Chapter 19
Taem Savvy Bilong God Fulap Long Earth
1, 2. Hao nao they spoelem creation bilong Jehovah?
TINGIM sapos wanfela man wea savvy tumas hao for paintim piksa hem just paintim finis wanfela piksa wea luk nice tumas. Hem fit for say datfela painting hem gud tumas—barava gud! But long naet wanfela man wea jealous long hem kam and spoelem datfela painting. Diswan mekem datfela man for paint hem feel sorry tumas. Bae hem hapi tumas for lukim olketa putim datfela no gud man long prison! And tingim hao datfela man for paint hem bae barava laek for lukim piksa wea hem paintim for luk nice moa olsem bifor.
2 Olsem datfela man for paint, Jehovah create-im barava gudfela samting taem hem readyim disfela earth and putim olketa man insaed. Bihaen hem create-im man and woman, hem say every samting wea hem workim long earth they “gud tumas.” (Genesis 1:31) Adam and Eve they pikinini bilong God, and hem love-im them. Hem wantim them for garem wanfela gud and hapi future. Hem tru, Satan hem mekem them for go againstim God, but Satan hem no spoelem nambawan creation bilong God for olawe.—Genesis 3:23, 24; 6:11, 12.
3. Wanem nao “really laef”?
3 God hem decide for stretem every samting. Hem barava want for lukim yumi garem living wea followim firstfela purpose bilong hem. Laef bilong yumi wea short and fulap withim trabel hem no “really laef,” from hem different every bit from purpose bilong Jehovah. Datfela “really laef” wea God wantim yumi for garem hem “laef olawe” under long perfect living.—1 Timothy 6:12, 19.
4, 5. (a) Hao nao man savvy kasem Paradaes? (b) Why nao yumi mas ting abaotem hope bilong yumi for future?
4 Savvy bilong God hem mekem man garem responsibility front long Jehovah. (James 4:17) But tingim olketa blessing wea yu bae enjoyim sapos yu followim datfela savvy and trae hard for kasem laef olawe. Insaed long Word bilong hem, Bible, Jehovah God hem paintim wanfela piksa wea luk nice tumas wea showim aot living insaed long Paradaes earth wea klosap for kam. Hem tru, yumi pipol bilong Jehovah no servim hem just bikos yumi want for kasem wanfela reward. Yumi servim God bikos yumi love-im hem. (Mark 12:29, 30) And tu, laef hem no olsem pay bilong yumi from yumi servim Jehovah. Laef olawe hem wanfela present from God. (Romans 6:23) Hem gud for ting raonem laef olsem bikos Paradaes hope hem mekem yumi tingim wanem kaen God nao Jehovah—man wea “givim reward long anywan wea barava lukaotem hem” long loving way. (Hebrews 11:6) Hope wea barava klia and strong insaed long mind and heart bilong yumi bae helpem yumi for stand strong long olketa hardfela samting insaed long world bilong Satan.—Jeremiah 23:20.
5 Distaem bae yumi story abaotem hope wea kam from Bible for kasem laef olawe insaed long Paradaes earth long future. Laef bae waswe taem earth hem fulap withim savvy bilong God?
BIHAEN ARMAGEDDON—WANFELA PARADAES EARTH
6. Wanem nao Armageddon, and wanem nao hem bae duim for olketa man?
6 Olsem yumi storyim finis, klosap nao Jehovah God bae finisim disfela badfela system. World hem klosap for kasem samting wea Bible kolem Har–Magedon, or Armageddon. Datfela word maet mekem samfela pipol ting long wanfela nuclear war wea olketa nation wea faet againstim each other bae bringim, but Armageddon hem nating olsem. Olsem Revelation 16:14-16 hem show aot, Armageddon hem “war bilong bigfela day bilong God Olmaeti.” Hem war wea “olketa king everywea long world,” or olketa nation they insaed long hem. Son bilong Jehovah God, datfela King wea hem appointim, bae klosap nao for go long datfela war. Hem nao bae winim datfela war. Everywan wea againstim Kingdom bilong God and they part long badfela system bilong Satan bae finis every bit. Only olketa wea loyal long Jehovah bae stap laef.—Revelation 7:9, 14; 19:11-21.
7. Satan and olketa demon bilong hem bae stap long wea long Wan Thousand Year Rul bilong Kraest, and hao nao diswan bae helpem olketa man?
7 Tingim sapos yu winim datfela bigfela trabel. Laef long earth insaed long niufela world wea God promisim bae waswe? (2 Peter 3:13) Yumi no need for trae hard for tingim, bikos Bible hem talem yumi, and samting wea hem talem hem nambawan. Yumi learnim hao Satan and olketa demon bilong hem bae no savvy duim any samting long Wan Thousand Year Rul bilong Jesus Kraest, from they stap insaed long wanfela hol wea deep tumas olsem prison. Olketa badfela angel hia bae no stap moa for mekem trabel and trae for mekem yumi no faithful long God. Datwan bae gud tumas!—Revelation 20:1-3.
8, 9. Insaed long niu world, wanem nao bae happen long way for suffer, sik, and way for olo?
8 Then go-go, every different kaen sik bae finis every bit. (Isaiah 33:24) Olketa wea cripple bae stand ap, wakabaot, ran, and dance withim gudfela leg wea strong. Bihaen long planti year wea they no herem any samting, olketa wea earpass bae herem olketa nicefela sound raonem them. Olketa wea blind bae sapraes for gud taem they lukim world wea fulap withim color and planti different kaen samting. (Isaiah 35:5, 6) Yes, they bae lukim nao face bilong olketa wea they love-im! Maet for lelebet taem they no lukluk gud from eye bilong them bae garem wata from they hapi tumas.
9 Tingim diswan! No moa eyeglas, no moa stik for wakabaot, no moa medicine, no moa clinic for aotem teeth or hospital! Olketa sik long saed bilong feeling and for feel sorry bae no stopem hapi bilong pipol. No any pikinini bae garem no gud sik. Pipol bae kamap young moa. (Job 33:25) Yumi bae kamap moa healthy, and moa strong. Every morning yumi bae wekap withim moa strong, and ready for niufela day bilong gudfela laef and work wea mekem yumi satisfy.
10. Wanem kaen work nao olketa wea winim Armageddon bae duim?
10 Planti work wea bringim hapi bae stap for olketa wea winim Armageddon. They bae mekem earth kamap wanfela paradaes. Any rabis bilong old system bae they klinim. Olketa no gud haos and land wea pipol spoelem bae change for kamap olketa nicefela ples wea garem olketa flaoa and tree and gaden. Everywan bae garem gudfela haos. (Isaiah 65:21) Go-go, olketa ples hia wea olsem paradaes bae kamap moa big go kasem taem wea whole earth bae luk nice tumas olsem samting wea Creator hem duim long gaden bilong Eden bifor. For share long disfela work for mekem every samting gud back moa bae mekem man barava satisfy!
11. Long future, hao nao olketa man bae luk aftarem disfela earth and olketa animal?
11 God nao bae guide-im every samting hia mekem they bae no spoelem air, land, and wata. Olketa man bae stap long peace withim olketa animal. Olketa man bae kasem back work for luk aftarem earth, so they bae keepim gud olketa animal winim way for olawe killim them dae. Tingim olketa wild dog and pikinini sheepsheep, bae they kaikai tugeta—and olketa otherfela animal bae stap safe tu. Nomata smallfela pikinini bae no need for fraetem olketa wild animal, and olketa bad and raf pipol bae no spoelem peace bilong niu world. (Isaiah 11:6-8) Datwan bae hem niu world wea fulap withim peace!
OLKETA MAN BAE CHANGE
12. Hao nao Isaiah 11:9 hem go ahed for fulfill distaem, and hao nao hem bae fulfill long Paradaes?
12 Isaiah 11:9 talem yumi why no any trabel bae kamap long full earth. Hem say olsem: “Earth bae fulap withim savvy bilong Jehovah olsem wata hem coverim sea.” Diswan meanim pipol bikos olketa animal kanduit for kasem “savvy bilong Jehovah” and change-im fashion bilong them, from they followim law wea stap insaed long them. But savvy bilong Creator bilong yumi hem bae change-im pipol. Yuseleva tu maet change-im finis samfela samting from yu followim savvy bilong God insaed long laef bilong yu. Planti million pipol they duim olsem finis. So, datfela profesi hem start for fulfill distaem long olketa wea servim Jehovah. But, hem point go tu long wanfela taem wea pipol everywea long world bae lusim any kaen no gud and raf fashion and stap long peace for olawe.
13. Wanem kaen education program nao bae go ahed long earth?
13 Hem bae barava nambawan samting taem savvy bilong God hem fulap long earth! Wanfela bigfela education program bae go ahed wea King Jesus Kraest and 144,000 wea rul withim hem bae they leadim. Pipol bae use-im olketa niufela “scroll.” They nao olketa instruction wea God raetem for teachim olketa man wea stap long earth. (Revelation 20:12) Olketa man bae no learn abaotem war, but abaotem peace. Every samting for faet wea savvy killim man dae bae finis every bit. (Psalm 46:9) Olketa man wea stap insaed niu world bae learn for deal withim otherfela pipol withim love, respect, and honor.
14. Hao nao world bae different taem olketa man they kamap wanfela famili wea garem wan mind?
14 Olketa man bae kamap wanfela famili wea garem wan mind. No moa any samting bae stopem wan mind and way for fren olsem olketa brata. (Psalm 133:1-3) No anywan bae need for lockim haos bilong hem mekem man for steal no kam insaed. Peace bae stap insaed every heart, insaed every haos, long every part bilong earth.—Micah 4:4.
RESURRECTION WEA BRINGIM HAPI
15. Wanem nao tufela sekson wea bae resurrect long disfela earth?
15 Long datfela Wan Thousand Year Rul, resurrection bae kamap. Olketa wea mean for sin againstim holy spirit bilong God taem they go ahed for duim samting wea they savvy hem againstim samting wea God talem bae no resurrect. (Matthew 23:15, 33; Hebrews 6:4-6) Hem tru, God nao bae decide hu nao hem sin againstim holy spirit olsem. But tufela sekson nao bae resurrect—“olketa wea raeteous and olketa wea no raeteous.” (Acts 24:15) From every samting bae followim stretfela order, hem stret for say hao firstaem olketa wea raeteous bae kasem laef moa long earth, olketa wea servim Jehovah long loyal way.—Hebrews 11:35-39.
16. (a) Hu nao bae insaed long “olketa wea raeteous” wea bae resurrect long earth? (b) Hu nao long olketa faithful wan bifor wea yu laekem tumas for story withim, and why nao olsem?
16 Winim way for herem olketa nius abaotem war, trabel and dae, olketa servant bilong Jehovah bae herem olketa nambawan report abaotem resurrection. Hem bae gud tumas for herem taem olketa faithful man and woman olsem Abel, Enoch, Noah, Abraham, Sarah, Job, Moses, Rahab, Ruth, David, Elijah, Esther, they resurrect. They bae story abaotem planti nambawan samting wea happen wea join withim olketa story insaed long Bible! Tru nao, olketa hia and samfela moa wea raeteous wea just dae nomoa bae wantim tumas for savvy abaotem end bilong system bilong Satan and way wea Jehovah mekem nem bilong hem kamap holy and showim aot every bit hao hem nomoa fit for rul.
17. Olketa faithful wan bae helpem otherfela pipol wea resurrect long wanem kaen way?
17 Olketa faithful wan hia bae givim bigfela help taem narafela sekson bae resurrect, taem planti billion “wea no raeteous” bae kamap free from dae! Planti man nating garem chance for savvy long Jehovah. Satan nao “blindim mind bilong olketa.” (2 Corinthians 4:4) But God bae stretem back every samting wea Devil hem duim. Olketa wea no raeteous bae laef back insaed wanfela nicefela earth wea fulap withim peace. Pipol wea organize gud and ready for teachim them abaotem Jehovah and Son bilong hem wea rul, Jesus Kraest, bae welkamim them. Taem planti billion pipol wea resurrect they start for savvy and love-im Creator bilong them, savvy bilong Jehovah bae fulap long earth winim anytaem bifor.
18. Hao nao yu ting yu bae feel taem yu welkamim olketa wea yu love-im wea resurrect?
18 Resurrection bae mekem heart bilong yumi fulap withim hapi! Hu nao no suffer from enemy bilong yumi, dae? Tru nao, hu nao no feel olsem laef bilong hem pisis taem sik, way for olo, accident, or raf fashion hem mekem wanfela wea hem love-im hem dae? Tingim bigfela hapi long paradaes taem pipol bae meetim each other moa. Olketa mami and dadi, son and dota, fren and wantok, bae huggim each other, and laf and krae withim hapi.
PERFECT LAEF!
19. Wanem kaen mirakol nao bae happen long taem bilong Wan Thousand Year Rul?
19 Insaed long datfela Wan Thousand Year Rul, wanfela nambawan mirakol bae go ahed for happen. Diswan nao bae barava nambawan part bilong Wan Thousand Year Rul bilong Kraest for olketa man. Jehovah bae talem Son bilong hem for use-im olketa gudfela samting bilong ransom sakrifaes long each faithful man and woman wea obey. Thru long datwan, every sin bae finis and olketa man bae kasem perfect laef.—1 John 2:2; Revelation 21:1-4.
20. (a) Way for perfect hem meanim wanem samting? (b) Wanem taem nao olketa wea winim Armageddon and olketa wea resurrect bae kasem laef long really way?
20 Perfect laef! Wanem nao hem bae meanim? Hem meanim way for garem laef wea Adam and Eve they enjoyim bifor they sin againstim Jehovah God. Long saed bilong body, mind, feeling, fashion, and spiritual saed—long every way—olketa perfect man bae kasem every bit olketa mark bilong God. But waswe, everywan bae semsem? No moa nao! Olketa samting wea Jehovah create-im—olketa tree, flaoa, animal—every samting hia showim yumi hao hem love-im olketa different kaen samting. Olketa perfect man bae garem different fashion and savvy. Each wan bae enjoyim laef long way wea God hem markem. Revelation 20:5 hem say: “Olketa otherfela pipol wea dae finis they no kasem laef go kasem taem wea disfela wan thousand year hem finis.” Olsem great crowd bilong olketa wea winim Armageddon, olketa wea resurrect bae go ahed for kasem really laef taem they lusim every samting bilong sin and they perfect long every way.
21. (a) Wanem nao bae happen long end bilong Wan Thousand Year Rul bilong Kraest? (b) Wanem nao bae happen long Satan and everywan wea supportim hem?
21 Olketa perfect man bae face-im wanfela lastfela test. Long end bilong Wan Thousand Year Rul, Satan and olketa demon bilong hem bae kamaot from datfela hol wea deep tumas for lelebet taem and bae they trae for tanem awe pipol from Jehovah for lastfela taem. Samfela pipol bae followim rongfela samting wea they seleva wantim winim way for love-im God, but diswan bae for lelebet taem nomoa. Jehovah bae finisim every bit olketa selfish wan hia withim Satan and every demon bilong hem. Everywan wea duim rong samting bae finis for olawe.—Revelation 20:7-10.
WANEM NAO YU BAE DUIM?
22. Wanem nao yu want for duim long Paradaes?
22 Laef olawe bae stap front long olketa wea love-im Jehovah God wea stap long Paradaes earth. Hem hard for yumi tingim hapi bilong them, and yu tu savvy share insaed diswan. Music, art, and way for mekem samting—yes, olketa samting wea olketa perfect man bae duim bae winim any samting wea they duim insaed disfela old world! Tru nao, olketa man bae perfect and they bae garem laef olawe front long them. Tingim samting wea yu fit for duim olsem wanfela man wea perfect. Tingim tu samting wea yu and otherfela pipol bae learnim abaotem creation bilong Jehovah—start long planti billion galaxy insaed long universe go kasem olketa barava smallfela part bilong atom. Every samting wea olketa man duim bae mekem heart bilong loving Father bilong yumi long heven, Jehovah, hem hapi.—Psalm 150:1-6.
23. Why nao laef insaed long Paradaes bae hem nating semsem olawe?
23 Laef long datfela taem bae hem no semsem olawe. Bae hem kamap moa interesting everytaem. Diswan hem olsem from savvy bilong God hem for olawe. (Romans 11:33) For olawe, planti niu samting bae stap for learnim and niufela samting for meanim. (Ecclesiastes 3:11) And taem yu go ahed for learn abaotem Jehovah God, yu bae go ahed for laef—no for fewfela year nomoa but for olawe!—Psalm 22:26.
24, 25. Why nao yu mas live followim savvy bilong God distaem?
24 Waswe, nambawan future long paradaes earth olsem hem samting wea man fit for work hard or mekem sakrifaes for hem? Yes, hem barava fitim! Tru nao, Jehovah hem givim yu key bilong datfela nambawan future. Datfela key hem savvy bilong God. Waswe, bae yu use-im?
25 Sapos yu love-im Jehovah, yu bae hapi for duim will bilong hem. (1 John 5:3) Taem yu duim datwan, yu bae kasem olketa nambawan blessing! Sapos yu followim savvy bilong God, diswan bae givim yu laef wea moa hapi insaed disfela world wea fulap withim trabel. And bae yu kasem olketa bigfela reward long future, from disfela savvy nao hem lead go long laef olawe! Distaem nao hem gudfela taem for yu duim samting. Decide strong for live followim savvy bilong God. Showim aot love bilong yu for Jehovah. Honorim holy nem bilong hem and prove-im Satan hem wanfela liar. Then Jehovah God, Start bilong trufela wisdom and savvy, bae hapi long yu insaed long nambawan loving heart bilong hem. (Jeremiah 31:3; Zephaniah 3:17) And hem bae love-im yu for olawe!
TESTIM SAVVY BILONG YU
Wanem nao “really laef”?
Bihaen long Armageddon, wanem nao bae kamap long earth?
Hu nao bae resurrect long earth?
Hao nao olketa man bae kamap perfect and kasem lastfela test?
Wanem nao hope bilong yu for Paradaes?
[Piksa long page 188, 189]
Waswe, yu hope for stap long Paradaes, taem savvy bilong God fulap long earth?