Chapter 5
Freedom Wea Olketa Worshiper bilong Jehovah Enjoyim
1, 2. (a) Wanem kaen freedom nao God givim long first man and woman? (b) Talem samfela law wea guide-im samting wea they duim.
TAEM Jehovah create-im first man and woman, they enjoyim freedom wea winim any freedom man garem distaem. They garem Paradaes hom. No any sik spoelem laef wea they enjoyim. They no need for dae. But way for respectim olketa law bilong God hem wanfela important samting for keepim datfela freedom.
2 Maet God no talem samfela long olketa law hia, but God create-im Adam and Eve withim fashion for obeyim them. So taem they hangre they savvy they need for kaikai; taem they thirsty, they need for drink. Taem sun go daon, they laek for kasem rest and sleep. Jehovah story withim them tu, and givim them wanfela work olsem assignment. Datfela assignment hem wanfela law bikos hem bae guide-im samting wea they duim. But hem kaenfela and gudfela law! Law hia givim them work wea bae mekem them barava satisfy, and mekem them fit for use-im every bit tingting bilong them long gudfela way. They mas bornim pikinini, rul ovarem olketa animal long earth, and go-go they bae mekem Paradaes coverim whole earth. (Gen. 1:28; 2:15) God no talem them every samting wea they mas duim. They free for decide-im samfela samting. Waswe, they needim any samting moa?
3. Long wanem way nao Adam fit for use-im freedom bilong hem for decide-im samting long wisefela way?
3 Hem tru, taem Adam kasem privilege for decide-im samting, datwan no meanim any samting wea hem decide-im bae bringim gudfela samting. Freedom bilong hem for decide-im samting mekem hem garem responsibility tu. Hem savvy learn taem hem listen long Father bilong hem long heven and lukluk long olketa work bilong Hem, and God givim Adam savvy mekem hem fit for followim samting wea hem learnim. From God create-im Adam “long image bilong God,” Adam bae showim aot olketa fashion bilong God taem hem decide-im samting. Hem bae really careful for duim datwan sapos hem barava ting hae long samting wea God duim finis for hem and sapos hem want for mekem God hapi.—Gen. 1:26, 27; lukim John 8:29.
4. (a) Waswe, komand wea Jehovah givim Adam hem tek-aotem freedom bilong hem? (b) Why nao diswan hem wanfela law wea fitim?
4 For mekem hem rememberim way wea hem depend long Creator bilong hem and Man Wea Givim Laef, Jehovah givim disfela komand long hem: “From every tree bilong gaden yu savvy kaikai. But long datfela tree bilong savvy bilong gud samting and bad samting yu mas no kaikai long hem, from long day wea yu kaikai long hem yu mas dae.” (Gen. 2:16, 17) Waswe, datfela law tek-aotem freedom bilong man? No moa nao. Adam hem free for obey or no obey. Datfela law no givim any hevi. Hem garem staka samting for kaikaim nomata hem no kaikai from datfela wanfela tree. But, hem fit for luksavvy hao earth wea hem stap insaed, hem bilong God and olsem Creator, God nao fit for Rulim creation bilong hem.—Ps. 24:1, 10.
5. (a) Hao nao Adam and Eve lusim nambawan freedom wea they garem? (b) Wanem nao change-im freedom hia, and hao nao diswan affectim yumi?
5 But wanem nao happen? From selfish fashion, wanfela angel giamanim Eve taem hem mekem hemseleva olsem man wea talem trufela samting, hem talem Eve samting wea different from will bilong God. Winim way for obeyim Father bilong hem, Adam joinim Eve for no obey. From they tekem samting wea no bilong them, Adam and Eve lusim nambawan freedom wea they garem. Sin kamap master bilong them and, olsem God warnim them finis, they bae dae nao. So wanem nao happen long olketa pikinini bilong them? They sin, show aot fashion for duim rong samting wea they born withim, weak daon and easy for kasem sik and go-go they kamap olo. And dae tu. Way wea they born withim fashion for duim rong samting, and join withim power bilong Satan, mekem world wea living hem danger tumas hem kamap for everywan. Diswan hem different every bit from freedom wea God givim long olketa man firstaem!—Rom. 5:12; Job 14:1; Rev. 12:9.
Wea Yumi Savvy Faendem Freedom
6. (a) Long wea nao yumi savvy faendem really freedom? (b) Wanem kaen freedom nao Jesus story abaot long John 8:31, 32?
6 From every samting wea happen distaem, yumi no sapraes for lukim hao pipol they barava wantim moa freedom. But wea nao yumi savvy faendem really freedom? Jesus Kraest hem say: “Sapos yufela stap insaed long word bilong mi, yufela nao trufela disaepol bilong mi, and yufela bae savvy long truth, and truth bae mekem yufela kamap free.” (John 8:31, 32) Disfela freedom hem no freedom for lelebet taem wea olketa man hope for kasem taem they rejectim wanfela ruler bilong politik or wanfela gavman. But, diswan hem freedom from main problem bilong man. Samting Jesus story abaot hem freedom from sin, from way for slave long sin moa. (Lukim John 8:24, 34-36.) So sapos wanfela man kamap wanfela tru disaepol bilong Jesus Kraest, diswan mekem bigfela change kamap long laef bilong hem, hem kamap free.
7. (a) Long wanem way nao yumi savvy free from sin distaem? (b) For garem datfela freedom, wanem nao yumi mas duim?
7 Datwan no meanim olketa tru Kristian distaem no garem feeling for duim sin wea they born withim. No moa, they garem wanfela faet againstim diswan. (Rom. 7:21-25) But sapos man really live followim olketa teaching bilong Jesus, hem bae no slave bilong sin. Sin bae no olsem wanfela king wea givim olketa order for hem obeyim. Hem bae no garem living wea no garem any purpose and wea mekem hem garem no gud conscience. Hem bae enjoyim wanfela klinfela conscience front long God bikos God forgivim olketa sin wea hem duim bifor, long faondeson bilong sakrifaes bilong Kraest. But taem feeling for duim sin maet kamap, hem no want for followim datwan bikos hem tingim olketa klinfela teaching bilong Kraest, hem showim aot hao sin hem no master bilong hem.—Rom. 6:12-17.
8. (a) Wanem freedom moa trufela Kristian way givim yumi? (b) Hao nao diswan mas affectim tingting bilong yumi long olketa ruler bilong gavman?
8 Olsem olketa Kristian yumi enjoyim bigfela freedom. Yumi kamap free from olketa samting wea kam aot from olketa giaman teaching, free from way for slave long kastom and long sin. Olketa nambawan truth abaot samting wea happen long pipol wea dae finis and resurrection mekem yumi free from fashion for fraet tumas long no gud way for dae wea mekem olketa man no followim conscience bilong them. From yumi savvy raeteous Kingdom bilong God bae change-im olketa gavman bilong man wea no perfect, diswan mekem yumi free from way for no garem hope. But freedom olsem no meanim yumi fit for no obeyim law, or no show aot respect long olketa bigman bilong gavman from yumi say klosap nao disfela old system bae finis.—1 Pet. 2:16, 17; Titus 3:1, 2.
9. (a) Long loving way, hao nao Jehovah helpem yumi for enjoyim bigfela freedom distaem? (b) Taem yumi decide-im samting, hao nao yumi savvy show aot yumi barava meanim samting wea happen taem Adam use-im freedom bilong hem long rongfela way?
9 Jehovah no leavim yumi for traem olketa different kaen way bilong living for faend aot wanem way nao hem best. Hem savvy long yumi, wanem samting bae mekem yumi really satisfy and respectim yumi seleva, and wanem samting bae givim yumi gudfela samting for olawe. Hem savvy tu long schedule bilong hem for duim purpose bilong hem, there nao hem savvy long olketa work wea best for yumi share insaed. And tu, hem savvy long tingting and fashion wea savvy spoelem man or spoelem way wea hem fren withim other pipol, and wea maet stopem hem tu for kasem olketa blessing bilong Kingdom bilong God. Long loving way hem talem yumi olketa samting hia thru long Bible and organization bilong hem long earth. (Gal. 5:19-23; Mark 13:10; lukim 1 Timothy 1:12, 13.) Then hem saed bilong yumi nao, for use-im free will wea God givim, for decide-im wanem samting yumi bae duim. Sapos yumi really ting strong long samting Bible talem yumi abaot hao Adam lusim freedom wea God givim long olketa man firstaem, yumi bae decide-im samting long wisefela way. Yumi bae showim hao way for barava fren gud withim Jehovah hem main samting long laef bilong yumi.
Barava Wantim Narafela Kaen Freedom
10. Wanem kaen freedom nao samfela wea say they Kristian they trae hard for kasem?
10 Samfela taem samfela young wan wea grow ap kam olsem Jehovah’s Witness, and samfela wea no young tumas, they wantim narafela kaen freedom. World maet luk nice tumas, and taem they tingting abaotem everytaem, feeling for duim samting wea pipol bilong world duim hem kamap strong. They maet no ting for use-im drug, drink tumas or duim fornication. But they start for spendem taem bihaen long skul or bihaen long taem for work withim pipol bilong world. From they wantim olketa niufela fren bilong them hia for acceptim them, they start for followim toktok and fashion bilong them.—3 John 11.
11. Long samfela taem, wea nao test for duim diswan hem kam from?
11 Samfela taem test for followim fashion bilong world hem kam from narafela man wea say hem servim Jehovah. Datwan nao samting wea happen long Eden taem Satan giamanim Eve, and then Eve hem pullim Adam for followim hem. Hem happen tu midlwan long olketa firstfela Kristian, and long taem bilong yumi. Planti taem olketa man olsem love-im samting wea mekem them feel gud and they barava wantim samting wea mekem bigfela hapi kamap. They pullim other pipol for “havem hapitaem.” They ‘promisim freedom, but olketa seleva they slave bilong badfela samting.’—2 Pet. 2:18, 19.
12. (a) Wanem nao no gud samting wea kamap from fashion bilong world? (b) Nomata olketa wea duim they savvy samting wea bae happen, why nao they go ahed for duim olketa samting olsem?
12 Fruit bilong diswan hem no gud. Dirty fashion hem spoelem man long saed bilong feeling. Hem savvy lead go for sik tu, way for babule nating and maet marit hem brek daon. (Prov. 6:32-35; 1 Cor. 6:18; 1 Thess. 4:3-8) Way for use-im drug savvy mekem man feel no gud, no toktok gud, no lukluk gud, hed hem raon, man no savvy tek wind gud, badfela dream and dae. (Lukim Proverbs 23:29-35.) Maet man hem hard for lusim fashion olsem, wea savvy lead go long fashion for brekem law mekem hem savvy go ahed for duim diswan. Planti taem olketa wea duim dis kaen samting savvy wanem nao bae happen. But from they barava wantim samting wea bae mekem them feel gud, they shutim mind bilong them for no tingim samting wea bae kamap from diswan. They say hem nao freedom, but they faend aot, taem hem tu late, hao they slave bilong sin, and sin hem no gud master! Way for tingting raonem diswan distaem savvy helpem yumi for no kasem samting olsem.—Gal. 6:7, 8.
Start bilong Olketa Problem
13. (a) Hao nao olketa samting wea yumi barava wantim wea lead go long olketa problem hia they start? (b) For meanim wanem nao “way for kampani withim badfela pipol,” tingting bilong hu nao yumi needim? (c) Taem yu answerim olketa question long end bilong paragraf, mek hae long tingting bilong Jehovah. Answerim wanfela question each taem.
13 Stop and ting abaot wea nao olketa problem hia they start. Bible say olsem: “Each wan hem garem test, from samting wea hemseleva wantim hem pullim and sweetim hem. Bihaen, taem samting wea man wantim hem ready nao, hem bornim sin; bihaen, sin, taem hem fulfill, hem bringim kam dae.” (Jas. 1:14, 15) But wanem nao muvim man for wantim olketa samting hia? Samting wea go ahed insaed long mind bilong hem, and planti taem diswan hem kamap from way for kampani withim pipol wea no followim olketa Bible principle. Hem tru, yumi everywan savvy yumi mas stap klia long “way for kampani withim badfela pipol.” But question hem olsem, Hu nao badfela pipol for kampani withim? Hao nao Jehovah ting long diswan? Way for meanim olketa question and scripture long daon bae helpem yumi for kasem olketa stretfela answer.
Sapos luk olsem samfela pipol garem gudfela fashion, waswe, datwan meanim they gudfela pipol for kampani withim? (Lukim Genesis 34:1, 2, 18, 19.)
Waswe, maet story bilong them, samting wea they mek funny long hem, show aot sapos yumi barava kampani withim them or no moa? (Eph. 5:3, 4)
Waswe, yumi need for worry sapos they no believim sem samting abaot purpose bilong God olsem yumi? (Lukim 1 Corinthians 15:12, 32, 33.)
Hao nao feeling bilong Jehovah sapos yumi choose for kampani withim pipol wea no love-im hem? (Lukim 2 Chronicles 19:1, 2.)
Nomata yumi maet work withim pipol wea no believe or go long skul withim them, hao nao yumi savvy show aot yumi no choose for kampani withim them? (1 Pet. 4:3, 4)
Way for lukluk long television and readim olketa buk, magasin and niuspepa they olketa way for kampani withim other pipol. Wanem kaen samting wea stap insaed every samting hia nao yumi need for barava lukaot long hem distaem? (Prov. 3:31; Isa. 8:19; Eph. 4:17-19)
Way wea yumi choosim pipol for kampani withim, hem showim wanem samting long Jehovah long saed long fashion bilong yumi? (Ps. 26:1, 4, 5; 97:10)
14. Wanem nambawan freedom stap front long olketa wea faithful for followim kaonsel bilong Word bilong God distaem?
14 Niu World bilong God barava stap front long yumi. Thru long Kingdom bilong Hem olketa man bae kamap free from way for slave and stap under long power bilong Satan and whole badfela system bilong hem. Go-go samting wea kamap from sin bae finis from olketa man. Laef olawe long Paradaes bae stap front long them. Every creation bae enjoyim freedom wea wan mind every bit withim “spirit bilong Jehovah.” (2 Cor. 3:17) Waswe, hem stret for stap long danger for lusim every samting hia from yumi no ting hevi long kaonsel bilong Word bilong God distaem? Taem yumi use-im Kristian freedom bilong yumi distaem, letem yumi everywan barava show aot yumi really wantim “datfela nambawan freedom bilong olketa pikinini bilong God.”—Rom. 8:21.
Samting for Review
● Wanem kaen freedom nao first man and woman enjoyim? Hao nao datwan hem different from samting wea olketa man kasem distaem?
● Long way wea different from world, wanem freedom nao olketa tru Kristian garem? Hao nao they fit for garem diswan?
● Wanem samting nao kasem olketa wea lukaotem freedom bilong world?
● Why nao hem barava important for stap klia long “way for kampani withim badfela pipol”? No olsem Adam, yumi agree withim samting wea hu nao decide-im hem badfela samting?