Waswe, Religion Shud Join Insaed Politik?

Evriwea lo world, staka pipol wea sei olketa followim Jesus Christ olketa barava join insaed lo politik. Samfala trae for mekhae lo religion or standard blo olketa, taem olketa sapotim wanfala candidate or politikol party. Then olketa politician savve iusim olketa samting wea happen lo kantri for mekem olketa lotu pipol for sapotim olketa. Staka taem, olketa bigman blo religion tu ran lo election for member lo gavman. Lo samfala kantri, wanfala lo olketa “Christian” religion hia maet garem paoa lo region, kantri, or olketa religion lo there.

Wat nao tingting blo iu? Hao, olketa follower blo Christ shud join insaed lo politik? Iu savve kasem ansa taem iu lukluk lo example blo Jesus. Hem sei: “Mi showim wei for iufala followim, mekem samting wea mi duim long iufala, iufala mas duim long narawan tu.” (John 13:15) Lo saed blo politik, wat kaen example nao Jesus showimaot for iumi?

Hao, Jesus hem join insaed lo politik?

Nomoa. Jesus no join insaed lo politik blo disfala world.

Jesus no laek for kasem paoa insaed lo politik. Jesus no acceptim for kamap ruler lo gavman blo man taem Satan showim hem “ evri kantri long world.” (Matthew 4:8-10)a Lo narataem, pipol luksavve Jesus garem olketa gudfala wei wea bae mekem hem kamap gudfala leader, so olketa trae for forcem hem for join insaed lo politik. Bible sei: “From Jesus savve bae olketa kam holem hem for mekem hem king, hem go bak seleva moa long datfala maunten.” (John 6:15) Jesus no laek for duim wat olketa pipol hia askem hem for duim. Diswan hem from Jesus no laek for join insaed lo politik.

Jesus no teksaed lo eni politikol issue. For example, taem Jesus stap lo earth olketa Jew no hapi for peim tax for gavman blo Rome and olketa ting lo datwan olsem hevi samting. Taem olketa trae for mekem Jesus for teksaed lo datfala issue, hem no laek for join insaed lo raoa blo politik for peim tax. Hem sei: “Givim go bak long King samting wea hem bilong King, and givim go bak long God samting wea hem bilong God.” (Mark 12:13-17) Jesus gohed for no teksaed lo olketa politikol issue bat luksavve pipol shud peim tax wea gavman blo Rome askem, bikos datwan hem blo King. Bat lo semtaem, hem talem hao wei for obeyim gavman hem garem limit. Wanfala man no savve givim lo gavman samting wea hem blo God, insaed diswan hem wei for disaed strong for worshipim God.—Matthew 4:10; 22:37, 38.

Jesus sapotim and teachim olketa narawan abaotem Kingdom blo God. (Luke 4:43) Jesus no join insaed politik bikos hem savve Kingdom blo God nomoa bae duim wat God laekem for disfala earth, and no gavman blo man. (Matthew 6:10) Jesus savve Kingdom blo God bae no iusim olketa gavman blo man for duim waka blo hem bat hem nao bae changem olketa.—Daniel 2:44.

Waswe, olketa Christian lo first-century join insaed lo politik?

Nomoa. Olketa follower blo Jesus obeyim komand wea hem talem for “no olsem pipol long world.” (John 15:19) Olketa followim example blo Jesus and no join insaed lo politik. (John 17:16; 18:36) Winim wei for join insaed lo politik, olketa duim waka wea Jesus komandim wea hem nao for preach and teachim pipol abaotem Kingdom blo God.—Matthew 28:18-20; Acts 10:42.

Important samting lo laef blo olketa Christian lo first-century hem for obeyim God, bat olketa savve tu dat olketa shud respectim gavman. (Acts 5:29; 1 Peter 2:13, 17) Olketa obeyim olketa law blo gavman and peim tax. (Rome 13:1, 7) Nomata olketa no join insaed lo politik, olketa hapi for iusim tu law blo kantri for kasem protection and olketa service wea gavman provaedem.—Acts 25:10, 11; Philippi 1:7.

Olketa Christian distaem tu no teksaed

Bible showimaot klia hao Jesus and olketa follower blo hem lo bifor tu no join insaed lo politik. From datwan, Olketa Jehovah’s Witness evriwea lo world gohed for stap neutral. And olsem olketa Christian lo first-century, Olketa Jehovah’s Witness tu preachim “disfala gud nius abaotem Kingdom” wea Jesus komandim olketa Christian for duim.—Matthew 24:14.