Chapter 9
Wanem Nao Happen Long Olketa wea Yumi Love-im wea Dae Finis?
1. Hao nao feeling bilong pipol taem wanfela wea they love-im hem dae?
“MAN savvy feel no gud tumas taem samwan wea hem love-im hem dae, bikos dat wan hem no moa nao and yumi no savvy ples bilong hem.” Datwan nao samting wea wanfela man hem talem bihaen dadi bilong hem dae, and bihaen mami bilong hem dae tu. Pain and empty feeling wea hem kasem mekem hem feel olsem “hem draon long olketa feeling bilong hem.” Maet yu tu suffer olsem. Yu maet ting wea nao olketa wea yu love-im they stap and sapos yu bae lukim them moa.
2. Wanem nao olketa kwestin wea kamap abaotem dae?
2 Samfela pipol say long olketa dadi and mami wea lusim pikinini bilong them, “God hem tekem olketa barava nicefela flaoa long heven.” Waswe, diswan hem tru? Waswe, olketa wea yumi love-im wea dae they go long wanfela ples bilong olketa spirit? Waswe, they stap long Nirvana, wea samfela say hem way for free from pain and for wantim samting? Waswe, olketa wea yumi love-im they go thru long wanfela door for kasem laef wea no savvy dae insaed long paradaes? Or olsem otherfela pipol talem, dae lead go for kasem pain wea no savvy finis for olketa wea mekem God kros? Waswe, olketa wea dae finis savvy affectim laef bilong yumi? For kasem stretfela ansa long olketa kwestin olsem, yumi need for luk insaed long Word bilong God, Bible.
WANEM NAO “SPIRIT” WEA INSAED LONG OLKETA MAN?
3. Wanem tingting nao Socrates and Plato they garem abaotem olketa wea dae finis, and hao nao diswan affectim pipol distaem?
3 Tufela savvyman bilong Greece bifor, Socrates and Plato, they believe samting wea no savvy dae hem stap insaed long olketa man and woman—wanfela soul wea stap and nating savvy finis bihaen man hem dae. Distaem planti million pipol believim diswan. Planti taem disfela belief mekem pipol barava fraetem olketa wea dae and hem mekem them worry abaotem olketa tu. Bible hem teachim yumi different samting abaotem olketa wea dae finis.
4. (a) Wanem nao Genesis talem yumi abaotem soul? (b) Wanem nao God putim insaed long Adam for mekem hem laef?
4 Taem yumi tingim hao nao olketa wea dae finis, yumi mas remember hao firstfela dadi bilong yumi, Adam, hem no garem wanfela soul. Hem nao wanfela soul. Long taem bilong creation, God mekem man—wanfela soul—from graon and then hem breathe-im “wind bilong laef” insaed long hem. Genesis 2:7 say olsem long yumi: “Jehovah God hem go ahed for workim man from dust bilong graon and for blowim wind bilong laef go insaed long nose bilong hem, and man hem kamap wanfela living soul.” Adam hem laef taem hem go ahed for breathe. But, samting moa hem insaed long way for blowim wind insaed long body bilong man taem God putim wind bilong laef insaed long Adam. Bible hem tok abaotem “paoa bilong laef” wea stap insaed long every samting wea laef long earth.—Genesis 7:22.
5, 6. (a) Wanem nao “paoa bilong laef”? (b) Wanem nao happen taem “spirit” wea Psalm 146:4 hem story abaot hem stop for mekem body hem work?
5 Wanem nao “paoa bilong laef”? Hem samting wea startim laef wea God putim insaed long body bilong Adam wea no laef yet. Disfela paoa hem go ahed for work taem man hem breathe. But wanem nao “spirit” wea Psalm 146:4 hem story abaot? Datfela verse say olsem abaotem man wea dae: “Spirit bilong hem go aot, hem go back long graon; long datfela day tingting bilong hem finis every bit.” Taem olketa man wea raetem Bible they use-im datfela word “spirit” long way olsem, they no tingim wanfela soul wea lusim body wea go ahed for laef bihaen body hem dae.
6 Disfela “spirit” wea lusim man taem hem dae hem datfela laef paoa wea kam from Creator bilong yumi. (Psalm 36:9; Acts 17:28) Disfela laef paoa hem no garem olketa fashion olsem man wea stap laef, long sem way wea electrik paoa hem no datfela samting wea hem mekem for work, olsem radio or fan. Taem samwan hem dae, spirit (laef paoa) hem stop for mekem olketa body cell they work, olsem wanfela laet hem off taem man offim electrik paoa. Taem laef paoa hem no givim paoa long body bilong man, datfela man—datfela soul—hem dae nao.—Psalm 104:29; Ecclesiastes 12:1, 7.
“YU BAE GO BACK LONG DUST”
7. Wanem nao bae happen sapos Adam no obey long God?
7 Jehovah barava talem klia wanem nao dae hem meanim for Adam wea sin. God hem say: “Long sweat bilong face bilong yu, yu bae kaikaim bred go kasem taem yu go back long graon, bikos yu kamaot from hem. Yu dust nomoa and yu bae go back long dust.” (Genesis 3:19) Adam bae go back long wea? Long graon, long dust wea hem kam from. Taem hem dae, Adam bae no stap nao!
8. Long saed bilong soul, long wanem way nao man hem no winim animal?
8 Olketa animal tu they dae olsem olketa man. They tu olketa soul, and sem spirit, or laef paoa, hem givim strong long them. (Genesis 1:24) Long Ecclesiastes 3:19, 20, wisefela man Solomon say olsem long yumi: “Olsem wanfela hem dae, so narawan hem dae tu; and everywan garem wanfela spirit, so [long dae] man hem no winim animal . . . Olketa kam from dust, and olketa go back long dust.” Olketa man they moa hae winim olketa animal from God create-im them followim hem, they showim aot olketa fashion bilong Jehovah. (Genesis 1:26, 27) But, taem olketa man and animal they dae, they go back long graon.
9. Olketa wea dae finis they waswe, and long wea nao they go?
9 Solomon hem story moa abaotem meaning bilong dae taem hem say: “Olketa wea laef savvy bae they mas dae; but olketa wea dae finis, they nating savvy long any samting.” Yes, olketa wea dae finis barava nating savvy long any samting. Dastawe Solomon hem say: “Every samting wea hand bilong yu savvy duim, duim withim strong bilong yu, from no moa any work or plan or savvy or wisdom stap long Sheol, ples wea yu bae go long hem.” (Ecclesiastes 9:5, 10) Olketa wea dae finis they go long wea? Long Sheol (Hebrew, sheʼohlʹ), grave bilong olketa man. Olketa wea yumi love-im wea dae finis they no savvy long any samting. They no suffer, and they kanduit for affectim yumi long any way.
10. Why nao yumi savvy say dae hem no samting wea mas for olawe?
10 Waswe, yumi everywan and olketa wea yumi love-im bae stap for samfela year nomoa and then finis for olawe? Bible hem no talem datwan. Taem Adam hem no obey, stret awe Jehovah God hem mekem arrangement for finisim olketa no gud samting wea bae kamap from sin bilong olketa man. Dae hem no part long purpose bilong God for olketa man. (Ezekiel 33:11; 2 Peter 3:9) So, dae hem no samting wea mas for olawe for yumi or olketa wea yumi love-im.
“GO FOR REST”
11. Jesus hem say fren bilong hem Lazarus wea dae finis hem waswe?
11 Hem purpose bilong Jehovah for sevem yumi and olketa wea yumi love-im wea dae finis from dae wea kam from Adam. Dastawe, Word bilong God hem story abaotem dae olsem taem man hem sleep. For example, taem hem herem fren bilong hem Lazarus hem dae, Jesus Kraest say olsem long olketa disaepol bilong Hem: “Lazarus, fren bilong yumi hem go for rest, but mi go long there for wekapem hem from sleep.” From olketa disaepol no kwiktaem for meanim wanem nao hem talem, Jesus hem say: “Lazarus hem dae finis.” (John 11:11, 14) Then Jesus go long taon bilong Bethany, wea tufela sista bilong Lazarus, Martha and Mary they still sorry long dae bilong brata bilong them. Taem Jesus say long Martha, “Brata bilong yu bae laef back,” Martha talem samting wea show aot hem garem faith long purpose bilong God for change-im back samting wea dae hem bringim long famili bilong olketa man. Hem say: “Mi savvy hem bae rise ap long resurrection long last day.”—John 11:23, 24.
12. Wanem hope nao Martha hem garem abaotem olketa wea dae finis?
12 Martha nating talem any samting abaotem wanfela soul wea no savvy dae wea go ahed for stap long narafela ples. Hem no believe Lazarus hem go finis long wanfela ples bilong olketa spirit for laef long there. Martha hem garem faith long nambawan hope bilong resurrection from dae. Hem savvy brata bilong hem wea dae finis hem no stap nao, and Lazarus no garem wanfela soul wea no savvy dae wea lusim body bilong hem. Only way for stretem diswan hem for brata bilong hem for resurrect.
13. Wanem paoa from God nao Jesus hem garem, and hao nao hem showim aot disfela paoa?
13 Jesus Kraest nao man wea kasem paoa from Jehovah God for buyim back olketa man. (Hosea 13:14) Dastawe, bihaen Martha hem talem datfela samting, Jesus hem say: “Mi nao resurrection and laef. Man wea show aot faith long mi, nomata hem dae, bae hem laef back moa.” (John 11:25) Jesus showim aot paoa wea hem kasem from God for duim diswan taem hem go long grave bilong Lazarus, wea dae finis for fofela day, and hem mekem hem laef back moa. (John 11:38-44) Tingim hapi bilong olketa wea lukim disfela resurrection and otherfela resurrection wea Jesus Kraest hem duim!—Mark 5:35-42; Luke 7:12-16.
14. Why nao resurrection and idea bilong soul wea no savvy dae they againstim each other?
14 Tingim diswan firstaem: Sapos wanfela soul wea no savvy dae hem go ahed for laef bihaen long dae, no anywan bae needim resurrection, or samwan for mekem them laef back moa. Tru nao, hem no kaenfela samting for resurrectim samwan olsem Lazarus for laef moa olsem sinner long disfela earth, sapos hem kasem finis wanfela nambawan reward long heven. Yes, Bible hem nating use-im disfela toktok “soul wea no savvy dae.” But, olketa Scripture say soul wea hem sin hem dae. (Ezekiel 18:4, 20) So Bible point go long wanfela resurrection olsem really hope for olketa wea dae.
“OLKETA INSAED LONG GRAVE”
15. (a) Wanem nao word “resurrection” hem meanim? (b) Why nao way for resurrectim olketa man hem no samting wea hard for Jehovah God?
15 Datfela word wea olketa disaepol bilong Jesus they use-im for “resurrection” hem really meanim “rise ap” or “stand ap.” Diswan hem for rise ap from dae—or hem olsem way for stand ap from grave bilong olketa man. Hem easy for Jehovah God for resurrectim wanfela man. Why nao olsem? Bikos Jehovah nao Man Wea Startim laef. Distaem, olketa man savvy recordim voice and piksa bilong olketa man and woman long video and they savvy lukim moa bihaen olketa man hia they dae. So, olmaeti Creator bilong yumi savvy recordim every samting abaotem wanfela man and resurrectim hem, and givim hem wanfela niufela body.
16. (a) Wanem nao Jesus promisim for everywan wea stap insaed long grave? (b) Resurrection wea man kasem bae depend long wanem samting?
16 Jesus Kraest say olsem: “Taem bae kam wea olketa insaed long grave bae herem voice bilong hem [Jesus] and kamaot, olketa wea duim gudfela samting long resurrection bilong laef, olketa wea duim badfela samting long resurrection bilong judgment.” (John 5:28, 29) Everywan wea Jehovah rememberim bae resurrect and hem bae teachim them olketa way bilong hem. For olketa wea duim samting followim savvy bilong God, resurrection bilong them hem for kasem laef. But for olketa wea rejectim teaching and rul bilong God, resurrection bilong them hem for judgment for dae.
17. Hu nao bae resurrect?
17 Tru nao, olketa wea followim finis raeteous way olsem olketa servant bilong Jehovah bae resurrect. Datfela hope for resurrect hem strongim planti pipol for face-im dae, nomata taem they face-im barava no gud persecution. They savvy God bae mekem them laef back moa. (Matthew 10:28) But planti million pipol wea dae finis they no showim yet sapos they want for followim olketa raeteous mark bilong God. Olketa tu bae resurrect. From hem sure long purpose bilong Jehovah long diswan, aposol Paul hem say: “Mi garem hope long God . . . hao wanfela resurrection bae kamap for olketa wea raeteous and olketa wea no raeteous.”—Acts 24:15.
18. (a) Aposol John hem kasem wanem vision bilong resurrection? (b) Wanem nao bae finis every bit insaed long “lake bilong fire,” and wanem nao disfela lake hem piksarem?
18 Aposol John kasem wanfela nambawan vision bilong olketa wea resurrect wea stand ap front long throne bilong God. So John raet olsem: “Sea hem givim kamaot olketa wea dae finis insaed long hem, and dae and Hades they givim kamaot olketa wea dae finis insaed long them, and hem judge-im olketa each wan for fitim samting wea they duim. And they throwim dae and Hades go daon insaed long lake bilong fire. Diswan hem meanim mek-tu dae, lake bilong fire.” (Revelation 20:12-14) Tingim datwan! Everywan wea dae wea God rememberim they garem hope for kamap free from Hades (Greek, haiʹdes), or Sheol, grave bilong olketa man. (Psalm 16:10; Acts 2:31) They bae garem chance for showim aot long wanem they duim sapos they bae servim God or no moa. Then “dae and Hades” bae they throwim insaed long “lake bilong fire,” wea meanim way for finis every bit, olsem datfela word “Gehenna” hem meanim tu. (Luke 12:5) Grave bilong olketa man bae empty and taem resurrection hem finis, no any grave bae stap moa. Taem yumi learnim from Bible hao God hem no mekem man suffer taem hem dae, diswan barava comfortim yumi!—Jeremiah 7:30, 31.
RESURRECT GO LONG WEA?
19. Why nao samfela man bae resurrect go long heven, and wanem kaen body nao God bae givim long them?
19 Wanfela small namba bilong olketa man and woman bae resurrect for laef long heven. Olsem olketa king and priest withim Jesus, they bae share for stretem every samting bilong dae wea olketa man they kasem from firstfela man, Adam. (Romans 5:12; Revelation 5:9, 10) Haomas pipol nao God bae tekem long heven for rul withim Kraest? Bible hem say, only 144,000. (Revelation 7:4; 14:1) Jehovah bae givim each wan long olketa hia wea resurrect wanfela spirit body mekem they savvy stap long heven.—1 Corinthians 15:35, 38, 42-45; 1 Peter 3:18.
20. Olketa man wea obey and olketa wea God bae resurrectim bae kasem wanem samting?
20 But klosap everywan wea dae finis bae resurrect insaed long wanfela paradaes earth. (Psalm 37:11, 29; Matthew 6:10) Wanfela reason for resurrectim samfela for go long heven hem for fulfillim purpose bilong God for disfela earth. Jesus Kraest and 144,000 long heven bae easyeasy for mekem olketa man wea obey for kamap perfect, wea firstfela dadi and mami bilong yumi they lusim. Olketa wea resurrect tu bae kasem diswan, olsem Jesus hem showim aot taem hem talem man wea ready for dae wea they hangim klosap long hem: “Yu bae stap withim mi long Paradaes.”—Luke 23:42, 43.
21. Olsem profet Isaiah and aposol John they talem, wanem nao bae happen long dae?
21 Long Paradaes earth, dae, wea spoelem planti pipol distaem, bae finis. (Romans 8:19-21) Profet Isaiah hem say Jehovah God “bae finisim dae for olawe.” (Isaiah 25:8) Aposol John hem kasem wanfela vision bilong taem wea olketa man wea obey bae free from pain and dae. Yes, “God seleva hem bae stap withim olketa. And hem bae aotem every wata from eye bilong olketa, and dae bae no moa, sorry and fashion for krae and pain bae no moa tu. Every samting wea stap bifor hem finis nao.”—Revelation 21:1-4.
22. Hao nao way for savvy abaotem resurrection hem affectim yu?
22 Olketa kliafela teaching bilong Bible they aotem way for konfius abaotem wanem samting nao happen long pipol wea dae finis. Olketa Scripture talem stret hao dae hem “lastfela enemy” wea bae finis every bit. (1 Corinthians 15:26) Taem yumi savvy abaotem resurrection hope, diswan hem strongim and comfortim yumi! And yumi hapi tumas from olketa wea yumi love-im wea dae finis wea God rememberim, bae wekap from sleep bilong dae for enjoyim every gudfela samting wea hem readyim for pipol wea love-im hem! (Psalm 145:16) Olketa blessing olsem bae kamap thru long Kingdom bilong God. But wanem taem nao rul bilong hem bae start? Bae yumi lukim.
TESTIM SAVVY BILONG YU
Wanem nao spirit wea insaed long olketa man?
Olketa wea dae finis they waswe?
Hu nao bae resurrect?
[Piksa long page 85]
Olsem Jesus hem kolem Lazarus from grave, planti million pipol tu bae resurrect
[Piksa long page 86]
Hapi bae stap taem ‘God finisim dae for olawe’