Bigfala Fraet, Lelebet Hope
“EVRIWEA RAONEM MI OLKETA BUILDING SEKSEK AND FIRE BONE. TAEM MI RAN PIPOL EVRIWEA GO AHED FOR KRAE, PREA AND SINGAOT FOR HELP. MI TINGSE END BILONG WORLD HEM KAM NAO.”—G. R., SAMWAN WEA LAEF THRU LONG EARTHQUAKE.
EVRI year planti million earthquake happen insaed earth bilong iumi wea mumuv olowe. Hem tru, staka long olketa hia man no savve feelim.a Nomata olsem, samting olsem 140 earthquake evri year olketa “strong,” “strong fogud,” or “barava strong tumas.” Insaed history, olketa kaen earthquake olsem kosim planti million pipol for dae and kost bilong olketa property wea hem spoelem hem barava hae fogud.
Earthquake savve barava affectim tu feeling bilong olketa wea laef thru long hem. Olsem example, bihaen tufala earthquake sekem El Salvador long start bilong 2001, coordinator bilong mental-health komiti wea givim advaes for ministry bilong health long datfala kantri sei: “Pipol start for feisim olketa problem long mind wea showaot long wei for sorre, barava feel wiki and kros.” So iumi no sapraes hao olketa wea waka long health long El Salvador reportim hao namba bilong olketa wea kasem sik from feeling for sorre and wari hem 73-percent moa big. Tru nao, olketa survey showimaot hao insaed olketa relief camp, wanfala need bilong pipol wea mek-tu long need for wata, hem treatment for olketa problem long mind.
Bat story abaotem olketa earthquake hem no just abaotem dae, wei for distroe, and wei for wikdaon. Planti taem, olketa disaster olsem muvim pipol for showimaot barava spesol wei for kea and wei for sakrifaesim seleva. Tru nao, samfala barava waka hard for repairim olketa building wea brek and for helpem pipol deal witim samting wea kasem olketa. Olsem iumi bae lukim, kaen lelebet hope olsem hem go ahed for shaen nomata insaed taem bilong bigfala fraet.
[Footnote]
a Insaed diswan hem olketa barava smol earthquake, wea happen planti thousand taem evriday.
[Olketa piksa long page 2, 3]
Page 2 and 3: Long Athens, Greece, wanfala young woman barava krae and wari taem hem savve mami bilong hem still insaed building wea foldaon. Long semtaem, wanfala dadi hapi tumas for lukim dota bilong hem wea faev year wea olketa sevem
[Credit Line]
AP Photos/Dimitri Messinis