Angel blo Jehovah Protectim Hezekiah

World Paoa blo Assyria tekovarem finis ten tribe kingdom blo Israel. And distaem, Sennacherib king blo Assyria, laek for tekovarem moa 2 tribe kingdom blo Judah. Hem start for tekovarem each wan lo olketa taon blo Judah. Bat taon wea hem laekem tumas nao Jerusalem. Sennacherib nating savve dat Jehovah hem protectim Jerusalem.

Hezekiah king blo Judah, givim staka selen lo Sennacherib mekem olketa no kam attakim Jerusalem. Nomata Sennacherib tekem finis datfala selen, hem still sendem olketa army blo hem for attakim Jerusalem. Pipol lo Jerusalem fraet tumas bikos army blo Assyria kakam klosap nao. Then Hezekiah talem olketa olsem: ‘Iufala no fraet. Army blo Assyria hem strong, bat Jehovah bae mekem iumi strong go moa winim olketa.’

Sennacherib sendem go messenger blo hem, datfala Rabshakeh, for mekfani lo pipol lo Jerusalem. Datfala Rabshakeh standap aotsaed lo taon hia and singaot olsem: ‘Hard for Jehovah helpem iufala. No letem Hezekiah trikim iufala. No eni god savve protectim iufala from mifala.’

Hezekiah askem Jehovah wat for duim and Jehovah sei lo hem: ‘Iufala no fraetem toktok wea Rabshakeh talem. Sennacherib bae no tekovarem Jerusalem.’ Bihaen, Hezekiah kasem samfala leta from Sennacherib. Olketa leta hia sei: ‘Iufala givap nomoa. Hard for Jehovah sevem iufala.’ Hezekiah prea olsem: ‘Plis Jehovah, sevem mifala, mekem evriwan savve dat iu nomoa only tru God.’ Jehovah talem hem: ‘King blo Assyria bae no kam insaed Jerusalem. Bae mi protectim taon blo mi.’

Lo tingting blo Sennacherib, bae hem tekovarem Jerusalem. Bat lo wanfala naet nomoa, Jehovah sendem wanfala angel lo camp blo olketa soldia hia wea stap aotsaed lo datfala taon. And angel hia killim dae 185,000 soldia! King Sennacherib lusim olketa strong man blo hem for faet. Hem no wei nao bikos hem lus, so hem go bak lo hom blo hem. Jehovah protectim Hezekiah and Jerusalem, olsem hem bin promisim. If iu stap lo Jerusalem lo datfala taem, hao bae iu trustim Jehovah?