Shepherdim Sheepsheep Bilong God Withim Wan Mind
Samfala ask olsem: ‘Hu nao luk aftarem kongregeson bilong Olketa Witness Bilong Jehovah evriwea long world?’ Mifala ansa olsem: Arrangement for luk aftarem hem followim example bilong Kristian kongregeson long first century.
Bihaen 1870, Charles T. Russell and olketa wea hem work withim start for share-im savvy wea olketa kasem from Bible study bilong olketa thru long olketa tok and buk. Evriwea long kantri, pipol wea choose for duim disfala work ting long Russell and olketa wea hem work withim olsem sekson wea garem bigfala savvy for duim work bilong Lord and wea savvy givim advice long saed bilong work wea olketa duim.
Long 1884 Zion’s Watch Tower Tract Society hem kamap under long law bilong Commonwealth of Pennsylvania. Russell and olketa wea hem work withim leadim disfala Society and work bilong olketa Bible Student. Long 1909 olketa muvim hedquarter bilong olketa go long Brooklyn, New York. Bihaen, olketa director bilong Watch Tower Society and samfala anointed man wea work klosap withim olketa, wea kasem mark long spiritual way, serve olsem wanfala governing body for Olketa Witness Bilong Jehovah.
Governing Body hem wanfala sekson bilong samfala anointed Kristian man (10 long 1997), insaed diswan hem 7-fala wea serve long board of directors bilong Watch Tower Society. Olketa hia luk aftarem work bilong Olketa Witness Bilong Jehovah evriwea long world. God no tok stret thru long olketa and so olketa savvy mekem mistek, but olketa depend long Word bilong God wea stret evribit winim eni savvy long earth, and olketa hia spendem planti year long laef bilong olketa for duim will bilong God. Each wan spendem average bilong 60 year long full-taem ministry withim Olketa Witness Bilong Jehovah.
Governing Body luk aftarem samting wea Society pablisim. Samting wea olketa raetem hem kam from way wea olketa lukim spiritual need bilong sheepsheep and wea olketa prea abaotem and duim gudfala study and research long Word bilong God. Taem olketa man hia go ahed for studyim Bible and lukim way wea olketa purpose bilong God muv ahed, way wea Bible profesi fulfill, and living bilong pipol bilong God long world, maet samfala taem olketa need for mekem samfala change long way for meanim samfala teaching. Long disfala way, savvy bilong truth kamap moa big.—Psalm 97:11; Proverbs 4:18; Daniel 12:4.
Governing Body hem appointim Branch Komiti wea garem threefala or moa man wea kasem mark long spiritual way long each wan long 104 branch evriwea long earth for luk aftarem olketa work long 233 kantri and island. Olketa branch story tugeta withim olketa kongregeson wea olketa luk aftarem. Governing Body and olketa Branch Komiti story tugeta evritaem, and samfala member bilong Governing Body visitim planti branch each year mekem olketa savvy wanem nao go ahed.
Olketa man hia no masta ovarem faith bilong otherfala pipol but olketa nao minister wea work hard mekem planti otherfala pipol savvy learn abaotem Word bilong God. Olketa no kasem selen for work bilong olketa, but olketa kasem material samting wea olketa needim long sem way olsem evri otherfala member bilong Bethel famili. Samting wea prove-im olketa serve long faithful way hem show aot long strong, wan mind, hae mark long saed bilong fasin, and loyal fasin long olketa Bible teaching wea Olketa Witness Bilong Jehovah showim aot evriwea long world.—1 Corinthians 3:5-9; 4:1, 2; 2 Corinthians 1:24; 3:1-3; 1 Peter 5:2, 3.
• Wanem arrangement nao kamap for luk aftarem work?
• Hu nao serve long Governing Body distaem, and wanem nao responsibility bilong olketa?
• Hao nao olketa luk aftarem work long olketa different kantri?
[Map long page 26]
Olketa ples wea Olketa Witness Bilong Jehovah duim will bilong God
(For full formatted text, lukim pablikeson)
[Piksa long page 26]
Olketa president bifor, Watch Tower Society
C. T. Russell, 1884-1916
J. F. Rutherford, 1917-1942
N. H. Knorr, 1942-1977
F. W. Franz, 1977-1992
[Piksa long page 27]
Samfala long 90 branch office wea luk aftarem work bilong Olketa Witness Bilong Jehovah evriwea long world
Canada
Zambia
Germany
Japan
Australia
Brazil