Olketa Man Spoelem Earth—Wat Nao Bible Talem Abaotem Diswan?

“Wanem olketa man duim distaem bae kosim bigfala disaster saed lo climate. Wata bae flood lo olketa bigfala city. Temperature lo samfala ples bae hot winim enitaem bifor. Olketa bigfala storm bae happen. Staka pipol bae short lo wata. Staka million species blo plant and animal bae finis. Mi no ova tumas for talem diswan. Hem nao wanem olketa scientist sei bae happen sapos olketa gavman no changem olketa policy blo olketa saed lo energy.”—Wanfala speech blo António Guterres, secretary-general blo United Nations, abaotem Intergovernmental Panel on Climate Change report, wea kamaot lo April 4, 2022.

“Olketa scientist warnim iumi distaem abaotem olketa nogud samting wea bae happen lo klosap evri wan lo 423 national park [lo United States] bikos lo climate change. Diswan hem bikos hem isi for olketa hae temperature spoelem staka samting lo olketa national park hia. Olketa nogud samting wea savve happen, hem here olsem olketa disaster wea iumi savve read abaotem lo Bible: iumi bae lukim olketa fire and flood, ice bae melt, sea level bae rise, and olketa temperature bae hot tumas lo samfala ples.”—“Flooding Chaos in Yellowstone, a Sign of Crises to Come,” The New York Times, June 15, 2022.

Waswe, eniwan savve stretem olketa bigfala problem lo environment blo earth? Sapos olsem, hu nao savve stretem olketa problem hia? Tingim wanem Bible talem.

Bible sei olketa man bae spoelem environment

Bible hem sei God bae “finisim olketa wea spoelem earth.” (Revelation 11:18) Iumi lanem thrifala samting from disfala Bible verse:

1. 1. Samting wea olketa man duim bae barava spoelem earth.

2. 2. Olketa wea spoelem earth bae finis.

3. 3. God bae stretem olketa problem lo environment lo earth, no olketa man.

No eni samting bae spoelem earth

Bible hem sei “earth bae stap for olowe.” (Ecclesiastes 1:4) Pipol bae stap lo earth for olowe.

•  “Bae olketa stretfala pipol i onam lan wea [Jehovah] hemi bin promisim fo olketa, an bae olketa stap long hem olowe.”—Sams 37:29, SIPB.

God bae stretem evri nogud samting wea kasem earth mekem earth hem gud bak.

•  “Wanfala taem wea bae hemi kam, olketa drae eria bae i hapi tumas, an plande flaoa bae hemi grou long ples wea no eniwan hemi stap long hem.”—Aesaea 35:1, SIPB.