Climate Change and Future blo Iumi—Wat Bible Talem

“Climate change hem barava spoelem iumi. Earth hem klosap nogud nao.”—The Guardian.

Iumi olketa man feisim bigfala problem bikos lo wat iumiseleva duim. Staka scientist agree hao samting wea iumi man duim nao hem kosim global warming. Wei wea temperature blo earth hem kamap moa hot hem changem climate and mekem staka disaster for happen. Samfala lo olketa nao diswan:

• Weather hem kamap moa worse and happen staka taem winim bifor, olsem olketa heat wave, drought, and storm, wea kosim staka flood and bush fire.

• Ice blo olketa glacier and lo Arctic hem melt.

• Sea level hem rise.

Climate change affectim evri ples lo earth. Wanfala report lo New York Times storyim situation wea happen lo 193 kantri. Hem sei: “Earth hem givim wanfala SOS signal for iumi.” Bikos climate change mekem staka for safa and dae, World Health Organization sei diswan hem “wanfala main problem saed lo health wea affectim iumi olketa man.”

Nomata olsem, iumi savve garem hope for future. Bible storyim finis olketa samting wea gohed for happen distaem, and tu hem storyim why iumi savve expectim God for duim samting and wat bae hem duim mekem iumi garem gud future.

Waswe, climate change fulfillim Bible profesi?

Yes. Wei wea global warming hem kosim climate change hem barava fitim wanem Bible talem abaotem taem blo iumi.

Profesi: “Long olketa last day bae hem barava difren and bae evri samting hem hard tumas. Pipol bae tingim olketa seleva nomoa, laekem tumas selen, . . . Olketa bae no savve tinghae, . . . and no willing for agree, . . . bighed, and praod tumas.”—2 Timothy 3:1-4.

Bible talem profesi abaotem olketa wei blo man and wat olketa duim kosim climate change for kamap. Gavman and olketa bisnis interest nomoa lo selen and no tingim gud samting for future genereson. Nomata taem olketa trae for waka tugeta, olketa no savve agree lo wat olketa need for duim for stopem global warming.

Disfala profesi showim iumi shud no expectim pipol for change wei blo olketa and for protectim earth. Bat, Bible storyim hao wei blo pipol for selfish “bae worse moa.”—2 Timothy 3:13.

Why iumi sure God bae duim samting

Bible talem hao Jehovaha God, Creator blo iumi, bae lukaftarem gud disfala earth and evri samting wea stap insaed. Tingim thrifala verse hia lo Bible wea showim wat God bae duim.

1. 1. God “no mekem disfala wol fo stap nating, hemi mekem fo pipol i stap long hem.”—Aesaea 45:18.

   God bae duim wanem hem planim for disfala earth. (Aesaea 55:11) Hem bae no letem for pipol distroem earth or for hem stap emti.

2. 2. “Olketa pipol wea i hambol, bae olketa onam lan wea [Jehovah] hemi bin promisim fo olketa. Bae olketa stretfala pipol i onam lan wea [Jehovah] hemi bin promisim fo olketa, an bae olketa stap long hem olowe.”—Sams 37:11, 29.

   God promisim dat olketa man bae stap lo earth for olowe and full earth bae garem peace.

3. 3. “Bae God hemi aotem . . . olketa ravis pipol.”—Provebs 2:22.

   God promis for finisim pipol wea gohed for duim olketa wicked samting and olketa wea spoelem earth tu.

Wat God bae duim for iumi lo future

Hao nao bae God fulfillim promis blo hem for disfala earth? Hem bae iusim Kingdom blo hem wea hem wanfala really gavman for rulim full world. (Matthew 6:10) Datfala Kingdom bae rul kam from heven. Hem no need for negotiate witim olketa gavman blo man abaotem earth and environment. Bikos Kingdom blo God bae finisim olketa gavman blo man.—Daniel 2:44.

Kingdom blo God bae mekem olketa gud samting for olketa man and for environment tu. (Sams 96:10-13) Lukim wat Jehovah God bae duim taem Kingdom blo hem rul.

• Mekem environment for gud bak

  Wat Bible talem: “Wanfala taem wea bae hemi kam, olketa drae eria bae i hapi tumas, an plande flaoa bae hemi grou long ples wea no eniwan hemi stap long hem.”—Aesaea 35:1.

  Wat bae happen lo future: Jehovah bae mekem earth for kamap gud moa, nomata lo olketa ples wea pipol barava spoelem.

• Savve kontrolem weather

  Wat Bible talem: “[Jehovah] stopem strong win ya, an hemi mekem si ya fo kuaet moa.”—Sams 107:29.

  Wat bae happen lo future: Jehovah garem paoa for kontrolem evri samting lo nature. Pipol bae no safa moa from olketa disaster wea happen from nogud weather.

• Teachim pipol for savve hao for lukaftarem gud earth

  Wat Bible talem: “Bae mi tisim yu olketa stretfala wei fo yu falom.”—Sams 32:8.

  Wat bae happen lo future: Jehovah givim olketa man responsibility for lukaftarem disfala earth. (Jenesis 1:28; 2:15) Hem bae teachim iumi hao for lukaftarem gud olketa samting wea hem creatim and for duim samting wea bae no spoelem environment.