Chapter 10
Kingdom Bilong God Hem Rul
1, 2. Long wanem way nao olketa gavman bilong man no fit for rul?
MAET yu payim wanfela samting olsem out-board motor engine or sewing machine, but taem yu traem, hem no work. So yu tekem go long wanfela man for fixim. But, no long taem bihaen hem “fixim” datfela samting, hem brek daon moa. Datwan mekem yu feel no gud tumas!
2 Diswan hem semsem withim olketa gavman bilong man. Olketa man they laekem wanfela gavman wea bae bringim peace and hapi. But, nomata they barava work hard for fixim olketa problem wea kamap long living, they nating win for duim datwan. They mekem planti peace agreement—but then they brekem olketa agreement hia. And tu, wanem kaen gavman nao finisim every bit way for poor, fashion for againstim otherfela pipol, raf fashion, sik, and way for spoelem air, wata and graon? No anywan savvy stretem rul bilong olketa man. Wise King Solomon bilong Israel tu hem ask olsem: “Hao nao man wea stap long earth bae luksavvy long go-go bilong hem?”—Proverbs 20:24.
3. (a) Wanem nao theme bilong preaching work bilong Jesus? (b) Wanem nao samfela pipol talem abaotem Kingdom bilong God?
3 But hope hem stap! Wanfela strongfela world gavman hem no wanfela dream nomoa. Hem nao theme bilong preaching work bilong Jesus. Hem kolem datwan “kingdom bilong God,” and hem teachim olketa follower bilong hem for pray for hem. (Luke 11:2; 21:31) Hem tru, samfela taem pipol bilong religion they tok abaotem Kingdom bilong God. Planti million pipol they pray for hem everyday taem they talem Lord’s Prayer (wea they kolem tu Our Father or model prayer). But pipol garem different ansa taem samwan askim them, “Wanem nao Kingdom bilong God?” Samfela say, “Hem stap insaed long heart bilong yu.” Samfela kolem diswan heven. Bible givim stretfela ansa, olsem yumi bae lukim.
KINGDOM WEA GAREM WANFELA PURPOSE
4, 5. Why nao Jehovah hem choosim wanfela niufela way for show aot sovereign rul bilong hem, and wanem nao diswan bae duim?
4 Jehovah God nao hem King, or Sovereign Ruler, bilong universe for olawe. From hem nao create-im every samting, diswan mekem hem garem datfela haefela position. (1 Chronicles 29:11; Psalm 103:19; Acts 4:24) But Kingdom wea Jesus preach abaot hem stap under long rul bilong God long disfela universe. Kingdom bilong Messiah hem garem wanfela spesel purpose, but wanem nao diswan?
5 Olsem Chapter 6 hem story abaot finis, firstfela man and woman they go againstim God. From olketa kwestin wea kamap, Jehovah choosim wanfela niufela way for show aot sovereign rul bilong hem. God talemaot purpose bilong hem for bringim wanfela “seed” wea bae pisisim datfela Snek, Satan, and aotem olketa samting wea kasem olketa man from sin wea they born withim. Datfela main “seed” hem Jesus Kraest, and “kingdom bilong God” hem samting wea hem bae use-im for finisim Satan every bit. Thru long disfela Kingdom, Jesus Kraest bae bringim back way for rul long nem bilong Jehovah ovarem earth, and bae hem mek hae long way wea God nomoa fit for rul olsem sovereign wan for olawe.—Genesis 3:15; Psalm 2:2-9.
6, 7. (a) Wea nao Kingdom, and hu nao King and olketa wea bae rul withim hem? (b) Hu nao olketa wea bae stap under long Kingdom?
6 Wanfela transleson bilong olketa toktok bilong Jesus for olketa badfela Farisi, hem say: “Kingdom bilong God hem stap insaed long yufela.” (Luke 17:21, King James Version) Waswe, Jesus meanim datfela Kingdom hem stap insaed no gud heart bilong olketa badfela man hia? No moa. Wanfela transleson bilong Greek langwis wea moa stret hem olsem: “Kingdom bilong God hem stap midlwan long yufela.” (New World Translation) Jesus, wea hem stap midlwan long them, story abaotem hemseleva olsem future King. Kingdom bilong God hem no samting wea man garem insaed long heart bilong hem, but hem wanfela really gavman wea rul, wea garem ruler and olketa wea stap under long hem. Hem wanfela gavman long heven, from they kolem hem “kingdom bilong heven” and “kingdom bilong God.” (Matthew 13:11; Luke 8:10) Profet Daniel lukim long vision, wanfela Ruler wea “olsem son bilong man” wea kam front long Olmaeti God and kasem “paoa for rul and honor and kingdom, mekem every pipol, nation and langwis mas servim hem.” (Daniel 7:13, 14) Hu nao disfela King? Bible kolem Jesus Kraest “Son bilong man.” (Matthew 12:40; Luke 17:26) Yes, Jehovah markem Son bilong hem, Jesus Kraest, for King.
7 Jesus no rul seleva. Olketa 144,000 wea “hem buyim from earth” for kamap olketa wea bae king and priest bae rul withim hem. (Revelation 5:9, 10; 14:1, 3; Luke 22:28-30) Olketa wea bae stap under long Kingdom bilong God they nao wanfela famili bilong olketa man everywea long earth wea followim lead bilong Kraest. (Psalm 72:7, 8) But, hao nao yumi sure Kingdom bae mek hae long sovereign rul bilong God and bringim back paradaes long earth bilong yumi?
KINGDOM BILONG GOD HEM REALLY SAMTING
8, 9. (a) Wanem example yumi savvy givim for showim aot hao yumi savvy depend long olketa promis bilong Kingdom bilong God? (b) Why nao yumi sure Kingdom hem really samting?
8 Tingim sapos wanfela fire hem burnim haos bilong yu. Then wanfela fren bilong yu wea garem staka shilling hem promis for helpem yu buildim moa haos bilong yu and provide-im kaikai for famili bilong yu. Sapos datfela fren hem talem yu trufela samting everytaem, waswe, bae yu believim hem? Sapos long nextfela day, yu kam back from work and yu lukim samfela workman they start for klinim every rabis bilong datfela fire and samwan tekem kam kaikai for famili bilong yu. Yu bae barava sure hao go-go, every samting bae gud moa and winim bifor.
9 Long sem way tu, Jehovah showim aot hao Kingdom hem wanfela really samting. Olsem Bible buk bilong Hebrews hem showim aot, planti part bilong Law they piksarem Kingdom arrangement. (Hebrews 10:1) Olketa samting wea piksarem Kingdom bilong God they show aot tu long kingdom bilong Israel long earth bifor. Hem different from olketa otherfela gavman, from olketa ruler bilong hem they sidaon long “throne bilong Jehovah.” (1 Chronicles 29:23) And tu, wanfela profesi hem say: “Datfela stik bilong king bae no lusim Judah, and longfela stik bilong king mas stap withim hem go kasem taem wea Shiloh hem kam; and olketa pipol mas obey long hem.” (Genesis 49:10)a Yes, long datfela laen bilong King bilong Judea nao Jesus, hem born. Hem nao datfela King bilong gavman bilong God for olawe.—Luke 1:32, 33.
10. (a) Wanem taem nao faondeson for Messiah Kingdom bilong God hem start? (b) Wanem important work nao olketa wea bae rul withim Jesus they leadim long disfela earth?
10 Faondeson bilong Messiah Kingdom bilong God hem start taem Jesus choosim olketa aposol. (Ephesians 2:19, 20; Revelation 21:14) Olketa nao they first wan bilong 144,000 wea bae rul long heven olsem olketa king withim Jesus Kraest. Taem they long earth, olketa hia wea bae rul withim hem they leadim wanfela witnessing work, for followim komand bilong Jesus: “Go and mekem disaepol long pipol bilong every nation, baptaesim them long nem bilong Father and bilong Son and bilong holy spirit.”—Matthew 28:19.
11. Hao nao they duim Kingdom-preaching work distaem, and wanem nao diswan hem duim?
11 Distaem they obeyim datfela komand for mekem disaepol winim any otherfela taem bifor. Olketa Jehovah’s Witness they talemaot gud nius bilong Kingdom everywea long world, wea fitim disfela profesi wea Jesus talem: “Disfela gud nius bilong kingdom olketa bae talemaot everywea long world for witness long every nation; and then end bae kam.” (Matthew 24:14) Olsem wanfela part bilong Kingdom-preaching work, wanfela bigfela teaching program hem go ahed distaem. Olketa wea followim olketa law and principle bilong Kingdom bilong God they kasem finis peace and wan mind wea gavman bilong man kanduit for kasem. Every samting hia they kliafela proof bilong way wea Kingdom bilong God hem really samting!
12. (a) Why nao hem stret for kolem nem bilong olketa wea talemaot Kingdom, olketa Jehovah’s Witness? (b) Hao nao Kingdom bilong God hem no olsem olketa gavman bilong man?
12 Jehovah talem olketa Israelite: “Yufela nao olketa witness bilong mi, . . . and servant bilong mi wea mi choosim.” (Isaiah 43:10-12) Jesus, “datfela Faithful Witness,” hem strong for talemaot gud nius bilong Kingdom. (Revelation 1:5; Matthew 4:17) So hem stret for kolem olketa wea talemaot Kingdom, olketa Jehovah’s Witness, nem wea God hem givim long them. But why nao olketa Witness spendem planti taem and strong for tok long otherfela pipol abaotem Kingdom bilong God? They duim diswan bikos Kingdom nomoa hem only hope for olketa man. Olketa gavman bilong man savvy finis, but Kingdom bilong God kanduit for finis. Isaiah 9:6, 7 kolem Ruler bilong hem, Jesus, datfela “Prince bilong Peace” and hem say moa: “Rul bilong hem olsem prince and peace bae no savvy finis.” Kingdom bilong God hem no olsem olketa gavman bilong man—wea stap tuday and finis tomorrow. Tru nao, Daniel 2:44 hem say: “God bilong heven bae mekem wanfela kingdom wea nating savvy finis. And hem bae no givim kingdom hia long any otherfela pipol. . . . Hem nomoa bae stap olawe.”
13. (a) Wanem nao samfela problem wea Kingdom bilong God bae stretem? (b) Why nao yumi sure olketa promis bilong God bae fulfill?
13 Wanem kaen man wea king nao savvy finisim every bit war, raf fashion, sik, hangre, and way for no garem ples for stap? And tu, wanem kaen ruler long earth nao savvy resurrectim olketa wea dae finis? Kingdom bilong God and King bilong hem bae deal withim olketa samting hia. Kingdom hia bae no brek daon, olsem wanfela engine or sewing machine wea man need for fixim everytaem. But, Kingdom bilong God bae win, from Jehovah promis olsem: “Toktok wea kamaot from mouth bilong mi . . . hem no savvy kam back nating long mi, but hem mas duim samting wea mi wantim, and hem bae win long samting wea mi sendem for duim.” (Isaiah 55:11) Purpose bilong God bae no fail, but wanem taem nao datfela Kingdom rul bae start?
KINGDOM RUL—WANEM TAEM?
14. Wanem nao olketa disaepol bilong Jesus they no meanim abaotem Kingdom, but wanem nao Jesus savvy abaotem rul bilong hem?
14 “Lord, bae yu startim moa kingdom bilong Israel long distaem?” Way wea olketa disaepol bilong Jesus askim disfela kwestin show aot they no meanim yet purpose bilong Kingdom bilong God and taem wea hem bae start for rul. Taem hem warnim them for no story long samting wea they seleva tingim, Jesus hem say: “Hem no samting bilong yufela for savvy long olketa taem or season wea Father nomoa hem savvy abaot.” Jesus savvy way wea hem bae rul ovarem earth bae kamap long future, longfela taem bihaen hem resurrect and go ap long heven. (Acts 1:6-11; Luke 19:11, 12, 15) Olketa Scripture they talem diswan finis. Long wanem way?
15. Hao nao Psalm 110:1 helpem yumi for meanim taem wea Jesus bae rul?
15 Taem hem profesi abaotem Jesus olsem “Lord,” King David hem say: “Toktok bilong Jehovah for Lord bilong mi, hem olsem: ‘Sidaon long raet saed bilong mi go kasem taem mi putim olketa enemy bilong yu olsem samting for putim leg bilong yu.’ ” (Psalm 110:1; lukim Acts 2:34-36.) Disfela profesi show aot hao rul bilong Jesus bae no start stret awe bihaen hem go ap long heven. But, hem bae wait long raet saed bilong God. (Hebrews 10:12, 13) Hao long nao hem mas wait? Wanem taem nao rul bilong hem bae start? Bible hem helpem yumi for faendem olketa ansa.
16. Wanem nao happen long 607 B.C.E., and hao nao diswan join withim Kingdom bilong God?
16 Jerusalem nomoa hem only taon long earth wea Jehovah putim nem bilong hem long hem. (1 Kings 11:36) And tu, they kolem diswan capital bilong wanfela kingdom long earth wea God approve-im wea piksarem Kingdom bilong God long heven. Dastawe, taem olketa bilong Babylon finisim every bit Jerusalem long 607 B.C.E. hem barava important taem. Hem markem start bilong wanfela sekson bilong taem, wea rul bilong God ovarem pipol bilong hem long earth bae finis. Samting olsem six hundred year bihaen, Jesus showim aot disfela sekson bilong taem, wea rul bilong God hem finis, still go ahed, from hem say: “Olketa nation bae go ahed for step on top long Jerusalem, go kasem appointed taem bilong olketa nation hem fulfill.”—Luke 21:24.
17. (a) Wanem nao “appointed taem bilong olketa nation,” and hao long nao bae hem go ahed? (b) Wanem taem nao “appointed taem bilong olketa nation” hem start and finis?
17 Insaed long “appointed taem bilong olketa nation,” God letem olketa gavman bilong world for aotem rul wea God approve-im. Datfela taem hem start long 607 B.C.E., and Daniel talem hao disfela taem bae go ahed for “seven taem.” (Daniel 4:23-25) Hao long nao datwan? Bible hem show aot hao three and haf “taem” hem 1,260 day. (Revelation 12:6, 14) So, three and haf taem plus three and haf taem, or seven taem, hem 2,520 day. But no any samting happen long end bilong datfela 2,520 day. But sapos yumi followim “wanfela day for wanfela year” long profesi bilong Daniel and kaontem 2,520 year from 607 B.C.E., yumi bae kasem year 1914 C.E.—Numbers 14:34; Ezekiel 4:6.
18. Wanem nao Jesus duim no long taem bihaen hem kasem Kingdom paoa, and hao nao diswan affectim earth?
18 Waswe, Jesus start for rul long heven long datfela taem? Nextfela chapter bae story abaotem olketa reason from Scripture wea show aot hao hem start for rul long datfela taem. But, start bilong rul bilong Jesus no meanim peace bae kamap stret awe long disfela earth. Revelation 12:7-12 show aot hao bihaen hem kasem Kingdom, Jesus bae aotem Satan and olketa demon angel from heven. Diswan bae meanim trabel for earth but taem yumi read abaotem way wea Devil hem garem “shortfela taem nomoa,” diswan encouragim yumi. Klosap nao, yumi bae fit for hapi, from Kingdom bilong God hem rul and tu from hem bae bringim kam olketa blessing long earth and olketa man wea obey. (Psalm 72:7, 8) Hao nao yumi savvy diswan bae klosap for happen?
[Footnote]
a Datfela nem Shiloh meanim “Hem Wea Bilong Hem.” Go-go, hem klia hao “Shiloh” hem Jesus Kraest, “datfela Lion wea kam from tribe bilong Judah.” (Revelation 5:5) Samfela Transleson bilong olketa Jew change-im word “Shiloh” withim “Messiah” or “datfela Messiah king.”
TESTIM SAVVY BILONG YU
Wanem nao Kingdom bilong God, and hem rul from wea?
Hu nao rul long Kingdom, and hu nao olketa wea stap under long hem?
Hao nao Jehovah show aot Kingdom bilong hem, hem wanfela really samting?
Wanem taem nao “appointed taem bilong olketa nation” hem start and finis?
[Box long page 94]
SAMFELA IMPORTANT SAMTING WEA JOIN WITHIM KINGDOM BILONG GOD
• Jehovah talemaot purpose bilong hem for bringim wanfela “seed” wea bae pisisim hed bilong datfela Snek, Satan the Devil.—Genesis 3:15.
• Long 1943 B.C.E., Jehovah showim aot hao disfela “seed” bae hem wanfela man wea kam from laen bilong Abraham.—Genesis 12:1-3, 7; 22:18.
• Law covenant wea Israel kasem long 1513 B.C.E. hem “wanfela shadow bilong olketa gudfela samting wea bae kam.”—Exodus 24:6-8; Hebrews 10:1.
• Kingdom bilong Israel long earth hem start long 1117 B.C.E., and bihaen hem go ahed insaed long laen bilong David.—1 Samuel 11:15; 2 Samuel 7:8, 16.
• Jerusalem hem finis every bit long 607 B.C.E., and “appointed taem bilong olketa nation” hem start.—2 Kings 25:8-10, 25, 26; Luke 21:24.
• Long 29 C.E., Jesus kasem anointing olsem dat wan wea bae kamap King and hem startim ministry bilong hem long earth.—Matthew 3:16, 17; 4:17; 21:9-11.
• Long 33 C.E., Jesus go ap long heven, and hem wait long raet saed bilong God go kasem taem wea rul bilong hem start.—Acts 5:30, 31; Hebrews 10:12, 13.
• Jesus hem kamap king long Kingdom long heven long 1914 C.E. taem “appointed taem bilong olketa nation” hem finis.—Revelation 11:15.
• Satan and olketa demon bilong hem they throwim kam daon long disfela earth and they bringim bigfela trabel long olketa man.—Revelation 12:9-12.
• Jesus luk aftarem work for preachim gud nius bilong Kingdom bilong God everywea long earth.—Matthew 24:14; 28:19, 20.