Olketa Bigfala Earthquake—Wat Nao Olketa Profesi lo Bible Talem?

Evri year, staka thousand earthquake happen. Staka earthquake hia olketa smol nomoa, bat samfala big tumas and distroem staka samting, mekem staka pipol safa, and killim dae staka pipol. Samfala earthquake kosim olketa tsunami wea distroem staka samting lo olketa area lo saed sea, and killim dae staka pipol wea stap lo there. Waswe, olketa profesi lo Bible storyim olketa bigfala earthquake hia?

Lo disfala article

• Waswe, Bible talem profesi abaotem olketa bigfala earthquake?

• Waswe, olketa earthquake wea happen distaem fulfillim olketa Bible profesi?

• Why nao iumi shud interest lo olketa Bible profesi abaotem olketa earthquake?

• Samfala rong idea wea pipol garem abaotem olketa Bible profesi and olketa earthquake

Waswe, Bible talem profesi abaotem olketa bigfala earthquake?

Lo wanfala profesi lo Bible, Jesus sei olketa earthquake bae happen. Iumi savve readim disfala profesi blo Jesus insaed lo thrifala difren buk lo Bible:

“Bae pipol long wanfala ples faetem pipol long nara ples and pipol long wanfala kantri faetem pipol long nara kantri. Olketa taem bilong bigfala hangre bae kasem plande pipol, and olketa earthquake bae sekem staka ples.”—Matthew 24:7.

“Bae pipol long wanfala ples faetem pipol long nara ples and pipol long wanfala kantri faetem pipol long nara kantri. Olketa earthquake bae sekem staka ples, and olketa taem bilong bigfala hangre bae kasem plande pipol.”—Mark 13:8.

“Olketa bigfala earthquake bae sekem staka ples, and olketa barava nogud sik and olketa taem bilong bigfala hangre bae kasem plande pipol.”—Luke 21:11.

So, datfala profesi blo Jesus sei “olketa bigfala earthquake” bae “sekem staka ples,” and diswan bae happen lo sem taem wea olketa war and faet, olketa taem blo bigfala hangre, and olketa nogud sik happen tu. Taem evri samting hia happen tugeta, datwan hem saen wea showimaot “world hem gogo for finis,” or hem taem wea Bible kolem lo “olketa last day.” (Matthew 24:3; 2 Timothy 3:1) Narafala profesi lo Bible markem taem wea “olketa last day” bae start, and profesi hia showimaot “olketa last day” start lo 1914 and no finis yet.

Waswe, olketa earthquake wea happen distaem fulfillim olketa Bible profesi?

Yes. Olketa samting wea Jesus talem lo datfala profesi abaotem olketa earthquake and olketa nara samting, hem happen lo taem blo iumi. Start kam lo 1914, winim 1,950 bigfala earthquake happen raonem world, wea killim dae winim 2 million pipol.a Tingim samfala example wea happen bihaen lo year 2000.

2004—Indian Ocean. Wanfala 9.1 magnitude earthquake kosim wanfala tsunami wea kasem 12-fala kantri and killim dae samting olsem 225,000 pipol.

2008—China. Wanfala 7.9 magnitude earthquake distroem olketa vilij and olketa taon, and olketa tingse diswan killim dae 90,000 pipol, mekem 375,000 pipol garekil, and distroem haos blo staka million pipol.

2010—Haiti. Wanfala 7.0 magnitude earthquake witim olketa nara strongfala earthquake bihaen, killim dae winim 300,000 pipol and distroem haos blo winim wan million pipol.

2011—Japan. Wanfala 9.0 magnitude earthquake, and olketa tsunami wea datwan kosim, killim dae samting olsem 18,500 pipol and mekem staka thousand pipol for displace. Datfala earthquake spoelem Fukushima paoa station, and kosim leak blo nuclear radiation wea danger tumas. Nomata tenfala year bihaen datfala accident, bat samting olsem 40,000 pipol no savve go bak lo haos blo olketa wea stap klosap lo datfala paoa station bikos lo datfala radiation.

Why nao iumi shud interest lo olketa Bible profesi abaotem olketa earthquake?

Olketa profesi lo Bible abaotem olketa earthquake helpem iumi for savve lo wanem hem klosap for happen klosap lo future. Jesus sei: “Taem iufala lukim olketa samting hia hem happen, iufala bae savve Kingdom bilong God hem klosap kam nao.”—Luke 21:31.

Bible hem sei Kingdom blo God hem wanfala really gavman wea stap lo heven, and Jesus Christ hem King lo datfala Kingdom. Diswan nao hem Kingdom wea Jesus teachim olketa disaepol blo hem for prea for hem.—Matthew 6:10.

Taem Kingdom blo God hem rul ovarem disfala earth, God bae stopem olketa natural disaster, wea minim olketa earthquake tu, mekem kaen samting olsem no savve spoelem pipol. (Aesaea 32:18) And tu, hem bae stretem evri nogud samting wea kamaot from olketa earthquake wea happen finis, wea affectim pipol lo physical wei and saed lo feeling. (Aesaea 65:17; Revelation 21:3, 4) Sapos iu laek lanem moa samting abaotem diswan, readim disfala English article “What Will God’s Kingdom Accomplish?”