God Helpem King Hezekiah

WASWE, iu savve why nao disfala man hem prea long Jehovah? Why nao hem putim olketa leta hia front long altar bilong Jehovah? Disfala man hem Hez·e·kiʹah. Hem king bilong tufala tribe bilong Israel long south. And hem insaed bigfala trabol. Why nao olsem?

Bikos army bilong As·syrʹi·a spoelem evribit 10-fala tribe long north. Jehovah letem diswan for happen bikos olketa pipol hia nogud tumas. And distaem army bilong As·syrʹi·a kam for faet againstim datfala tu-tribe kingdom.

No longtaem go nomoa, King bilong As·syrʹi·a sendem samfala leta long King Hez·e·kiʹah. Olketa leta hia nao Hez·e·kiʹah putim front long God. Olketa leta hia mekfani long Jehovah, and talem Hez·e·kiʹah for givap. Dastawe, Hez·e·kiʹah prea olsem: ‘O Jehovah, sevem mifala from king bilong As·syrʹi·a. Then evri nation bae savve iu nomoa God.’ Waswe, bae Jehovah lisin long Hez·e·kiʹah?

Hez·e·kiʹah hem wanfala gud king. Hem no olsem olketa nogud king bilong 10-tribe kingdom bilong Israel, or olsem nogud dadi bilong hem Aʹhaz. Hez·e·kiʹah hem duim best for obeyim evri law bilong Jehovah. So, bihaen Hez·e·kiʹah hem prea finis, profet Isaiah sendem hem disfala message from Jehovah: ‘King bilong As·syrʹi·a bae no kam long Jerusalem. No eni soldia bilong hem bae kam klosap long hem tu. Olketa bae no sutim eni arrow long disfala taon.’

Lukim piksa long disfala page. Waswe, iu savve hu nao evri soldia hia wea dae finis? Olketa bilong As·syrʹi·a. Jehovah sendem angel bilong hem, and insaed long wanfala naet datfala angel killim dae 185,000 soldia bilong As·syrʹi·a. So king bilong As·syrʹi·a hem givap and go bak long hom bilong hem.

Tu-tribe kingdom hem stap sef nao, and olketa pipol kasem peace for lelebet taem. Bat bihaen Hez·e·kiʹah hem dae, son bilong hem Ma·nasʹseh kamap king. Ma·nasʹseh and son bilong hem Aʹmon wea rul bihaenem hem olketa nogud king. So datfala ples hem fulap moa witim criminal fasin and raf fasin. Taem olketa servant bilong King Aʹmon killim hem dae, son bilong hem Jo·siʹah kamap king bilong datfala tu-tribe kingdom.