Chapter 7

Samting Yumi Learnim From God Letem Bad Fashion Stap

1. (a) Sapos Jehovah hem kwiktaem killim dae tufela long taem wea they againstim hem long Eden, hao nao datwan bae affectim yumi? (b) But, wanem loving samting nao Jehovah provide-im for yumi?

NOMATA yumi kasem planti hardfela samting long living, way wea yumi born kam hem no rong bilong God. Hem mekem first man and woman long perfect way and givim them Paradaes olsem hom bilong them. Sapos hem kwiktaem killim them dae taem they againstim hem, no anywan bae stap distaem withim sik, way for poor and bad fashion. But, long way bilong mercy, Jehovah letem Adam and Eve for garem famili bifor they dae, nomata olketa hia bae no perfect taem they born. Thru long Kraest, hem provide-im samting for olketa pikinini bilong Adam wea garem faith for kasem samting wea Adam lusim—laef olawe wea they savvy barava enjoyim living.—Deut. 32:4, 5; John 10:10.

2. Waswe, every samting hia hem for sevem yumi nomoa?

² Yumi kasem staka gudfela samting from diswan. But Bible talem yumi samting wea moa important hem insaed long diswan, winim way wea yumi seleva kasem laef.

FOR Nambawan Nem bilong Hem

3. Wanem nao insaed long way wea purpose bilong Jehovah for earth and olketa man mas fulfill?

³ Nem bilong Jehovah olsem Sovereign bilong Universe and God bilong truth, hem insaed long way wea purpose bilong hem for disfela earth and olketa man mas fulfill. From Jehovah garem bigfela position, everywan long universe mas barava respectim nem bilong hem and obeyim hem mekem they savvy kasem peace and gudfela living.

4. Wanem samting nao insaed long datfela purpose?

⁴ Bihaen hem create-im Adam and Eve, hem givim them wanfela work for duim. Hem talemaot klia hao purpose bilong hem no only for they bossim whole earth, mekem Paradaes kamap moa big, but for firstfela man and woman, Adam and Eve for fulimap withim olketa pikinini bilong them. (Gen. 1:28) Waswe, disfela purpose bae fail from sin bilong them, wea bae bringim shame long nem bilong God?

5. (a) Olsem Genesis 2:17 talem, wanem taem nao man wea kaikai from tree bilong savvy bilong gudfela and badfela samting bae dae? (b) Hao nao Jehovah fulfillim datwan, and long sem taem letem purpose bilong hem for fulimap earth go ahed?

⁵ Jehovah warnim Adam taem hem say sapos hem no obey and kaikai from datfela tree bilong savvy bilong gudfela and badfela samting, hem bae dae “long day” wea hem kaikaim. (Gen. 2:17) For fitim samting wea God talem, long sem day wea Adam sin Jehovah askim answer from tufela hia wea sin and talemaot judgment bilong dae for tufela. They kanduit for misstim datfela panis. For fitim justice, long eye bilong Jehovah, Adam and Eve dae long datfela day. (Lukim Luke 20:37, 38.) But for mekem hem fulfillim purpose bilong hem for fulimap disfela earth, Jehovah letem them for garem wanfela famili bifor they dae long really way. But, from 1,000 year long eye bilong God hem olsem wanfela day nomoa, taem Adam dae long mek-930 year bilong hem, diswan hem insaed long wanfela “day.” (Gen. 5:3-5; lukim Psalm 90:4; 2 Peter 3:8.) So diswan mek hae long way wea Jehovah tok tru abaot taem wea they bae kasem panis, and purpose bilong hem for fulimap disfela earth withim olketa pikinini bilong Adam hem no fail. But diswan meanim, for lelebet taem, hem bae letem pipol wea garem sin for stap laef.

6, 7. (a) Wanem nao Exodus 9:15, 16 showim aot abaot why Jehovah letem badfela samting go ahed for lelebet taem? (b) Long taem bilong Pharaoh, hao nao power bilong Jehovah show aot, and hao nao pipol savvy long nem bilong Hem? (c) So wanem nao bae happen long end bilong disfela badfela system?

⁶ Samting wea Jehovah talem long ruler bilong Egypt long taem bilong Moses show aot moa why God letem badfela samting go ahed. Taem Pharaoh stopem olketa son bilong Israel for lusim Egypt, Jehovah no killim hem dae sem taem. Datfela ples kasem tenfela trabel, wea show aot power bilong Jehovah long olketa different and spesel way. Taem hem givim warning abaot mek-seven trabel, Jehovah talem Pharaoh hao hem fit for finisim every bit Pharaoh and pipol bilong hem from earth. “But,” Jehovah hem say, “mi letem yu stap for disfela samting, for showim yu power bilong mi and for mekem everywan savvy long nem bilong mi long every ples long earth.”—Ex. 9:15, 16.

⁷ Taem Jehovah sevem Israel, planti pipol savvy long nem bilong hem. Distaem, klosap 3,500 year bihaen, pipol no forgetim samting wea hem duim. They talemaot nem bilong Jehovah, and tu, truth abaotem dat Wan wea garem datfela nem. Diswan showim aot Jehovah olsem wanfela God wea keepim olketa covenant bilong hem and duim samting for olketa servant bilong hem. Hem showim aot from olmaeti power bilong hem hao no any samting savvy stopem purpose bilong hem. Samting wea moa big hem taem wea disfela badfela system bae klosap for finis every bit, sekson wea yumi savvy lukim and no lukim. Datfela taem wea olmaeti power bae show aot klia and nem bilong Jehovah kasem glory hem samting wea no anywan bae forgetim long history bilong disfela universe. Gudfela samting wea hem bae givim bae no savvy finis!—Ezek. 38:23; Rev. 19:1, 2.

‘O Wisdom bilong God Hem Deep Tumas!’

8. Wanem nao samfela samting moa wea Paul encouragim yumi for tingim?

⁸ Taem hem raetem leta long olketa long Rome, aposol Paul askim disfela question: “Waswe, God hem no showim aot justice any taem?” Answer bilong hem mek hae long mercy bilong God and hem story abaot samting wea Jehovah talem long Pharaoh. Hem say tu hao yumi olketa man olsem clay long hand bilong man wea workim olketa pot for kuk. Waswe, clay hem complain abaot way wea they use-im hem? Paul say moa: “So, sapos God, nomata hem fit for show aot kros bilong hem mekem pipol savvy long power bilong hem, hem long-suffering long olketa dish bilong kros wea fit for finis every bit, mekem hem savvy show aot richfela samting bilong glory bilong hem long olketa dish bilong mercy, wea hem prepare-im firstaem for kasem glory, hem nao yumi, wea hem kolem aot no from olketa Jew nomoa, but from olketa nation tu, hem hao?”—Rom. 9:14-24.

9. (a) Hu nao “olketa dish bilong kros wea fit for finis every bit”? (b) Why nao Jehovah showim aot bigfela long-suffering nomata pipol againstim hem? Hao nao samting wea happen bae givim gudfela samting for olketa wea love-im hem?

⁹ Start kam from taem Jehovah talemaot datfela profesi long Genesis 3:15, Satan and seed bilong hem they “olketa dish bilong kros wea fit for finis every bit.” Start long datfela taem Jehovah showim aot long-suffering. Badfela pipol mek funny long olketa way bilong hem; they persecutim olketa servant bilong hem, and killim dae Son bilong hem tu. But Jehovah hem barava hold back for duim samting, mekem olketa servant bilong hem bae kasem gudfela samting olawe. Everywan garem chance finis for lukim barava no gud samting wea kam aot from way for againstim God. Long sem taem, dae bilong Jesus provide-im way for sevem olketa man wea obey and for ‘brekem olketa work bilong Devil.’—1 John 3:8; Heb. 2:14, 15.

10. Why nao Jehovah go ahed for letem badfela samting happen insaed long 1,900 year wea go past finis?

¹⁰ Insaed long winim 1,900 year bihaen long resurrection bilong Jesus, Jehovah hem letem “olketa dish bilong kros” go ahed for stap, hem no finisim them. Why nao olsem? Bikos hem readyim mek-tu part bilong seed bilong woman, olketa wea bae stap withim Jesus Kraest long Kingdom bilong hem long heven. (Gal. 3:29) Olketa hia, wea namba bilong them hem 144,000, they “olketa dish bilong mercy” wea aposol Paul tok abaot. Firstaem, hem invite-im samfela Jew for insaed long disfela class. Then hem joinim moa olketa Samaritan wea circumcise and then pipol bilong olketa Gentile nation. Withim bigfela long-suffering Jehovah mekem purpose bilong hem go ahed, hem no force-im anywan for servim hem, but hem givim nambawan blessing long olketa wea ting hae long olketa samting wea hem provide-im long loving way. Distaem way for prepare-im datfela class for heven hem klosap for finis.

11. Wanem narafela grup nao kasem gudfela samting from long-suffering bilong Jehovah?

¹¹ But waswe long pipol wea bae stap long disfela earth? Long taem wea God markem, planti billion pipol bae resurrect for stap under long datfela Kingdom long disfela earth. And tu, start kam from year 1935 C.E., long-suffering bilong Jehovah hem openem way for hipim ap tugeta wanfela “great crowd” from every nation wea bae kasem laef.—Rev. 7:9, 10; John 10:16.

12. (a) From diswan, wanem nao yumi learnim abaot Jehovah seleva? (b) Wanem nao tingting bilong yu long way wea Jehovah hem deal withim olketa samting hia?

¹² Waswe, diswan hem no followim way bilong justice? No moa nao! Sapos God holdim back way for finisim every bit badfela pipol, olketa “dish bilong kros,” mekem hem savvy show aot mercy long other pipol for fitim purpose bilong hem, no anywan fit for complain. But, taem yumi lukim purpose bilong hem start for fulfill, yumi learnim planti samting abaot Jehovah seleva. Yumi sapraes long olketa different saed bilong fashion bilong hem wea show aot moa klia—justice bilong hem, mercy, long-suffering, way wea hem garem bigfela wisdom. Wisefela way wea Jehovah deal withim datfela question bae prove-im for olawe hao way bilong hem for rul nao hem best wan. Withim aposol Paul yumi say: “O richfela samting and wisdom and savvy bilong God they deep tumas! Yumi no savvy faend aot long every judgment bilong hem and hem hard tumas for luksavvy long way bilong hem!”—Rom. 11:33.

Chance for Show Aot Love bilong Yumi

13. (a) Taem yumi seleva suffer, yumi garem chance for duim wanem samting? (b) Wanem nao bae helpem yumi for duim wisefela samting?

¹³ Samfela samting long living savvy mekem yumi barava suffer bikos God no finisim yet badfela pipol and bringim back gudfela samting for olketa man wea hem promisim. Wanem nao yumi duim taem samting olsem kamap? Waswe, yumi lukim chance for share long way for aotem shame from nem bilong Jehovah and prove-im Devil hem wanfela liar? Yumi savvy strong for duim diswan sapos yumi tingim disfela kaonsel: “Kamap wise, son bilong mi, and mekem heart bilong mi hapi, for mekem mi givim answer long dat wan wea tok daonem mi.” (Prov. 27:11) Satan, dat wan wea tok daonem Jehovah, hem say sapos pipol lusim material samting bilong them or kasem no gud samting long saed bilong body, they blame-im God, and curse-im hem tu. (Job 1:9-11; 2:4, 5) Yumi mekem heart bilong Jehovah barava hapi taem yumi showim aot hao hem no tru long saed bilong yumi, taem yumi loyal long God long hardfela taem. Yumi barava sure Jehovah hem love-im olketa servant bilong hem and, olsem withim Job, long taem wea hem markem, Jehovah bae givim yumi bigfela reward sapos yumi faithful.—Jas. 5:11; Job 42:10-16.

14. Sapos yumi depend long Jehovah taem yumi kasem hardfela taem, wanem otherfela gud samting yumi savvy kasem?

¹⁴ Sapos yumi trustim way for depend long Jehovah taem yumi kasem hardfela test, yumi savvy mekem grow olketa nambawan fashion. From olketa samting wea hem suffer from, Jesus “learnim fashion for obey” long barava bigfela way. Yumi tu savvy learn—mekem grow long-suffering, fashion for stand strong and way for barava ting hae long olketa raeteous way bilong Jehovah. Waswe, yumi bae show aot patient fashion for acceptim datfela training?—Heb. 5:8, 9; 12:11; Jas. 1:2-4.

15. Taem yumi stand strong long hardfela samting withim patient fashion, hao nao other pipol savvy kasem gudfela samting?

¹⁵ Other pipol bae lukluk long samting wea yumi duim. Bikos yumi stand strong from love wea yumi garem for raeteous fashion, go-go samfela maet ting hae tu long “olketa brata” bilong Kraest distaem, and taem they wan mind withim “olketa brata” bilong hem long worship, they savvy kasem olketa blessing bilong laef olawe. (Matt. 25:34-36, 40, 46) Jehovah and Son bilong hem wantim them for garem datfela chance. Waswe, yumi tu? Waswe, yumi willing for stand strong mekem they garem datfela chance?

16. Hao nao way wea yumi tingting abaot hardfela samting wea yumi seleva kasem hem join withim way for garem wan mind?

¹⁶ Hem barava gud tumas taem yumi ting long olketa hardfela samting long living olsem chance for showim aot love bilong yumi for Jehovah and way for share tu for duim will bilong hem! Taem yumi duim olsem, diswan prove-im yumi go ahed for garem wan mind withim God and Kraest wea Jesus pray abaot for every tru Kristian.—John 17:20, 21.

Samting for Review

● Taem hem letem badfela samting stap, hao nao Jehovah showim bigfela respect for nem bilong hemseleva long proper way?

● Hao nao way wea God letem “olketa dish bilong kros” for stap hem mekem yumi tu fit for kasem mercy bilong hem?

● Wanem nao yumi mas trae for luksavvy long hem, taem yumi seleva suffer?