Chapter 18
Yumi Need for Followim Way for Love-im God insaed Famili
1. (a) Bihaen they learnim olketa rul bilong Jehovah for marit, long wanem way nao samfela man they change? (b) But wanem samting moa hem insaed long Kristian famili laef?
WITHIM olketa nambawan truth wea yumi learnim insaed Bible study bilong yumi hem olketa samting abaotem marit and famili laef. Yumi luksavvy long Jehovah olsem Man Wea Startim marit and lukim hao insaed long Bible hem provide-im best way for leadim famili. Samting wea kamaot from datwan nao, planti pipol they lusim living wea garem dirty fashion and they registerim marit bilong them long proper way. But moa samting hem insaed long Kristian famili laef. Insaed long diswan hem tingting bilong yumi abaotem way wea marit hem samting for olawe, way for fulfillim olketa responsibility bilong yumi insaed long famili, and hao yumi deal withim otherfela famili member.—Eph. 5:33–6:4.
2. (a) Waswe, everywan followim samting wea they savvy from Bible insaed famili bilong them? (b) Hao nao Jesus and Paul mek hae long way wea hem important for duim diswan?
2 Planti million pipol savvy wanem Bible talem abaotem olketa samting hia. But taem they kasem problem insaed famili bilong themseleva, they no followim nao. Waswe long yumi seleva? No anywan long yumi want for kamap olsem pipol wea Jesus judge-im from they no obeyim komandment bilong God. They say pikinini no need for honorim dadi and mami, from sapos man faithful long religion hem inaf nao. (Matt. 15:4-9) Yumi no want for kamap olketa man wea garem wanfela religion wea say they love-im God but they no followim “insaed long famili bilong themseleva.” But, yumi mas want for showim aot trufela way for love-im God, wea “savvy givim barava gudfela samting.”—1 Tim. 5:4; 6:6; 2 Tim. 3:5.
Hao long Nao Marit Bae Go Ahed?
3. (a) Wanem nao happen long planti marit, but wanem nao yumi want for duim? (b) Use-im Bible bilong yu for answerim olketa question long disfela paragraf abaot way wea marit hem samting for olawe.
3 Way wea marit bilong pipol no go ahed strong hem kamap moa big distaem. Samfela marit pipol wea stap tugeta for 20, 30 or 40 year they decide for startim wanfela “niu laef” withim narafela man or woman. And tu, yumi no sapraes for herem youngfela hasband and waef they separate bihaen fewfela month nomoa wea they marit. Nomata wanem samting other pipol duim, yumi wea worshipim Jehovah mas want for mekem God hapi. Wanem nao Word bilong hem talem abaot diswan?
Taem wanfela man and woman marit, hao long nao they should stap tugeta? (Rom. 7:2, 3; Mark 10:6-9)
Wanem nao only samting wea man savvy divorce long hem wea God agree withim? (Matt. 19:3-9; 5:31, 32)
Hao nao feeling bilong Jehovah abaotem divorce wea no fitim Word bilong hem? (Mal. 2:13-16)
Waswe, Bible supportim way for separate olsem samting for stretem olketa problem bilong marit? (1 Cor. 7:10-13)
4. Nomata planti marit brek daon distaem, why nao samfela marit stap strong?
4 Why nao samfela marit stap strong, but otherfela—nomata marit bilong pipol wea say they Kristian—they brek daon? Way for wait for marit taem boy and girl they full-grown hem wanfela important samting. Way for faendem partner wea garem sem interest and wea hem savvy free for story withim, hem important tu. But samting wea barava important nao hem samwan wea followim trufela way for love-im God. Sapos wanfela man hem really love-im Jehovah and barava believim olketa way bilong Hem they stret, then strongfela faondeson hem stap for deal withim olketa problem wea kamap. (Ps. 119:97, 104; Prov. 22:19) Marit bilong man olsem bae no garem dis kaen tingting, sapos marit no go ahed gud, hem savvy separate from partner bilong hem or divorce-im. Hem bae no use-im olketa weak point bilong partner bilong hem olsem wanfela excuse for no fulfillim olketa responsibility bilong hem. But, hem bae learn for deal withim olketa problem long laef and stretem long gudfela way.
5. (a) Hao nao loyal fashion long Jehovah hem insaed long diswan? (b) Nomata barava hardfela taem hem kamap, wanem gudfela samting nao savvy kam aot from way for hold strong long olketa mark bilong Jehovah?
5 Yumi everywan savvy hao Devil hem say taem yumi suffer yumi bae no want for followim olketa way bilong Jehovah and want for decide-im seleva samting wea gud and bad. But pipol wea loyal long Jehovah they no olsem. (Job 2:4, 5; Prov. 27:11) Planti Jehovah’s Witness wea kasem persecution from partner wea no believe they no lusim marit promis bilong them. (Matt. 5:37) Samfela long olketa, bihaen samfela year wea go past, kasem bigfela hapi taem partner bilong them join withim them for servim Jehovah. (1 Cor. 7:16; 1 Pet. 3:1, 2) But otherfela, wea luk olsem hem hard for partner bilong them change or partner bilong them lusim them from they hold strong long faith bilong them—olketa hia tu kasem bigfela blessing from they hold strong long olketa mark bilong Jehovah. Long wanem way? Living bilong them teachim them for kamap klos long Jehovah. They learn for showim aot olketa fashion bilong God nomata they kasem hardfela taem. They pipol wea living bilong them prove-im power bilong way for love-im God.—Ps. 55:22; Jas. 1:2-4; 2 Pet. 1:5, 6.
Each Wan Duim Part bilong Hem
6. For garem marit wea win, wanem arrangement nao man mas respectim?
6 Hem tru, for mekem marit hem win, man needim moa samting winim way for stap tugeta nomoa. Wanfela main need hem respect wea each member long famili hem garem for hedship arrangement bilong Jehovah. Diswan mekem gudfela order and feeling for stap safe kamap insaed long famili.—1 Cor. 11:3; Titus 2:4, 5; Prov. 1:8, 9; 31:10, 28.
7. Hao nao man mas duim work bilong hed insaed long famili?
7 Hao nao man mas duim work bilong hed? Long way wea showim aot olketa fashion bilong Jesus Kraest. Jesus hem strong for keepim olketa way bilong Jehovah; hem love-im raeteous fashion and hate-im fashion for brekem law. (Heb. 1:8, 9) Hem barava love-im tu kongregeson bilong hem, hem leadim and luk aftarem. Hem no garem proud fashion and fashion for no care, but, hem “garem quiet fashion and hem humble long heart,” and olketa wea stap under long hem they ‘faendem samting for strongim soul bilong them.’(Matt. 11:28, 29; Eph. 5:25-33) Taem hasband and dadi hem deal withim famili bilong hem long way olsem, hem show aot klia hao hem stap under long Kraest, wea showim aot perfect example long way for love-im God. Olketa Kristian mami mas showim aot olketa sem fashion olsem taem they deal withim olketa pikinini bilong them.
8. (a) Insaed samfela famili, why nao hem luk olsem olketa Kristian way no work gud? (b) Wanem nao yumi mas duim sapos samting olsem kasem yumi?
8 But, from man no perfect, olketa problem maet kamap. Fashion for no followim samting wea narafela man talem maet strong insaed long samfela, bifor anywan insaed long famili start for followim olketa Bible principle. Nomata way for askim them samting long kaenfela and loving way hem no work tu. Yumi savvy Bible say for tek-aotem fashion for “kros and fashion for singaot and swear.” (Eph. 4:31) But sapos hem luk olsem samfela no meanim any otherfela way, wanem nao yumi mas duim? Well, wanem nao Jesus duim taem hem kasem bigfela hevi? Hem no followim olketa wea tok raf and tok no gud. But, hem givim hemseleva long Father bilong hem, hem depend long hem. (1 Pet. 2:22, 23) Long sem way tu, sapos olketa problem kamap insaed famili, yumi showim aot way for love-im God sapos yumi tan long Jehovah, pray for help bilong hem, winim way for followim olketa way bilong world.—Prov. 3:5-7.
9. Winim way for lukaotem weak point, wanem way nao planti Kristian hasband they learn for use-im?
9 Way for change hem no samting wea kwiktaem for happen, but kaonsel bilong Bible hem really work. Planti hasband wea savvy complain everytaem abaotem weak point bilong waef bilong them they lukim every samting kamap moabeta, taem olketa seleva ting moa hae long way wea Kraest hem deal withim kongregeson bilong hem. Datfela kongregeson no garem olketa man wea perfect. But, Jesus love-im datfela kongregeson, showim aot stretfela example for hem, and givim laef bilong hem tu for hem, and Jesus use-im olketa Scripture for helpem hem for kamap moabeta mekem Jesus hapi long hem. (Eph. 5:25-27; 1 Pet. 2:21) Example bilong hem helpem planti Kristian hasband for work hard for showim aot gudfela example and for offerim loving help for kamap moabeta. Olketa way olsem kasem gudfela samting winim way for lukaotem olketa weak point bilong man or way for no want for toktok nao.
10. (a) Long wanem way nao wanfela hasband and dadi—nomata wanfela wea say hem Kristian—hem mekem hard living kamap for olketa other wan insaed famili bilong hem? (b) Wanem nao hem savvy duim for mekem every samting kamap moabeta?
10 Hem tru, maet olketa weak point bilong hasband and dadi nao mekem problem kamap insaed long famili. Waswe sapos hem no luksavvy long samting wea famili needim long saed bilong feeling or no really lead for arrangim famili Bible study and otherfela samting? Samfela famili they kasem gudfela samting taem they story stret abaotem disfela problem withim respect. (Prov. 15:22; 16:23; 31:26) But nomata samting wea kamaot from diswan hem no samting wea they hope for kasem, each wan savvy share for mekem famili living kamap moabeta taem they mekem grow olketa fruit bilong spirit and show aot loving way for care for otherfela famili member. Way for kamap moabeta bae kamap, no sapos yumi waitim narafela man for duim samting, but sapos yumi duim part bilong yumi long gudfela way, and there nao show aot yumi followim way for love-im God insaed famili.—Col. 3:18-20, 23, 24.
Wea for Kasem Olketa Answer
11, 12. (a) Wanem nao Jehovah provide-im for helpem yumi withim olketa problem long famili laef? (b) For kasem gudfela samting every bit, wanem nao yumi mas duim?
11 Pipol depend long planti ples for kasem kaonsel for olketa samting bilong famili bilong them. But yumi savvy Word bilong God garem best kaonsel, and yumi hapi from thru long organization bilong hem long earth, hem helpem yumi for followim. Waswe, yu barava kasem gudfela samting from help wea hem givim?—Ps. 119:129, 130; Mic. 4:2.
12 For join withim way for attendim olketa meeting bilong kongregeson, waswe, yu markem taem for havem famili Bible study everytaem? Olketa famili wea duim diswan everytaem each week they garem wan mind long worship bilong them. Famili laef bilong them hem kamap moabeta taem they story abaot way for followim Word bilong God insaed living bilong them.—Lukim Deuteronomy 11:18-21.
13. (a) Sapos yumi garem olketa question long samting bilong marit or famili, wea nao yumi savvy faendem help wea yumi needim? (b) Wanem nao mas show aot long every samting wea yumi decide-im?
13 Maet yu garem samfela question abaotem samfela samting long marit or insaed famili? For example, waswe long way for stopem woman for no bornim pikinini? Waswe, way for katem man and woman mekem they no savvy garem pikinini, hem fitim olketa Kristian? Waswe, hem olraet for killim dae baby insaed bele sapos luk olsem baby bae garem samfela problem long body taem hem born? Waswe, samfela kaen way for duim sex hem no fitim hasband and waef for duim? Sapos wanfela young wan hem no showim aot interest long olketa spiritual samting, hao nao yumi mas deal withim hem long saed bilong way for hem share insaed famili worship? Hem tru yu garem tingting bilong yuseleva abaot each point hia. But waswe, yu savvy answerim olketa hia for fitim olketa Bible principle? Watchtower hem story finis abaot each question hia. Learn for use-im olketa index for faendem material olsem. Sapos yu no garem wanfela old buk wea index talem, luk long library bilong Kingdom Hall. No ting every question bae garem Yes or No answer. Samfela taem yu mas decide—seleva or tugeta olsem hasband and waef. But learn for decide-im samting wea showim aot love bilong yu for Jehovah and for olketa famili member bilong yu. Decide long way wea show aot yu barava want for mekem God hapi. Sapos yu duim olsem, Jehovah and other pipol wea savvy gud long yu bae luksavvy yu barava followim way for love-im God, no long pablik nomoa but insaed famili bilong yu tu.—Eph. 5:10; Rom. 14:19.
Samting for Review
● Hao nao loyal fashion long Jehovah hem join withim way wea man faithful long promis bilong hem long marit?
● Taem yumi garem hevi from olketa famili problem, wanem nao bae helpem yumi for duim samting wea mekem God hapi?
● Nomata sapos samfela insaed famili garem weak point, wanem nao yumi savvy duim for mekem every samting kamap moabeta?