol samting: Hem savve killim dae olketa enemy wea haed bihaen olketa hip graon. Samting wea soldia mas duim nomoa hem for pointim gun long ples antap or saed long target. Stretawe datfala gun markem hao far nao datfala target and hem sendem message go long smol bomb wea bae bosta long barava ples wea man targetim, and mekem staka smol pis metal sutim eniwan wea stap klosap. “Wei wea hem savve duim olketa samting hia bae mekem olketa U.S. soldia for sutsut nomata raonem olketa corner,” hem nao samting wea wanfala man wea toktok for datfala company wea wakem gun hia hem talem. Wanfala spesol laet bae mekem man wea iusim datfala gun savve sutsut stret long dark tu.

“No eni ples for haed” from disfala gun, hem nao samting wea olketa wea wakem tok praod abaotem, wea sei tu hao gun hia hem faev taem moa danger winim M16 and M203 grenade gun and savve sut tufala taem moa far. Olketa soldia wea iusim no need for wari for sut stret; olketa need for luk nomoa thru long ples for lukluk and pullim trigger for staka bullet and smol bomb for sut wantaem. Sapos wei for mekem diswan hem go ahed followim plan, first sekson bilong army bae garem OICW long year 2007.

Bat, pipol for tok againstim askem olketa kwestin olsem: Hao nao olketa bae iusim datfala gun taem olketa soldia go long ples wea olketa enemy stap midolwan staka pipol wea no insaed long faet? Wanem nao bae happen taem olketa sellim OICW long olketa army raonem world wea maet tan againstim pipol bilong olketa seleva? And wanem nao bae happen taem gun hia hem go long hand bilong olketa terrorist and criminal?

[Credit Line]

Alliant Techsystems

[Olketa piksa long page 6]

Planti taem olketa changem olketa smol gun and hae-paoa gun for olketa diamond and drug