Chapter 6
Question Wea Stap Front long Whole Creation
1. (a) Wanem question nao Satan mekem kamap long Eden? (b) Hao nao question hia kamap from samting wea hem talem?
TAEM way for againstim God hem kamap long Eden, wanfela important question wea affectim whole creation hem kamap. Satan hem go long Eve and say hem and hasband bilong hem they nating kasem samting wea they fit for kasem. Hem ask olsem: “Waswe, hem really tru God nao talem yu for no kaikai from every tree bilong gaden?” Eve hem say God tok olsem abaotem only wanfela tree: “Yu mas no kaikai from hem, no moa, yu mas no touchim, mekem yu no savvy dae.” Taem hem herem datwan hem barava say Jehovah hem liar, hem say laef bilong Eve or Adam no depend long way for obey long God. Hem say God holdim back gudfela samting from olketa samting wea hem create-im—way for choosim seleva samting wea they want for duim long laef bilong them. “Yu bae nating dae,” Satan hem say. “From God hem savvy long day wea yu kaikai long hem, eye bilong yu bae open and yu bae kamap olsem God, savvy long gud samting and bad samting.” (Gen. 3:1-5) Satan mekem Eve believe hem bae kasem beta samting sapos hem decide-im samting seleva. From datwan, Satan challenge-im way wea God fit for rul and way bilong Hem for rul. Question wea kamap hem abaot hu nao fit for rulim universe.
2. Wanem samting nao fit for protectim Adam and Eve?
2 Love for Jehovah fit for protectim Eve. Respect for hedship bilong hasband bilong hem tu savvy holdim hem back for no duim rong samting. But hem tingim nomoa samting wea luk olsem bae givim hem gudfela samting kwiktaem. Samting wea tambu for hem, kamap samting wea hem barava wantim. From hem barava believim samting wea Satan talem, hem brekem law bilong God nao. Then hem mekem Adam joinim hem. Nomata liar bilong Satan no giamanim hem, hem tu, show aot hem barava nating ting hae long love bilong God. Hem nating ting hae long hedship bilong Jehovah and hem choose for saed withim waef bilong hem wea againstim God.—Gen. 3:6; 1 Tim. 2:13, 14.
3. (a) Wanem question moa hem join withim attack bilong Satan abaot rul bilong Jehovah? (b) Hem affectim hu nao?
3 Way wea Satan attackim rul bilong Jehovah hem no finis long Eden. Bihaen hem win long datfela taem hem askim question moa abaotem loyal fashion bilong other pipol long Jehovah. So diswan, kamap mek-tu question wea join withim first wan. Hem challenge-im olketa pikinini bilong Adam and olketa spirit son bilong God, and firstborn Son bilong Jehovah wea hem love-im tumas tu. Long taem bilong Job, Satan say olketa wea servim Jehovah they duim olsem, no from they love-im God and way bilong hem for rul, but from they selfish. Hem say, taem they kasem hardfela taem, they bae choosim selfish samting wea body wantim. Waswe, hem tok stret?—Job 1:6-12; 2:1-6; Rev. 12:10.
Hao They Answerim Datfela Question
4. Why nao planti pipol no mek hae long rul bilong Jehovah?
4 Jehovah savvy samfela moa bae joinim Satan for againstim hem. Tru nao, taem hem talemaot judgment long Eden, God story abaot olketa wea bae insaed long ‘seed bilong snek.’ (Gen. 3:15) Judas Iscariot and olketa Farisi wea planim way for killim dae Jesus, wea denyim Kraest, they midlwan long olketa hia. They no duim rong samting from they no savvy abaotem. They savvy samting wea stret, but they mean for duim samting wea againstim Jehovah and olketa servant bilong hem. But, planti other pipol wea no followim olketa mark bilong Jehovah they duim samting from they no savvy.—Acts 17:29, 30.
5. (a) No olsem Eve, hao nao olketa wea loyal long Jehovah ting abaotem word bilong hem? (b) Hao nao Noah prove-im loyal fashion bilong hem, and hao nao example bilong hem savvy helpem yumi?
5 Long way wea different every bit, samfela man and woman wea garem faith wea learn abaot Creator bilong them they prove-im loyal fashion bilong them for hem olsem Sovereign. They believim God. They savvy laef bilong them depend long way for listen and obeyim hem. Noah hem wanfela man olsem. So, taem God say long Noah, “End bilong every man hem kam front long mi. . . Mekem wanfela ark for yuseleva,” Noah followim samting wea Jehovah talem hem for duim. Other pipol long datfela taem, nomata they herem warning, they go ahed long everyday living bilong them olsem no moa any big samting bae happen. But Noah buildim barava bigfela ark and go ahed for busy for preach long other pipol abaot olketa raeteous way bilong Jehovah. Olsem Bible talem, “Noah go ahed for duim every samting wea God komandim hem for duim. Hem barava duim olsem.”—Gen. 6:13-22; lukim tu Hebrews 11:7 and 2 Peter 2:5.
6. (a) Wanem moa show aot klia midlwan long pipol wea keepim faithful fashion? (b) Hao nao Sarah showim aot olketa fashion olsem, and long wanem way nao example bilong hem savvy helpem yumi?
6 Way for ting hae long principle bilong hedship, wea join withim love for Jehovah, hem tu samting wea show aot klia midlwan long olketa wea show aot faithful fashion. They no olsem Eve, wea duim samting but no askim hasband bilong hem. Or no olsem Adam, wea no want for followim law bilong Jehovah. Sarah, waef bilong Abraham, showim aot olketa nambawan fashion olsem. No long toktok nomoa, but long heart bilong hem tu, Abraham hem “lord” bilong hem. And tu, hemseleva love-im Jehovah and hem wanfela woman bilong faith. Withim Abraham, hem “wait for disfela taon [Kingdom bilong God] wea garem trufela faondeson, taon wea God nao buildim and workim.”—1 Pet. 3:5, 6; Heb. 11:10-16.
7. (a) Long wanem way nao Moses hem mek hae long rul bilong Jehovah? (b) Hao nao example bilong hem savvy helpem yumi?
7 Samting olsem 430 year bihaen Abraham leavim hom bilong hem, Moses mek hae long rul bilong Jehovah front long Pharaoh bilong Egypt. Moses no duim diswan from hem trustim hemseleva. Hem daotem way wea hem fit for toktok gudfela or no moa. But hem obeyim Jehovah. Withim support bilong Jehovah and help from brata bilong hem Aaron, Moses go ahed for talem toktok bilong Jehovah long Pharaoh. Pharaoh hem bighed. Samfela long olketa son bilong Israel tu they tok strong againstim Moses. But withim loyal fashion, Moses duim every samting wea Jehovah komandim hem for duim, and thru long hem God bringim Israel aot from Egypt.—Ex. 7:6; 12:50, 51.
8. (a) Wanem nao show aot loyal fashion long Jehovah meanim moa samting winim way for duim samting wea God raetem nomoa? (b) Hao nao way for ting hae long dis kaen loyal fashion helpem yumi for followim 1 John 2:15?
8 Olketa wea loyal long Jehovah they no garem tingting for say they only need for followim law, or for obeyim nomoa samting wea God raetem finis. Taem waef bilong Potiphar trae for sweetim Joseph for duim adultery withim hem, no any komand wea God raetem wea tambuim adultery hem stap. But long faondeson bilong samting wea Joseph savvy abaot marit arrangement wea Jehovah startim long Eden, hem savvy way for havem sex withim waef bilong narafela man hem samting wea God bae no hapi long hem. Joseph hem no laek for testim sapos God letem hem duim fashion olsem olketa long Egypt. Hem mek hae long olketa way bilong Jehovah long way wea hem tingting raonem hao God deal withim olketa man and then hem strong for duim samting wea hem luksavvy hem will bilong God.—Gen. 39:7-12; lukim Psalm 77:11, 12.
9. Wanem nao show aot Devil hem wanfela liar long question wea hem askim long taem bilong Job?
9 Nomata sapos they kasem bigfela test, olketa wea barava savvy gud long Jehovah bae no tanawe from hem. Satan hem say sapos Job lusim every material samting bilong hem or kasem no gud samting long body, nomata Jehovah talem gudfela toktok abaotem hem, hem bae lusim God. But Job prove-im Devil hem wanfela liar, and hem duim diswan nomata hem nating savvy why nao hem kasem every trabel olsem. (Job 2:3, 9, 10) From hem still want for prove-im saed bilong hem, Satan mekem wanfela king bilong Babylon wea kros for gud for talem threefela young Hebrew hao they bae dae long fire sapos they no bow daon for worshipim wanfela image wea disfela King hem workim. From they mas choose nao for obeyim komand bilong King or law bilong Jehovah againstim fashion for worshipim idol, they barava showim aot klia hao they servim Jehovah and Hem nao Sovereign Ruler bilong them. They ting moa hae long faithful fashion bilong them for God winim laef bilong themseleva.—Dan. 3:14-18.
10. Hao nao yumi olketa man wea no perfect fit for prove-im yumi barava loyal long Jehovah?
10 Waswe, diswan show aot man mas perfect bifor hem fit for loyal long Jehovah, and man wea mekem mistek hem barava fail nao? No moa nao! Bible hem talem stret olketa taem wea Moses hem duim rong samting. Jehovah hem no hapi, but hem no rejectim Moses. Olketa aposol, nomata they showim aot gudfela example long planti samting, they garem olketa weak point bilong them tu. Loyal fashion meanim way for obey from heart. But, from hem savvy yumi no perfect taem yumi born, Jehovah hem hapi sapos yumi no meanim for no followim will bilong hem long any samting. Sapos, yumi duim rong samting from hem weak point bilong yumi, hem barava important for yumi really repent and no go ahed for duim moa. There nao yumi show aot yumi barava love-im samting wea Jehovah talem hem stret and hate-im samting wea hem say hem no gud. Long faondeson bilong faith bilong yumi long sakrifaes bilong Jesus wea savvy coverim sin, yumi savvy enjoyim way for stap klin front long God.—Amos 5:15; Acts 3:19; Heb. 9:14.
11. (a) Hu nao showim aot perfect way for love-im God, and wanem nao diswan prove-im? (b) Hao nao samting wea hem duim helpem yumi?
11 But waswe, olketa man no fit for love-im God long perfect way? For samting olsem 4,000 year answer bilong diswan hem wanfela “holy secret.” (1 Tim. 3:16) Nomata Adam hem perfect, hem no showim aot perfect example bilong fashion for love-im God. Hu nao fit for duim? Olketa pikinini bilong hem wea no perfect they no fit for duim tu. Jesus Kraest nomoa man wea fit for duim. Samting wea Jesus duim prove-im Adam, wea garem beta living, hem fit for keepim faithful fashion sapos hem want for duim. No any samting hem rong withim creation bilong God. So, yumi want for followim example bilong Jesus Kraest long way for obeyim law bilong God and tu for love-im Jehovah, Sovereign bilong Universe.
WANEM NAO ANSWER BILONG YUMI EACH WAN?
12. Why nao yumi mas lukaot gud everytaem long tingting bilong yumi abaot rul bilong Jehovah?
12 Each wan long yumi mas face-im disfela question wea affectim whole universe. Yumi kanduit for ranawe from hem. Sapos yumi talem klia yumi stap long saed bilong Jehovah, Satan hem markem yumi nao. Hem mekem hevi kamap long any kaen different way and hem bae go ahed for duim olsem go kasem end bilong disfela badfela system bilong hem. Yumi mas no slack daon long way for lukaot gud. (1 Pet. 5:8) Fashion bilong yumi showim aot hu nao yumi saed withim long disfela important question.
13. (a) Wanem samting abaot start bilong fashion for liar and steal mas mekem yumi stap klia long them? (b) Answerim each question wea stap long end bilong disfela paragraf abaot samfela samting wea savvy mekem pipol duim rong samting.
13 Yumi mas nating ting long fashion for no loyal olsem samting wea no important bikos hem tingting wea big tumas long world. Way for keepim faithful fashion meanim yumi mas followim olketa raeteous way bilong Jehovah long every samting bilong living. For example, tingim olketa samting hia:
(1) Satan use-im wanfela liar for leadim first dadi and mami bilong yumi for duim sin. Hem kamap “dadi bilong liar.” (John 8:44)
Long wanem taem nao young pipol they fail samfela taem for talem trufela samting long dadi and mami bilong them? Why nao hem important for olketa young Kristian for stap klia long diswan? (Prov. 6:16-19)
Wanem kaen way for duim bisnis nao savvy mekem man join withim “dadi bilong liar” but no withim God bilong truth? (Mic. 6:11, 12)
Sapos yumi talem samting wea no really tru for apim yumi seleva, waswe, hem rong sapos hem no spoelem anywan? (Ps. 119:163; lukim Acts 5:1-11.)
Sapos samwan hem duim bigfela rong, why nao hem important for no trae for coverim withim liar toktok? (Prov. 28:13)
(2) Taem Eve and then Adam decide seleva samting wea gudfela and badfela wea Satan encouragim them for duim, first samting wea they duim hem for tekem wanem hem no bilong them. They kamap pipol for steal nao.
Waswe, hem stret for steal sapos man hem needim datfela samting or sapos dat wan wea hem steal from hem garem staka samting? (Prov. 6:30, 31; 1 Pet. 4:15)
Waswe, hem olraet nomoa sapos hem samting wea pipol duim everytaem long ples bilong yumi or sapos samting wea yumi tekem hem small nomoa? (Rom. 12:2; Eph. 4:28; Luke 16:10)
14, 15. (a) Long end bilong Wan Thousand Year Rul bilong Kraest, wanem test nao bae kasem every man? (b) Hao nao samting wea yumi duim distaem affectim samting wea bae happen long yumi long datfela taem?
14 Insaed long Wan Thousand Year Rul bilong Kraest, Satan and olketa demon bilong hem bae stap long hol wea deep tumas, they bae no fit for spoelem olketa man. Datwan bae gud tumas! But bihaen long datfela wan thousand year, they bae kamap free for lelebet taem. Satan and olketa wea followim hem bae putim hevi long “olketa holy wan,” olketa perfect man wea go ahed for keepim faithful fashion bilong them. Hem bae kam againstim “taon wea God love-im tumas,” datfela Niu Jerusalem long heven, taem hem trae for aotem raeteous fashion wea hem bringim long earth.—Rev. 20:7-10.
15 Olsem hem duim bifor, hem luk olsem Satan bae use-im liar toktok, and selfish and proud fashion for trae for pullim olketa man for duim samting wea no loyal long Jehovah. Sapos yumi garem privilege for laef long datfela taem, wanem nao yumi seleva bae duim? Heart bilong yumi bae stap long saed bilong hu nao long disfela question abaot hu nao fit for rul? From every man bae perfect long datfela taem, sapos man duim any samting wea no loyal, diswan hem samting wea hem mean for duim and hem mas dae olawe nao. So for yumi savvy stap loyal long datfela taem, hem barava important for yumi mekem grow fashion for willing for followim samting wea Jehovah talem yumi for duim distaem, maet thru long Word bilong hem or thru long organization bilong hem! Taem yumi duim olsem, yumi showim aot way wea yumi barava love-im hem olsem Sovereign bilong Universe.
Samting for Review
● Wanem nao bigfela question wea stap front long whole creation? Hao nao yumi insaed long hem?
● Wanem nao show aot klia abaot way wea each wan long olketa man and woman long page 49 they faithful long Jehovah?
● Why nao hem important for yumi mas lukaot gud everyday for honorim Jehovah long fashion bilong yumi?
[Piksa long page 49]
THEY MEK HAE LONG RUL BILONG JEHOVAH
Noah
Sarah
Moses
Joseph
Job
Hao Nao Example bilong Them Savvy Helpem Yumi?