Chapter 21

“Olketa No Part bilong World”

1. (a) Wanem samting nao Jesus hem pray for olketa disaepol bilong hem long naet bifor hem dae? (b) Why nao way for “no part bilong world” hem important tumas?

LONG naet bifor they hangim hem, Jesus pray strong for olketa disaepol bilong hem. From hem savvy they bae kasem barava bigfela hevi from Satan, hem say long Father bilong hem: “Mi no askim yu for tekem them aot from world, but for luk aftarem them from badfela man. Olketa no part bilong world, olsem mi tu no part bilong world.” (John 17:15, 16) Why nao disfela way for stap different from world hem barava important? Bikos Satan nao ruler bilong hem. Hem nao bossim olketa wea part bilong world. (John 14:30; 1 John 5:19) Dastawe, hem important for every Kristian mas savvy wanem nao meaning bilong way for “no part bilong world.” Hao nao diswan hem tru long Jesus?

2. Wanem nao olketa way wea Jesus “no part bilong world”?

² Jesus no stap different from other pipol. Way wea hem “no part bilong world” no meanim hem no garem love for other pipol. But, hem go from taon tu taon and talem them gud nius abaot Kingdom bilong God. Hem healim pipol wea sik, mekem olketa blind lukluk moa, raisim olketa wea dae, and tu hem givim laef bilong hem for olketa man. But hem no love-im no gud fashion and badfela samting wea pipol wea fulap withim spirit bilong world they duim. Hem givim warning againstim way for wantim dirty fashion, living wea aftarem material samting and selfish way for wantim haefela position. (Matt. 5:27, 28; 6:19-21; Luke 12:15-21; 20:46, 47) Winim way for followim living bilong pipol wea stap farawe from God, Jesus wakabaot long olketa way bilong Jehovah. (John 8:28, 29) Nomata Jesus hem wanfela Jew, hem no saed withim anywan long olketa rowa bilong politik midlwan long Rome and olketa Jew.

“Kingdom bilong Mi Hem No Part bilong Disfela World”

3. (a) Wanem nao olketa bigman long religion bilong olketa Jew they accuse-im Jesus long hem long Pilate, and why nao olsem? (b) Wanem nao show aot Jesus no interest for kamap wanfela king taem hem wanfela man yet?

³ But, olketa bigman bilong religion bilong olketa Jew, say Jesus hem trae for change-im gavman. They kasholem hem and tekem hem go long Pontius Pilate, governor bilong Rome. Samting wea really mekem them worry hem from teaching bilong Jesus showim aot klia giaman way bilong them. But for mekem governor hem duim samting, they accuse-im hem olsem: “Mifela faendem disfela man hem spoelem nation bilong yumi and stopem pipol for payim tax long Caesar and hem say hem nao Kraest, wanfela king.” (Luke 23:2) But trufela samting hem olsem, wan year bifor taem olketa pipol want for mekem hem kamap king, Jesus no wantim datwan. (John 6:15) Hem savvy hem bae kamap King long heven and taem for hem kamap King no kam yet, and way wea hem bae kamap king, hem no from samting wea man duim, but from Jehovah God.

4. Wanem nao tingting bilong Jesus abaotem “way for payim tax long Caesar”?

⁴ Long way for payim tax, threefela day bifor they kasholem Jesus, olketa Farisi they trae for mekem hem talem samting wea againstim law. But for answerim trik question bilong them, Jesus say: “Showim mi wanfela denarius [wanfela coin bilong Rome]. Piksa and nem bilong hu nao stap long hem?” Taem they say, “Caesar,” hem answerim them olsem: “Sapos olsem, payim back samting bilong Caesar long Caesar, but olketa samting bilong God long God.”—Luke 20:20-25.

5. (a) Wanem samting nao Jesus teachim olketa disaepol bilong hem taem they kasholem hem? (b) Hao nao Jesus meanim long Pilate samting wea hem duim?

⁵ Samting wea happen long taem wea they kasholem Jesus show aot hem no againstim olketa bilong Rome, and hem no wantim olketa disaepol bilong hem for duim olsem tu. Olketa soldia bilong Rome withim olketa Jew they holem sword and stik and they kam for tekem Jesus. (John 18:3, 12; Mark 14:43) Taem hem lukim diswan, aposol Peter tekem wanfela sword and katem raet ear bilong wanfela long olketa man hia. But Jesus tok strong long hem and say: “Putim back sword bilong yu long ples bilong hem, from olketa wea use-im sword bae dae from sword.” (Matt. 26:51, 52) Long nextfela morning, taem hem stap front long Pilate, Jesus meanim why hem duim diswan, taem hem say: “Kingdom bilong mi hem no part bilong disfela world. Sapos kingdom bilong mi hem part bilong disfela world, olketa wea stap withim mi bae faet for mekem olketa Jew no tekem mi. But, kingdom bilong mi hem no kam from diswan.”​—⁠John 18:36.

6. Wanem nao happen long datfela kot?

⁶ Bihaen hem tingting long every proof hia, Pilate hem say “no any samting prove-im olketa rong wea they talem” againstim Jesus they tru. Nomata olsem, hem followim samting wea pipol wantim and they hangim Jesus.​—⁠Luke 23:13-15; John 19:12-16.

Olketa Disaepol Followim Master bilong Them

7. Hao nao olketa firstfela Kristian show aot they stap klia from spirit bilong world, but they love-im pipol?

⁷ Story abaot olketa firstfela Kristian, insaed long Bible and otherfela buk bilong history, showim aot hao olketa disaepol bilong Jesus they meanim wanem nao they mas duim for “no part bilong world.” They trae hard for stap klia from spirit bilong world. From they nating wantim raf and dirty hapitaem bilong olketa long Rome, pipol mek funny long them and say they hate-im olketa man. But, winim way for hate-im olketa man, they work hard for helpem other pipol for kasem olketa gudfela samting wea God provide-im for salvation.

8. (a) From they “no part bilong world,” wanem nao kasem olketa firstfela disaepol? (b) But hao nao they ting long olketa ruler bilong politik and way for payim tax, and why nao olsem?

⁸ Olsem Master bilong them, pipol barava persecutim them tu, planti taem olketa bigman bilong gavman wea herem liar story abaotem them nao duim diswan. (John 15:18-20) But long samting olsem 56 C.E., aposol Paul raet long olketa Kristian long Rome and strongim moa disfela kaonsel wea Jesus givim. Paul encouragim them for “stap under long olketa wea garem power wea moa hae,” olketa ruler bilong politik, “from no any power hem stap sapos God hem no letem.” Diswan no meanim Jehovah nao startim olketa gavman bilong world, but hem letem them for rul. Paul say they “stap long ples wea God letem them for stap,” from God lukim firstaem and profesi abaot taem wea they bae rul. So “olketa wea garem power wea moa hae” they part long “arrangement bilong God” for disfela taem, go kasem taem wea Kingdom bilong God under long Jesus Kraest kamap only gavman wea rulim earth. So Paul kaonselem olketa Kristian for showim aot proper honor for olketa bigman bilong gavman and for payim tax wea they askim.​—⁠Rom. 13:1-7; Titus 3:1, 2.

9. (a) Wanem nao yumi mas no forgetim taem yumi stap under long “olketa wea garem power wea moa hae”? (b) Hao nao history show aot olketa firstfela Kristian they barava followim example bilong Jesus?

⁹ But, Paul no talem them for stap under long them every bit and no ting long God, Word bilong God and Kristian conscience bilong them. They savvy Jesus worshipim Jehovah nomoa, hao Jesus no want for letem olketa pipol mekem hem kamap king and hao hem talem Peter for putim back sword bilong hem. They followim Master bilong them every bit. Datfela buk On the Road to Civilization—A World History (wea Heckel and Sigman raetem, page 237, 238) hem say olsem: “Olketa Kristian no share insaed samfela work bilong olketa pipol bilong Rome. Olketa Kristian . . . ting way for joinim army hem go againstim faith bilong them. They no want for kamap bigman long gavman. They no worshipim king.”

10. (a) Wanem nao olketa Kristian long Jerusalem they duim long 66 C.E.? Why nao they duim olsem? (b) Long wanem way nao datwan showim aot gudfela example?

¹⁰ Long saed bilong olketa rowa bilong politik and army long taem bilong them, olketa disaepol bilong Jesus nating saed withim anywan. Long year 66 C.E., olketa Jew long province bilong Judea wea olketa long Rome luk aftarem, they go againstim Caesar. Army bilong Rome kwiktaem raonem Jerusalem. Wanem nao olketa Kristian long datfela taon they duim? They rememberim kaonsel bilong Jesus for no saed withim anywan and for ranawe from olketa army hia wea faetem each other. Taem army bilong Rome hia they go awe for lelebet taem, olketa Kristian use-im disfela chance for ranawe and katkros long Jordan River go long olketa maunten bilong Pella. (Luke 21:20-24) Way wea they no saed withim anywan showim aot gudfela example for olketa Kristian bihaen long them for followim.

Olketa Kristian Wea No Saed Withim Anywan long Taem bilong End

11. (a) Wanem work nao olketa Jehovah’s Witness busy for duim, and why nao olsem? (b) Long wanem samting nao they no saed withim anywan?

¹¹ Waswe, history show aot any sekson long disfela “taem bilong end,” start kam long 1914 C.E., they followim olketa firstfela Kristian long way for no saed withim anywan? Yes, olketa Jehovah’s Witness they duim olsem. Long whole earth they busy for preach abaotem way wea Kingdom bilong God nao only way for pipol wea love-im raeteous fashion savvy kasem peace, gudfela living and hapi olawe long whole earth. (Matt. 24:14) But long saed bilong olketa rowa midlwan long olketa nation, they barava strong for no saed withim anywan.

12. (a) Hao nao way wea olketa Witness no saed withim anywan hem different withim samting wea olketa bigman bilong religion they duim? (b) Way for no saed withim anywan long saed bilong politik hem meanim wanem for olketa Jehovah’s Witness?

¹² Long way wea different every bit, olketa bigman bilong Kristendom they barava join insaed long politik bilong disfela world. Long samfela kantri they strong for supportim or againstim pipol wea want for stap ­insaed gavman. Samfela bigman bilong religion tu they kamap bigman bilong gavman. Samfela putim bigfela hevi long olketa bigman bilong gavman mekem they supportim olketa idea wea they wantim. Long samfela ples, samfela bigman bilong religion they fren gud withim olketa bigman bilong gavman but otherfela priest and minister they supportim sekson wea faet againstim gavman. But, olketa Jehovah’s Witness they no join insaed politik, nomata wanem kantri they stap insaed. They no stopem other pipol for joinim wanfela sekson bilong gavman, or for kamap member or vote long election. But, from Jesus say olketa disaepol bilong hem bae “no part bilong world,” olketa Jehovah’s Witness nating join long any samting bilong politik.

13. Long saed bilong way for join insaed long war, wanem nao olketa Jehovah’s Witness duim?

¹³ Olsem Jesus profesi abaot, long disfela “taem bilong end” olketa nation they insaed long war planti taem, and samfela sekson insaed olketa nation they go againstim each other tu. (Matt. 24:3, 6, 7) But taem every samting hia happen, wanem nao olketa Jehovah’s Witness they duim? Long every ples long world they savvy hao olketa hia no saed withim anywan insaed olketa rowa olsem. Long sem way wea Jesus and olketa firstfela disaepol bilong hem showim aot, Watchtower say olsem long November 1, 1939 issue: “Everywan long saed bilong Lord bae no saed withim anywan long olketa nation wea faet, and bae supportim every bit saed bilong nambawan man bilong Theocracy [Jehovah] and King bilong hem [Jesus Kraest].” Olketa Jehovah’s Witness long every nation wea garem different kaen living they go ahed for hold strong long diswan. They no letem politik bilong world wea divaedem pipol and olketa war for brekem way wea they olketa brata everywea long world wea worshipim Jehovah.​—⁠Isa. 2:3, 4; lukim 2 Corinthians 10:3, 4.

14. (a) From they no saed withim anywan, wanem moa olketa Witness no willing for duim? (b) Hao nao they meanim diswan?

¹⁴ History show aot hao, insaed long fifty year wea go past finis, olketa Jehovah’s Witness nating willing for wearim kaleko for faet and for go long war. And tu, they no willing for duim any work for supportim war or otherfela work for change-im way for joinim army. Why nao olsem? From they studyim olketa law bilong God and then they decide-im samting seleva followim conscience bilong them. No anywan talem them wanem for duim. And they no force-im idea bilong them long wanem other pipol choose for duim. But taem pipol askim them for meanim position bilong them, olketa Jehovah’s Witness talemaot, from they dedicate-im themseleva long God, they mas use-im body bilong them long service bilong hem and kanduit for givim themseleva long olketa man long earth wea duim samting wea different from purpose bilong God.​—⁠Rom. 6:12-14; 12:1, 2; Mic. 4:3.

15. (a) From they stap different from world, wanem nao olketa Jehovah’s Witness kasem? (b) Nomata taem they stap long prison, hao nao olketa Kristian principle leadim them?

¹⁵ Samting wea happen from diswan nao hem olsem Jesus talem: “From yufela no part bilong disfela world . . . world hem hate-im yufela.” (John 15:19) Planti Jehovah’s Witness go long prison from they no want for lusim Kristian fashion bilong them for no saed withim anywan. Samfela kasem barava raf-fela persecution, go kasem taem they dae from diswan. Otherfela they go ahed for show aot they no saed withim anywan taem they stap insaed prison. Datfela buk Values and Violence in Auschwitz (wea Anna Pawelczynska raetem, page 89) say olsem: “Everywan savvy no any Jehovah’s Witness [wea insaed long datfela concentration camp] bae followim komand for duim samting wea againstim belief bilong hem or any samting wea againstim narafela man, nomata sapos man hia hem man for killim dae man or hem wanfela SS soldia. Nomata olsem, hem bae duim best bilong hem long any work, nomata work hia hem barava dirty work, sapos datfela work hem fitim hem for no saed withim anywan.”

16. (a) Wanem nao olketa nation they march go for hem? So wanem nao olketa Jehovah’s Witness they lukaot for stap klia from? (b) Why nao way for stap different from world hem barava important samting?

¹⁶ Olketa Jehovah’s Witness luksavvy every nation they march go long “war bilong bigfela day bilong God Olmaeti” long Armageddon. Olsem pipol wea garem wan mind, olketa servant bilong Jehovah they saed withim Kingdom bilong Messiah bilong Hem. So they lukaot for stap klia from any samting wea mekem them againstim datfela Kingdom. (Rev. 16:14, 16; 19:11-21) They ting hae long way wea toktok bilong Jesus hem important taem hem say olketa trufela follower bilong hem they “no part bilong world.” They savvy disfela old world bae klosap for finis, and olketa wea really duim will bilong God nomoa bae stap olawe.​—⁠1 John 2:15-17.

Samting for Review

● Hao nao Jesus showim aot meaning bilong way for “no part bilong world”?

● Wanem nao showim aot tingting bilong olketa first­fela Kristian long saed bilong (1) spirit bilong world? (2) olketa ruler bilong world and way for payim tax? (3) way for joinim army?

● Wanem nao olketa way wea olketa Jehovah’s Witness distaem showim aot Kristian way bilong them for no saed withim anywan?