Chapter 6
Why Nao Yumi Kamap Olo and Dae?
1. Wanem nao olketa scientist no savvy meanim abaotem laef bilong olketa man?
OLKETA scientist no savvy why nao olketa man kamap olo and dae. Luk olsem olketa cell bilong yumi fit for go ahed for kamap niu everytaem and yumi fit for laef olawe. Wanfela buk Hyojun Soshikigaku (Standard Histology) hem say: “Samting wea barava hard for meanim nao hem way wea olketa cell wea kamap olo hem join withim way wea man kamap olo and dae.” Planti scientist they say “samfela samting” savvy stopem man for laef for longfela taem. Waswe, yu ting they stret?
2. Wanem nao samfela they duim bikos laef hem short tumas?
2 Olketa man they barava want for garem longfela laef and they trae for kasem laef olawe tu. Start kam long mek-foa century B.C.E., olketa medicine wea they say savvy mekem man laef olawe hem samting wea olketa king long China they interest tumas long hem. Bihaen, samfela king long China they traem olketa medicine hia for mekem man garem longfela laef—wea they workim from mercury—but they dae! Long every ples long earth, pipol believim hao dae hem no end bilong laef bilong them. Olketa Buddhist, Hindu, Muslim, and planti other pipol garem bigfela hope for wanfela laef bihaen long dae. Long Kristendom, planti ting long hapi laef long heven wea they bae garem bihaen.
3. (a) Why nao olketa man want for laef olawe? (b) Wanem nao olketa kwestin abaotem dae wea needim ansa?
3 Olketa idea for kasem hapi bihaen long dae hem showim aot way wea olketa man they laek for laef olawe. “Hem putim fashion for stap olawe insaed long heart bilong them,” Bible hem say abaotem idea bilong way for stap olawe wea God putim insaed long yumi. (Ecclesiastes 3:11) Hem create-im firstfela man and woman wea fit for stap olawe long earth. (Genesis 2:16, 17) So, why nao olketa man they dae? Hao nao dae hem kam insaed long world? Savvy wea God provide-im hem ansarem olketa kwestin hia.—Psalm 119:105.
WANFELA BADFELA PLAN
4. Hao nao Jesus showim aot klia man wea bringim dae long olketa man?
4 Fashion bilong badfela man hem for haedem olketa badfela samting wea hem duim. Man wea bringim dae long planti billion pipol, hem duim sem samting tu. Hem haedem olketa samting wea kamap for mekem way wea man dae olsem samting wea hard for meanim. Jesus Kraest showim aot hu nao disfela badfela man taem Hem say olsem long olketa wea want for killim Hem dae: “Yufela kam from dadi bilong yufela Devil, and yufela want for duim samting wea dadi bilong yufela wantim. Hem nao man for killim dae man from taem wea hem first start, and hem no hold strong long truth, from truth no stap long hem.”—John 8:31, 40, 44.
5. (a) Hao nao dat wan wea kamap Satan the Devil hem start? (b) Wanem nao tufela word “Satan” and “Devil” they meanim?
5 Tru nao, Devil hem barava no gud “man for killim dae man.” Bible show aot hem wanfela really person, no badfela samting insaed long heart bilong man. (Matthew 4:1-11) Nomata God create-im hem olsem wanfela raeteous angel, “hem no hold strong long truth.” Dastawe hem barava fitim for garem nem Satan the Devil! (Revelation 12:9) Hem garem nem “Satan,” or “man for againstim man,” bikos hem againstim Jehovah. Disfela badfela man hem garem nem “Devil” tu, wea meanim “man for spoelem nem bilong man,” from hem barava tok spoelem God.
6. Why nao Satan go againstim God?
6 Wanem nao muvim Satan for againstim God? Greedy fashion. Hem greedy and covetim worship wea olketa pipol givim long Jehovah. Devil hem no rejectim datfela feeling for wantim worship olsem, wea Creator nomoa fit for kasem. (Lukim Ezekiel 28:12-19.) But, datfela angel wea kamap Satan hem go ahed for mekem disfela greedy feeling for grow go kasem taem hem ready and hem bornim sin.—James 1:14, 15.
7. (a) Wanem nao mekem olketa man they dae? (b) Wanem nao sin?
7 Yumi luksavvy nao long dat wan wea duim no gud samting wea leadim olketa man go long dae. But wanem nao mekem olketa man they dae? Bible hem say: “Paoa bilong dae hem kam from sin.” (1 Corinthians 15:56) And wanem nao sin? For meanim disfela word, letem yumi lukluk long meaning bilong hem long olketa firstfela langwis wea they raetem Bible long hem. Hebrew and Greek word wea they transletim “for sin” hem meanim “for misstim,” long way for misstim wanfela mark or no kasem wanfela goal. Wanem kaen mark nao yumi everywan misstim? Mark bilong way for obeyim God long perfect way. But, hao nao sin hem kam insaed long world?
HAO HEM FOLLOWIM DATFELA PLAN
8. Hao nao Satan trae for mekem olketa man worshipim hem?
8 Satan hem mekem wanfela plan wea hem ting bae mekem hem rulim every man and bae they worshipim hem. Hem decide for sweetim firstfela man and woman, Adam and Eve, for sin againstim God. Jehovah hem givim savvy long firstfela dadi and mami bilong yumi wea fit for lead go long laef olawe. They savvy Creator bilong them hem garem gudfela fashion bikos hem putim tufela insaed long nicefela gaden bilong Eden. Adam hem barava lukim gudfela fashion bilong Father bilong hem long heven taem God givim hem wanfela waef wea luk nice tumas and wea helpem hem tu. (Genesis 1:26, 29; 2:7-9, 18-23) Way wea firstfela man and woman bae go ahed for laef hem depend long way wea they obeyim God.
9. Wanem komand nao God givim long firstfela man, and why nao diswan hem balance?
9 God komandim Adam: “From every tree bilong gaden yu savvy kaikai. But long datfela tree bilong savvy long gud samting and bad samting yu mas no kaikai long hem, from long day wea yu kaikai long hem yu mas dae.” (Genesis 2:16, 17) Olsem Creator, Jehovah God fit for putim olketa mark long saed bilong fashion and for meanim wanem nao hem gud and wanem nao hem bad for olketa wea hem create-im. Datfela komand hem balance bikos Adam and Eve they free for kaikaim fruit from every otherfela tree long gaden. They savvy showim aot way for ting hae long way wea Jehovah fit for rul taem they obeyim law bilong hem winim way for putim olketa mark bilong themseleva long saed bilong fashion.
10. (a) Wanem nao Satan duim long olketa man for pullim them for saed withim hem? (b) Satan hem say wanem nao olketa samting wea muvim Jehovah? (c) Wanem nao yu ting abaotem way wea Satan attackim God?
10 Devil hem plan for pullim firstfela man and woman awe from God. For sweetim them for saed withim hem, Satan hem liar long them. Hem use-im wanfela snek, and withim voice bilong hem, hem mekem for luk olsem datfela snek nao hem toktok. Devil askim Eve olsem: “Waswe, hem really tru God talem yu for no kaikai from every tree bilong gaden?” Taem Eve talem moa komand bilong God, Satan say: “Bae yu nating dae.” Then hem say olketa badfela tingting nao muvim Jehovah for givim datfela komand. Hem say: “God hem savvy long day wea yu kaikai long hem, eye bilong yu bae open and yu bae kamap olsem God, savvy long gud samting and bad samting.” (Genesis 3:1-5) So Devil hem givim idea hao God hem holem back gudfela samting. Hem barava tok spoelem loving Father long heven, wea savvy talem tru samting everytaem!
11. Hao nao Adam and Eve kamap fren bilong Satan?
11 Eve luk moa long datfela tree, and hem laekem tumas fruit bilong hem. So hem tekem fruit hia and kaikaim. Bihaen, hasband bilong hem willing for joinim hem for duim disfela sin for no obeyim God. (Genesis 3:6) Nomata Devil trikim Eve, hem and Adam supportim plan bilong Satan for rulim olketa man. Hem olsem they fren withim Satan nao.—Romans 6:16; 1 Timothy 2:14.
12. Wanem nao kamaot from way wea olketa man go againstim God?
12 Adam and Eve mas face-im samting wea kamaot from wanem they duim. They nating kamap olsem God, and garem spesel savvy. But they feel shame and haedem themseleva. Jehovah askim Adam for givim ansa and diswan nao samting wea hem talem bae kasem Adam: “Long sweat bilong face bilong yu, yu bae kaikaim bred go kasem taem yu go back long graon, bikos yu kamaot from hem. Yu dust nomoa and yu bae go back long dust.” (Genesis 3:19) “Long day” wea firstfela dadi and mami bilong yumi they kaikai from datfela tree bilong savvy bilong gud samting and bad samting, they kasem panis from God and they dae nao long eye bilong hem. Hem raosem them from datfela Paradaes and they start for go-go for dae long saed bilong body.
HAO SIN AND DAE KAMAP MOA BIG
13. Hao nao sin go kasem every man?
13 Hem luk olsem Satan hem win nao long plan bilong hem for kasem worship from olketa man. But, hem no savvy mekem olketa wea worshipim hem for laef olawe. Taem sin hem start for affectim firstfela man and woman, they no savvy givim go way for perfect long olketa pikinini bilong them. Olsem wanfela raeting wea they katem go long wanfela stone, sin hem stap deep insaed long firstfela dadi and mami bilong yumi. So, they savvy only bornim olketa pikinini wea no perfect. From every pikinini bilong them they born bihaen Adam and Eve they sin, olketa pikinini bilong them born withim sin and dae.—Psalm 51:5; Romans 5:12.
14. (a) Olketa wea denyim way wea they sin they olsem hu nao? (b) Wanem nao mekem olketa Israelite luksavvy long way wea they sinner?
14 But distaem, planti pipol ting they no olketa sinner. Long samfela part bilong world, planti pipol nating savvy hao they born withim sin. But diswan no prove-im sin hem no stap. Wanfela boy wea face bilong hem dirty maet say hem klin, and sapos hem no luk insaed long mirror bae hem go ahed for ting say hem klin. Olketa Israelite bifor they olsem boy hia taem they kasem Law bilong God thru long profet bilong Hem, Moses. Law hem showim aot klia hao sin hem stap. Aposol Paul hem say: “Tru nao, mi bae nating savvy long sin sapos Law hem no stap.” (Romans 7:7-12) Olsem boy wea luk insaed long wanfela mirror, taem they use-im Law for lukluk long themseleva, olketa Israelite savvy lukim hao they no klin long eye bilong Jehovah.
15. Wanem nao show aot klia taem yumi lukluk insaed long mirror bilong Word bilong God?
15 Taem yumi lukluk insaed long mirror bilong Word bilong God and lukim olketa mark bilong hem, yumi savvy lukim hao yumi no perfect. (James 1:23-25) For example, tingim samting wea Jesus Kraest talem long olketa disaepol bilong hem abaotem way for love-im God and neibor bilong them long Matthew 22:37-40. Olketa man they planti taem misstim mark long olketa samting hia! Planti man no feel guilty lelebet taem they fail for show aot love for God or for neibor bilong them.—Luke 10:29-37.
LUKAOT LONG OLKETA TRIK BILONG SATAN!
16. Wanem nao yumi savvy duim for misstim olketa trik bilong Satan, and why nao diswan hem hard?
16 Satan hem trae hard for mekem yumi want for duim sin. (1 John 3:8) Waswe, any way hem stap for misstim olketa trik bilong hem? Yes, but diswan meanim yumi mas faet againstim olketa feeling for want for duim sin. Diswan hem no easy bikos olketa feeling for duim sin wea yumi born withim they strong for gud. (Ephesians 2:3) Paul hem need for really faet strong. Why? Bikos sin stap insaed long hem. Sapos yumi wantim God for hapi long yumi, yumi tu mas faetem olketa feeling for duim sin wea insaed long yumi.—Romans 7:14-24; 2 Corinthians 5:10.
17. Wanem nao mekem way for faet againstim olketa feeling for duim sin hem moa hard?
17 From Satan hem everytaem lukaotem chance for sweetim yumi for brekem olketa law bilong God, faet bilong yumi againstim sin hem no easy. (1 Peter 5:8) Taem hem show aot hem worry for olketa otherfela Kristian, Paul hem say: “Mi fraet, olsem snek hem giamanim Eve long trik bilong hem, maet mind bilong yufela bae lusim stretfela and klinfela fashion wea fitim Kraest.” (2 Corinthians 11:3) Satan use-im olketa sem kaen trik distaem. Hem trae for plantim olketa seed bilong way for daotem gudfela fashion bilong Jehovah and olketa gudfela samting wea kamaot from way for obeyim olketa komand bilong God. Devil hem trae for use-im olketa feeling for duim sin wea yumi born withim and for mekem yumi aftarem proud fashion, greedy fashion, fashion for hate, and fashion for againstim man wea garem different color skin.
18. Hao nao Satan use-im world for mek hae long sin?
18 Wanfela trik wea Devil use-im for againstim yumi hem disfela world, wea stap long paoa bilong hem. (1 John 5:19) Sapos yumi no lukaot gud, olketa badfela pipol wea no honest wea stap long world raonem yumi bae putim hevi long yumi for duim olketa no gud samting wea againstim olketa mark bilong God long saed bilong fashion. (1 Peter 4:3-5) Planti no want for savvy long olketa law bilong God and they no want for listen tu long conscience bilong them, so go-go conscience bilong them no garem feeling nao. (Romans 2:14, 15; 1 Timothy 4:1, 2) Samfela they easyeasy followim living wea bifor, conscience bilong them no letem them for duim.—Romans 1:24-32; Ephesians 4:17-19.
19. Why nao way for garem klinfela living nomoa hem no inaf?
19 Way for garem klinfela living hem no easy samting long disfela world. But, for mekem Creator bilong yumi hapi, yumi need for duim moa samting. Yumi mas garem faith tu long God and luksavvy hao yumi garem responsibility long hem. (Hebrews 11:6) Disaepol James hem raet olsem: “Sapos man savvy hao for duim stretfela samting but hem no duim, datwan hem wanfela sin for hem.” (James 4:17) Yes, way for mean for no luksavvy long God and olketa komandment bilong hem, hem wanfela sin.
20. Hao nao Satan maet trae for stopem yu for duim stretfela samting, but wanem nao bae helpem yu for winim olketa samting hia?
20 Satan bae mekem pipol againstim way wea yu lukaotem savvy bilong God thru long study wea yu duim long Bible. Mifela hope yu bae no letem olketa hevi olsem for stopem yu for duim stretfela samting. (John 16:2) Nomata planti ruler putim faith long Jesus taem hem duim ministry bilong hem, they no talem long hem bikos they fraetem way wea pipol bilong them bae aotem them. (John 12:42, 43) Satan hem nating hold back for mekem fraet anywan wea lukaotem savvy bilong God. But, yu mas everytaem rememberim and ting hae long olketa nambawan samting wea Jehovah hem duim finis. Yu maet helpem tu olketa wea againstim yu for garem sem kaen way for ting hae long Jehovah.
21. Hao nao yumi savvy winim world and olketa feeling bilong yumi for duim sin?
21 Taem yumi no perfect, yumi bae sin. (1 John 1:8) Nomata olsem, yumi garem help long disfela faet. Yes, yumi fit for winim disfela faet bilong yumi againstim badfela man, Satan the Devil. (Romans 5:21) Long end bilong ministry bilong Jesus long earth, hem encouragim olketa follower bilong hem withim olketa toktok hia: “Long world yufela kasem trabel, but stand strong! Mi winim world finis.” (John 16:33) Olketa man wea no perfect tu fit for winim disfela world withim help bilong God. Satan no fit for bossim olketa wea againstim hem and wea “stap under long God.” (James 4:7; 1 John 5:18) Olsem yumi bae lukim, God hem provide-im way for yumi kamap free from sin and dae.
TESTIM SAVVY BILONG YU
Hu nao Satan the Devil?
Why nao olketa man kamap olo and dae?
Wanem nao sin?
Hao nao Satan pullim pipol for mean for duim sin againstim God?
[Full picture long page 54]