Chapter 17
“Garem Strongfela Love for Each Other”
1, 2. (a) Planti taem wanem nao mekem pipol wea kam for firstaem long meeting bilong olketa Jehovah’s Witness they sapraes? (b) Wanem samting moa they lukim long olketa convention bilong yumi wea show aot disfela fashion?
TAEM pipol first kam long kongregeson meeting bilong olketa Jehovah’s Witness, planti taem they barava sapraes long love wea they lukim long there. They lukim diswan long way wea everywan fren gud tugeta and way wea they welkamim them.
2 Long olketa convention bilong yumi, pipol wea visit kam they lukim hao klosap everywan wea attend show aot barava gudfela fashion. Wanfela man for raetem nius hem say olsem abaot wanfela convention: ‘No anywan use-im drug or drinkim beer. No anywan singaot. No anywan pushpush olabaot. No anywan swear and tok no gud. No anywan talem dirty joke or dirty toktok. Air hem no fulap withim smoke. No anywan steal. No anywan throwim olketa tin drink long gras. Hem barava different every bit.’ Every samting hia show aot love, dat kaen love wea ‘no duim badfela samting and no lukaotem samting bilong hemseleva nomoa.’—1 Cor. 13:4-8.
3. (a) Way wea yumi showim aot love, mas waswe everytaem? (b) For followim Kraest, wanem kaen love nao yumi need for mekem grow?
3 Love hem wanfela mark bilong every tru Kristian. (John 13:35) Taem yumi grow long spiritual way, yumi mas showim aot long bigfela way moa. Aposol Paul pray for love bilong olketa brata bilong hem for “kamap bigfela moa.” (Phil. 1:9; 1 Thess. 3:12) And tu, Peter encouragim olketa Kristian brata for showim aot love long “whole organization bilong olketa brata.” (1 Pet. 2:17) Love bilong yumi mas muvim yumi for duim moa samting winim way for attendim olketa meeting nomoa withim pipol wea yumi no trae for savvy gud long them. Hem mas winim way for just say “Hello” nomoa long samfela taem. Aposol John show aot hao fashion for sakrifaesim seleva mas insaed long diswan. Hem raet olsem: “From disfela samting yumi savvy long love, bikos [Son bilong God] hem givim soul bilong hem for yumi; and yumi nao mas givim soul bilong yumi for olketa brata bilong yumi.” (1 John 3:16; John 15:12, 13) Yumi no duim datwan yet. But waswe, yumi savvy really givim laef bilong yumi for olketa brata bilong yumi? Well, long wanem way nao yumi helpem them distaem, nomata long taem wea hem no easy for duim olsem?
4. (a) Long wanem otherfela way nao yumi savvy showim aot love long bigfela way moa? (b) Why nao hem important for garem strongfela love for each other?
4 Withim way for duim olketa samting wea show aot spirit for sakrifaesim seleva, hem important tu for garem barava gudfela feeling for olketa brata bilong yumi. Word bilong God encouragim yumi olsem: “Withim love for olketa brata garem kaenfela feeling for each other.” (Rom. 12:10) Yumi everywan garem feeling olsem for samfela pipol. Waswe, yumi savvy garem feeling olsem for samfela moa? Taem end bilong disfela old system kam klosap, hem important for yumi kamap moa klos long olketa Kristian brata bilong yumi. Bible talem yumi diswan, taem hem say: “End bilong every samting hem klosap nao. . . . Winim every samting, garem strongfela love for each other, from love hem coverim planti sin.”—1 Pet. 4:7, 8.
5. Why nao hem rong for ting say no any problem bae kamap midlwan long olketa member bilong kongregeson?
5 Hem tru, from yumi no perfect, samfela taem yumi bae duim samting wea mekem other pipol feel no gud. Long samfela way, olketa tu bae duim samting againstim yumi. (1 John 1:8) Sapos samting olsem happen long yu, wanem nao yu mas duim?
Wanem for Duim Taem Olketa Problem Kamap
6. (a) Why nao kaonsel long Bible maet no semsem everytaem withim samting wea yumi wantim? (b) But wanem samting nao bae happen sapos yumi followim?
6 Olketa Scripture leadim yumi long diswan. But kaonsel from scripture maet no semsem withim samting wea yumi olketa man wea no perfect want for duim. (Rom. 7:21-23) Nomata olsem, way wea yumi trae hard long diswan hem show aot yumi really want for mekem Jehovah hapi, and diswan bae strongim tu love bilong yumi for other pipol.
7. (a) Sapos samwan mekem yumi feel no gud, why nao yumi mas no pay back? (b) Why nao yumi mas no stap klia from wanfela brata wea mekem yumi feel no gud?
7 Samfela taem, taem samwan duim no gud samting long man, hem lukaotem way for pay back. But datwan hem just mekem every samting kamap moa worse. Yumi mas letem God nao for pay back. (Prov. 24:29; Rom. 12:17-21) Other pipol maet no laek for savvy moa long datfela man, and stap klia from hem. But yumi kanduit for duim datwan withim olketa wea worship withim yumi. Wanfela samting wea mekem God acceptim worship bilong yumi, hem way wea yumi love-im olketa brata bilong yumi. (1 John 4:20) Waswe, yumi savvy honest for say yumi love-im samwan wea yumi no willing for story withim or no laek for lukim? Yumi need for deal withim datfela problem and stretem. Hao nao yumi savvy duim olsem?
8, 9. (a) Sapos yumi garem samting for complain againstim wanfela brata, wanem nao stretfela samting for duim? (b) But waswe sapos hem duim samting againstim yumi planti taem? (c) Why nao yumi mas deal withim diswan long way olsem? Wanem nao bae helpem yumi for duim olsem?
8 Aposol Paul raet olsem abaotem diswan: “Go ahed for show aot patient fashion long each other and forgivim each other sapos anywan garem samting for complain againstim each other. Olsem Jehovah forgivim yufela, yufela mas duim olsem tu.” (Col. 3:13) Waswe, yu savvy duim datwan? Waswe sapos man hia duim different kaen samting againstim yu planti taem?
9 Aposol Peter askim sem question, and hem say maet hem mas trae for forgivim wanfela brata sevenfela taem. Jesus answerim hem olsem: “Mi talem yu, no sevenfela taem, but, Go kasem seventy-seven taem.” But why nao olsem? Jesus meanim diswan withim wanfela tok piksa wea showim aot klia bigfela kaon wea yumi garem withim God wea winim any samting wea any man hem kaonem long yumi. (Matt. 18:21-35) Long planti way yumi sin againstim God every day—samfela taem from selfish fashion, planti taem from samting wea yumi talem or tingim, and way for no duim samting wea yumi fit for duim tu. From yumi no savvy, maet yumi no luksavvy tu long samfela rong samting wea yumi duim, or from yumi busy long living maet yumi no tingting strong long datwan. God savvy askim laef bilong yumi for payim back olketa sin bilong yumi. (Rom. 6:23) But hem go ahed for showim aot mercy long yumi. (Ps. 103:10-14) Dastawe, hem barava fitim hem for askim yumi for deal withim each other long sem way. (Matt. 6:14, 15; Eph. 4:1-3) Taem yumi duim datwan, winim way for keepim kros, diswan prove-im yumi garem love wea “no savvy tingim olawe rong wea otherfela pipol duim long hem.”—1 Cor. 13:4, 5; 1 Pet. 3:8, 9.
10. Wanem nao yumi mas duim sapos wanfela brata feel no gud againstim yumi?
10 Samfela taem maet yumi luksavvy hao nomata yumi no garem any no gud feeling againstim brata bilong yumi, hem maet feel no gud againstim yumi. Wanem nao yumi mas duim? Yumi mas kwiktaem for tok withim hem and trae for mekem peace withim hem. Bible encouragim yumi nao for duim samting firstaem. (Matt. 5:23, 24) Maet datwan hem no easy samting for duim. Man need for garem love wea join withim humble fashion. Waswe, olketa fashion hia they strong insaed long yu for muvim yu for followim kaonsel bilong Bible? Diswan hem important goal for kasem.
11. Sapos wanfela brata duim olketa samting wea mekem yumi feel no gud, wanem nao yumi mas duim abaotem diswan?
11 Long otherfela saed, maet samwan hem duim olketa samting wea mekem yu feel no gud—and maet other pipol tu. Waswe, hem gud sapos samwan story withim hem? Maet olsem. Sapos yuseleva talem datfela problem long hem long kaenfela way, diswan savvy bringim gudfela samting. But firstaem yu mas askim yuseleva: ‘Waswe, olketa samting wea hem duim they really no followim scripture? Or waswe, problem hem from living bilong mi and training wea mi kasem hem different from hem?’ Sapos olsem, yu mas careful for no markem olketa rul bilong yuseleva and then judge followim olketa hia. (Jas. 4:11, 12) Jehovah hem no saed withim anywan and hem acceptim pipol from every different kaen living and hem patient withim them taem they grow long spiritual way.
12. (a) Sapos samwan duim bigfela rong insaed kongregeson, hu nao deal withim datwan? (b) But, wanem taem nao man wea they duim rong samting againstim hem mas duim samting firstaem? Wanem goal nao hem garem?
12 But, sapos samwan insaed kongregeson hem duim bigfela rong, yumi mas deal withim diswan kwiktaem. Hu nao bae duim diswan? Planti taem hem olketa elder. But, sapos diswan hem wanfela samting bilong bisnis midlwan long tufela brata, or maet hem way for use-im tongue long rong way for barava spoelem samwan, then datwan wea they duim rong againstim hem, mas firstaem trae for helpem man wea tok againstim hem. Samfela pipol maet ting diswan hem hardfela samting for duim. But hem nao kaonsel wea Jesus givim long Matthew 18:15-17. Love for brata bilong yumi and feeling for wantim hem for stap olsem brata bilong yumi bae helpem yumi for duim diswan long way wea, sapos fitim, bae kasem heart bilong datwan wea duim rong.—Prov. 16:23.
13. Sapos wanfela problem kamap midlwan long yumi and narafela brata, wanem nao bae helpem yumi for lukluk long diswan long stretfela way?
13 Taem wanfela problem kamap, nomata hem big or small, yumi bae kasem help sapos yumi trae hard for meanim tingting bilong Jehovah long diswan. Hem no hapi withim any kaen sin, but hem lukim long yumi everywan. Long taem wea hem markem, hem aotem pipol wea duim sin and no repent from organization bilong hem. But waswe long yumi? Yumi everywan depend long mercy and long-suffering bilong hem. Hem nao markem way wea yumi mas followim. Taem yumi followim, yumi showim aot love bilong hem.—Eph. 5:1, 2.
Lukaotem Olketa Way for “Kamap Moa Wide”
14. (a) Why nao Paul encouragim olketa long Corinth for “kamap moa wide”? (b) Hao nao olketa scripture long disfela paragraf show aot hem gud for yumi everywan ting abaot diswan?
14 Aposol Paul spendem planti month for buildim ap kongregeson long Corinth, Greece. Hem work hard for helpem olketa brata long there and hem love-im them. But samfela long olketa no garem kaenfela feeling for hem. They barava tok againstim hem. Hem encouragim them for “kamap moa wide” long way for showim aot feeling. (2 Cor. 6:11-13; 12:15) Hem bae gud for yumi everywan for lukluk gud long way wea yumi showim aot love for other pipol and for lukaotem olketa way for “kamap moa wide.”—1 John 3:14; 1 Cor. 13:3.
15. Wanem nao savvy helpem yumi for mekem grow love bilong yumi for anywan wea yumi faendem hem hard for fren gud withim?
15 Waswe, yumi faendem hem hard for fren gud withim samfela long kongregeson? Sapos yumi barava trae hard for forgetim any small rong wea they duim, long sem way wea yumi wantim them for duim long yumi tu, diswan savvy barava helpem way wea yumi fren gud tugeta. (Prov. 17:9; 19:11) Feeling bilong yumi abaotem them savvy kamap moabeta tu sapos yumi lukaotem olketa gudfela fashion bilong them and tingting strong long them. Waswe, yumi luksavvy long olketa way wea Jehovah use-im olketa brata hia? Diswan bae really mekem love bilong yumi for them hem grow.—Luke 6:32, 33, 36.
16. Hao nao yumi savvy “kamap moa wide” for showim aot love for olketa insaed long kongregeson bilong yumi?
16 Hem tru, yumi kanduit for duim every samting for other pipol. Maet yumi no fit for story withim everywan long each meeting. Maet hem hard for invite-im everywan taem yumi invite-im samfela fren for kaikai withim yumi. Yumi everywan garem olketa klos fren wea yumi spendem moa taem withim them winim other pipol. But waswe, yumi savvy “kamap moa wide”? Waswe, yumi savvy spendem fewfela minute each week for savvy gud long samwan insaed kongregeson bilong yumi wea no klos fren bilong yumi? Maet samfela taem yumi invite-im samwan for work withim yumi long field ministry? Sapos yumi really garem strongfela love for each other, yumi bae lukaotem olketa way for showim aot diswan.
17. Taem yumi stap withim olketa brata wea yumi nating meetim bifor, wanem nao bae show aot sapos yumi garem strongfela love tu for olketa?
17 Olketa Kristian convention they gudfela chance for “kamap moa wide” long love bilong yumi. Planti thousand pipol maet stap long there. Yumi no savvy meetim everywan long them. But fashion bilong yumi savvy show aot yumi tingim gudfela samting bilong them winim yumi seleva, nomata sapos yumi nating meetim them bifor. And yumi savvy showim aot interest long samfela, taem yumi duim samting firstaem for meetim samfela wea stap raonem yumi. Wan day everywan wea stap long earth they bae olketa brata and sista, wea garem wan mind for worshipim God and Father bilong everywan. Yumi bae hapi tumas for savvy gud long everywan, withim planti different kaen fashion bilong them! Strongfela love for olketa bae muvim yumi for want for duim datwan. Hem gud for start distaem nao!
Samting for Review
● Taem olketa problem kamap midlwan long olketa brata and sista, hao nao yumi mas stretem? Why nao olsem?
● Taem yumi grow long spiritual way, long wanem way nao love bilong yumi tu mas grow?
● Hao nao yumi fit for showim aot strongfela love for moa pipol and no olketa klos fren nomoa?