Chapter Seven

Wanem Iumi Lanem From God Letem Wicked Fasin Go Ahed

1, 2. (a) Sapos Jehovah stretawe killim dae olketa wea bighed long Eden, hao nao datwan bae affectim iumi? (b) Wanem loving arrangement nao Jehovah mekem for iumi?

“OLKETA day bilong olketa year bilong laef bilong mi no staka and fulap witim sorre,” hem nao toktok wea Jacob talem bifor. (Genesis 47:9) Job tu sei man hem “garem shortfala laef and fulap witim trabol.” (Job 14:1) Olsem tufala hia, planti long iumi kasem hard taem, samting wea no followim justice, and barava sorre samting. Nomata olsem, wei wea iumi born kam hem no from God no followim justice. Hem tru, iumi no perfect long mind and body, and iumi no stap tu insaed long Paradaes hom wea Adam and Eve garem firstaem. Bat waswe sapos Jehovah stretawe killim dae tufala taem tufala bighed? Nomata bae no eni sik, sorre, or dae kamap, famili bilong man bae no stap tu. Iumi bae no born. God showimaot mercy taem hem givim taem long Adam and Eve for bornem pikinini, nomata olketa bae born witim sin. And thru long Christ, Jehovah mekem arrangement for iumi kasem bak samting wea Adam lusim—laef olowe long wanfala paradaes earth.—John 10:10; Romans 5:12.

² Iumi kasem strong taem iumi luk forward long wei for laef olowe insaed datfala niu world long Paradaes, wea iumi bae free from sik, sorre, pain, and dae, and free tu from wicked pipol! (Proverbs 2:21, 22; Revelation 21:4, 5) Bat, iumi lanem from Bible hao nomata salvation bilong iumi wanwan hem important long iumi and long Jehovah, samting wea moa important hem join witim diswan.

For Saed Bilong Nambawan Nem Bilong Hem

3. Wanem nao join witim wei wea purpose bilong Jehovah for earth and olketa man hem fulfill?

³ Nem bilong God hem join witim wei wea purpose bilong hem for earth and olketa man hem fulfill. Datfala nem, Jehovah, hem minim “Hem Mekem Kamap.” So nem bilong hem join witim wei wea hem Sovereign Bilong Universe, Man Bilong Purpose, and God bilong truth. Bikos long olmaeti position bilong Jehovah, peace and gudfala living bilong full universe bae depend long wei for respectim evribit datfala nem and wanem hem minim and evriwan mas obeyim hem.

4. Wanem nao insaed long purpose bilong Jehovah for earth?

⁴ Bihaen hem creatim Adam and Eve, Jehovah givim tufala wanfala assignment for duim. Hem talemaot klia hao purpose bilong hem, hem no just for lukaftarem full earth—and datwan mekem Paradaes kamap moa big—bat tu for garem pikinini for fulimap earth. (Genesis 1:28) Waswe, disfala purpose bae fail bikos long sin bilong tufala? Sapos hem no savve fulfillim purpose bilong hem for disfala earth and olketa man, datwan bae mekem nem bilong olmaeti Jehovah kasem bigfala shame!

5. (a) Sapos first man and woman kaikaim frut from tree bilong savve long gud and nogud samting, wanem taem nao tufala bae dae? (b) Hao nao Jehovah fulfillim toktok bilong hem long Genesis 2:17 saed long purpose bilong hem for earth?

⁵ Jehovah bin warnim Adam and Eve sapos tufala no obey and kaikaim frut from tree bilong savve long gud and nogud samting, tufala bae dae “long day” wea tufala kaikaim. (Genesis 2:17) For fitim wanem hem talem, tufala mas ansa long Jehovah long sem day wea tufala sin and hem judgem tufala for dae. Long eye bilong God, Adam and Eve dae long datfala day. Bat, for fulfillim purpose bilong hem for earth, Jehovah letem tufala for garem famili bifor tufala dae long body. Nomata olsem, from God tingim 1,000 year olsem wanfala day, taem laef bilong Adam hem finis taem hem 930 year, datwan hem insaed long wanfala “day.” (2 Peter 3:8; Genesis 5:3-5) So, toktok bilong Jehovah hem kamap tru saed long taem wea tufala kasem panis, and purpose bilong hem for earth no fail taem tufala dae. Bat, hem givim taem for olketa man wea no perfect, and tu olketa wicked wan, for go ahed laef.

6, 7. (a) Olsem Exodus 9:15, 16 hem talem, why nao Jehovah letem wicked pipol for go ahed laef ? (b) Long taem bilong Pharaoh, hao nao paoa bilong Jehovah showaot, and hao nao planti savve long nem bilong Hem? (c) Wanem nao bae happen taem wicked system distaem hem finis?

⁶ Samting wea Jehovah talem long ruler bilong Egypt long taem bilong Moses hem showimaot moa why God hem letem wicked fasin for go ahed. Taem Pharaoh stopem olketa son bilong Israel for lusim Egypt, Jehovah no stretawe killim hem dae. Tenfala Trabol wea kasem datfala land hem showimaot paoa bilong Jehovah long wei wea mekem olketa sapraes. Taem hem givim warning abaotem mek-seven trabol, Jehovah talem long Pharaoh hao Hem fit for aotem Pharaoh and pipol bilong hem from disfala earth. “Bat,” Jehovah sei, “mi letem iu stap from disfala samting, for showim iu paoa bilong mi and for mekem evriwan savve long nem bilong mi long evri ples long earth.”—Exodus 9:16.

⁷ Taem Jehovah sevem olketa Israelite, pipol evriwea barava savve long nem bilong hem. (Joshua 2:1, 9-11) Distaem, klosap 3,500 year bihaen, pipol still no forgetim samting wea hem duim long datfala taem. Hem no just nem bilong Jehovah wea go aot bat trufala samting tu abaotem Datwan wea garem datfala nem. Diswan strongim nem bilong Jehovah olsem God wea duim wanem hem promisim for olketa servant bilong hem. (Joshua 23:14) Hem showim hao bikos long olmaeti paoa bilong hem, no eni samting savve blokem purpose bilong hem. (Isaiah 14:24, 27) So, iumi savve sure hao klosap nao bae hem duim samting for saed bilong olketa faithful servant bilong hem taem hem distroem full wicked system bilong Satan. No eniwan bae forgetim datfala wei wea olmaeti paoa bilong Jehovah bae mekem nem bilong hem kasem glory. Gud samting wea kamaot from diswan bae nating savve finis.—Ezekiel 38:23; Revelation 19:1, 2.

‘Wisdom Bilong God Deep Tumas!’

8. Wanem nao samfala point wea Paul encouragem iumi for ting raonem?

⁸ Long leta wea hem raetem for olketa long Rome, aposol Paul askem disfala kwestin: “Waswe, God no savve showimaot justice fasin?” Hem ansa strong olsem: “Hard tumas for datwan happen!” Then hem mekhae long mercy bilong God and storyim samting wea Jehovah talem abaotem why hem no killim dae Pharaoh kwiktaem. Paul showim tu hao iumi olketa man olsem clay long hand bilong man for wakem clay pot. Then hem sei: “So, sapos God, nomata hem fit for showimaot kros bilong hem and mekem pipol savve long paoa bilong hem, showimaot long-safaring long olketa dish bilong kros wea fit for finis evribit, mekem hem savve showimaot richfala samting bilong glory bilong hem long olketa dish bilong mercy, wea hem redyim firstaem for kasem glory, hem nao iumi, wea hem kolem aot no from olketa Jew nomoa, bat from olketa nation tu, hem hao?”—Romans 9:14-24.

9. (a) Hu nao “olketa dish bilong kros wea fit for finis evribit”? (b) Why nao Jehovah showimaot bigfala long-safaring nomata pipol againstim hem, and hao nao samting wea bae kamaot from diswan givim gud samting for olketa wea lovem hem?

⁹ Start kam from taem wea bighed fasin kamap long Eden, eniwan wea againstim Jehovah and olketa law bilong hem kamap “olketa dish bilong kros wea fit for finis evribit.” Start kam from datfala taem, Jehovah hem showimaot long-safaring. Wicked pipol tok spoelem olketa wei bilong hem, persecutim olketa servant bilong hem, and killim dae Son bilong hem tu. Jehovah barava hol bak taem hem letem inaf taem for evri creation for lukim evribit olketa nogud samting wea kamaot from wei for againstim God and wei wea olketa man rulim seleva. Long semtaem, dae bilong Jesus openem wei for sevem olketa man wea obey and for “brekem olketa waka bilong Devil.”—1 John 3:8; Hebrews 2:14, 15.

10. Why nao Jehovah letem wicked fasin for go ahed insaed 1,900 year wea go pas?

¹⁰ Insaed winim 1,900 year from taem Jesus resurrect, Jehovah hem letem “olketa dish bilong kros” for stap, and hem hol bak for distroem olketa. Why nao olsem? Wanfala samting nao, bikos hem go ahed for redyim olketa wea bae stap witim Jesus Christ insaed Kingdom bilong hem long heven. Namba bilong olketa hia hem 144,000, and olsem aposol Paul hem talem olketa hia “olketa dish bilong mercy.” Firstaem, samfala Jew wanwan kasem invitation for kamap part long disfala sekson for go long heven. Bihaen, God invaetem pipol bilong olketa Gentile nation. Jehovah no forcem eniwan long olketa hia for servem hem. Bat from midolwan long olketa wea tinghae long olketa loving arrangement bilong hem, hem givim samfala datfala spesol privilege for rul witim Son bilong hem insaed Kingdom long heven. Hem klosap for redyim finis datfala sekson wea bae stap long heven.—Luke 22:29; Revelation 14:1-4.

11. (a) Wanem sekson nao kasem gudfala samting long distaem from long-safaring bilong Jehovah? (b) Hao nao olketa wea dae finis bae kasem gud samting?

¹¹ Bat, waswe long olketa wea bae stap long earth? Long-safaring wea Jehovah showimaot hem openem tu wei for hipimap “wanfala big crowd” from evri nation. Distaem namba bilong olketa kasem staka million. Jehovah promis for disfala sekson wea bae stap long earth for laef thru long end bilong disfala system and garem hope for laef olowe insaed wanfala paradaes earth. (Revelation 7:9, 10; Psalm 37:29; John 10:16) Long taem wea God markem, planti million wea dae finis bae resurrect and kasem chance for stap long earth anda long datfala Kingdom long heven. Word bilong God profesi olsem long Acts 24:15: “Wanfala resurrection bae kamap for olketa wea raeteous and wea no raeteous.”—John 5:28, 29.

12. (a) Wanem nao iumi lanem abaotem Jehovah from wei wea hem letem wicked fasin go ahed? (b) Hao nao iu feel abaotem wei wea Jehovah deal witim diswan?

¹² Waswe, eni wei wea no followim justice hem insaed long diswan? Nomoa, for fitim purpose bilong hem, God showim fasin for kea long nara pipol taem hem hol bak for distroem “olketa dish bilong kros,” olketa wea wicked. Diswan showim haomas mercy and love hem garem. And tu, taem iumi lukim hao purpose bilong hem go ahed for fulfill, iumi lanem planti samting abaotem Jehovah seleva. Iumi hapi tumas long olketa difren part long fasin bilong hem wea showaot—justice, mercy, long-safaring, and bigfala wisdom bilong hem. Wisefala wei wea Jehovah deal witim disfala kwestin abaotem ruler bilong universe—raet bilong hem for rul—bae pruvim for olowe hao wei bilong hem for rul hem nao best wei. Iumi sei olsem aposol Paul: “Riches and wisdom and savve bilong God hem deep tumas! Man kanduit minim olketa judgment and wei bilong hem!”—Romans 11:33.

Chance for Showim Love Bilong Iumi

13. Taem iumi safa, iumi garem chance for duim wanem, and wanem nao bae helpem iumi for duim samting long wisefala wei?

¹³ Planti servant bilong God safa long living bilong olketa. Wei wea olketa safa hem go ahed bikos God no distroem yet wicked pipol and mekem olketa man kamap gud moa olsem hem promisim. Waswe, datwan shud mekem iumi feel nogud? Or waswe, iumi ting long diswan olsem chance for share long wei for pruvim Devil hem man for laea? Iumi savve kasem strong for duim olsem sapos iumi tingim evritaem diswan: “Kamap wise, son bilong mi, and mekem heart bilong mi hapi, mekem mi givim ansa long wan wea tok daonem mi.” (Proverbs 27:11) Satan, datwan wea tok daonem Jehovah, sei sapos pipol lusim olketa material samting or kasem nogud samting long body, bae olketa blamem God, and cursim hem tu. (Job 1:9-11; 2:4, 5) Iumi mekem heart bilong Jehovah hapi taem iumi showaot diswan hem no tru taem iumi loyal long hem long olketa hardfala taem.

14. Sapos iumi depend long Jehovah taem iumi kasem test, olketa wanem gudfala samting nao iumi savve kasem?

¹⁴ Sapos iumi depend long Jehovah taem iumi kasem test, iumi savve mekem grow olketa spesol fasin. Example, from olketa samting wea Jesus safa from, hem “lanem fasin for obey” long wei wea hem nating lanem bifor. Iumi tu savve lane from olketa test bilong iumi taem iumi mekem grow long-safaring, fasin for go ahed strong, and diswan mekem wei wea iumi minim and thankiu long olketa raeteous wei bilong Jehovah kamap moa deep.—Hebrews 5:8, 9; 12:11; James 1:2-4.

15. Taem iumi patient for go ahed long hardfala taem, hao nao diswan savve helpem narafala pipol?

¹⁵ Narafala pipol bae lukluk long samting wea iumi duim. Samting wea kamaot from wei wea iumi lovem raeteous fasin hem mekem samfala isisi luksavve hu nao olketa tru Christian distaem. And taem olketa joinim iumi for worship, olketa garem chance for kasem olketa blessing bilong laef olowe. (Matthew 25:34-36, 40, 46) Jehovah and Son bilong hem laekem pipol for garem datfala chance.

16. Hao nao tingting bilong iumi abaotem wei wea hardfala samting wea iumi kasem hem join witim wei for garem wan mind?

¹⁶ Hem gud tumas taem iumi ting long samting, nomata hem hard, olsem chance for showimaot love bilong iumi long Jehovah and olsem wei for share for fulfillim will bilong hem! Wei wea iumi duim olsem hem pruvim iumi gogo for wan mind witim God and Christ. Jesus prea long Jehovah for olketa trufala Christian, taem hem sei: “Mi no ask for olketa hia [olketa klos disaepol bilong hem] nomoa, bat for olketa wea putim faith long mi thru long samting wea olketa talem; mekem olketa kamap wan, long sem wei wea iu, Father, iu garem wan mind witim mi and mi garem wan mind witim iu, mekem olketa tu garem wan mind witim iumi tufala.”—John 17:20, 21.

17. Iumi savve sure long wanem samting sapos iumi loyal long Jehovah?

¹⁷ Sapos iumi loyal long Jehovah, bae hem givim iumi bigfala reward. Word bilong hem sei: “Stand strong, no seksek, evritaem garem planti samting for duim insaed long waka bilong Lord, from iufala savve waka bilong iufala hem no hard waka nating long saed long Lord.” (1 Corinthians 15:58) Hem sei tu: “God hem no wicked mekem hem forgetim waka bilong iufala and love wea iufala showimaot for nem bilong hem.” (Hebrews 6:10) James 5:11 sei: “Lukim! Mifala talemaot hapi nao olketa wea go ahed strong. Iufala herem hao Job go ahed strong and lukim samting wea Jehovah duim, hao Jehovah hem showim kaenfala love and garem bigfala mercy.” Wanem nao samting wea happen long Job? “Jehovah, hem blessim Job long bihaen winim long firstaem.” (Job 42:10-16) Tru nao, Jehovah hem “man wea givim reward long olketa wea barava luk aotem hem.” (Hebrews 11:6) And iumi luk forward long wanfala nambawan reward—laef olowe long wanfala paradaes earth!

18. Wanem nao bae happen long eni nogud memory wea iumi maet garem?

¹⁸ Rul bilong Kingdom bilong God bae stretem evri nogud samting wea kasem olketa man for planti thousand year finis. Hapi long datfala taem bae winim eni wei for safa wea iumi kasem distaem. Olketa nogud memory bilong samting wea iumi safa long hem bifor bae no spoelem iumi. Olketa gudfala tingting and waka wea fulimap evriday living insaed long niu world bae isisi aotem olketa nogud memory. Jehovah sei: “Mi wakem niu heven [wanfala niu Kingdom gavman long heven wea rul ovarem olketa man] and wanfala niu earth [wanfala raeteous community bilong olketa man]; and olketa samting bilong bifor bae no kamap moa long mind, and hem bae no kamap moa long heart. Bat singaot witim hapi, iufala pipol, and kamap hapi olowe long wanem mi wakem.” Tru nao, insaed long niu world bilong Jehovah, olketa raeteous wan bae fit for sei: “Full earth hem rest nao, no eniwan stap for spoelem. Pipol kamap hapi and singaot from olketa hapi.”—Isaiah 14:7; 65:17, 18.

Review

• Nomata hem letem wicked fasin go ahed, hao nao Jehovah showim bigfala respect wea fitim for nem bilong hemseleva?

• Hao nao wei wea God letem “olketa dish bilong kros” for stap hem mekem mercy bilong hem kam olowe kasem iumi?

• Taem samting mekem iumi safa, wanem nao iumi shud trae for luksavve saed long diswan?

[Piksa long page 67]

Jehovah “blessim Job long bihaen winim long firstaem”