Introduction wea Mekem Interest Kamap

INTRODUCTION hem barava important part bilong evri tok. Sapos iu barava mekem audience interest, olketa bae moa willing for lisin long samting wea iu storyim bihaen. Sapos introduction bilong iu long field ministry hem fail for mekem interest kamap, maet datwan stopem story bilong iu. Taem iu givim tok long Kingdom Hall, audience bae no go aot from Kingdom Hall, bat mind bilong samfala maet wakabaot sapos iu no kasholem interest bilong olketa.

Taem iu preparem introduction bilong iu, tingim olketa goal hia: (1) kasholem interest bilong audience, (2) talem klia wanem nao subject bilong iu, and (3) showimaot why nao datfala subject hem important for audience bilong iu. Samfala taem, maet iu kasem thrifala goal hia wantaem nomoa. Bat, long narataem, maet iu need for waka long each wan seleva, and long difren order.

Hao for Kasholem Interest Bilong Audience Bilong Iu. Nomata pipol hipap for herem wanfala tok, hem no minim olketa redy for tingting evribit long datfala subject. Why nao olsem? Living hem fulap witim planti difren samting wea pullim tingting bilong olketa. Maet olketa wari long wanfala problem long famili or nara wari long living. Olsem speaker, challenge wea iu feisim hem for kasholem and keepim interest bilong audience. Winim wanfala teknik stap for duim diswan.

Wanfala tok wea staka pipol savve long hem nao hem datfala Sermon long Maunten. Hao nao hem start? Olsem Luke talem, Jesus hem sei: “Hapi nao iufala wea poor, . . . hapi nao iufala wea hangre distaem, . . . hapi nao iufala wea krae distaem, . . . hapi nao iufala taem pipol heitim iufala.” (Luke 6:20-22) Why nao datwan mekem interest kamap? Insaed tu-thri word nomoa, Jesus showimaot hem luksavve long samfala serious problem wea olketa wea lisin long hem feisim. Then, winim wei for storyim evribit olketa problem hia, hem showim hao pipol wea garem kaen problem olsem savve hapi, and hem duim diswan long wei wea mekem olketa interest for herem moa samting.

Olketa kwestin nao gud wei for mekem interest kamap, bat mas kaen kwestin wea fitim. Sapos olketa kwestin showaot iu bae storyim samting wea audience bin herem bifor, interest bilong olketa maet kwiktaem go daon. No askem kaen kwestin wea mekem audience feel shame or wea daonem olketa. Winim datwan, trae for askem olketa kwestin long wei wea bae muvim tingting. Stop lelebet bihaen each kwestin for givim taem for olketa wea lisin for tingim ansa long mind bilong olketa. Iu kasholem interest bilong olketa taem olketa feel olsem olketa story witim iu.

For iusim wanfala experience hem nara wei for kasholem interest. Bat for talem wanfala experience maet no helpem goal bilong iu sapos datwan hem mekem samwan long audience feel shame. Sapos audience rememberim experience wea iu talem bat forgetim leson wea olketa shud lanem from datwan, iu no kasem goal bilong iu. Taem iu iusim wanfala experience long introduction, hem shud olsem faondeson for wanfala important part long body bilong tok. Nomata maet iu need for storyim samfala information for mekem datfala experience interesting, careful for no mekem hem long tumas.

Samfala speaker start witim wanfala nius story, toktok from wanfala niuspepa, or toktok wea wanfala bigman or organization talem. Gud samting savve kamaot from samting olsem sapos hem barava fitim datfala subject and audience.

Sapos tok bilong iu hem part long tok wea garem winim wanfala part, or hem wanfala part long Service Meeting, then best wei hem for introduction bilong iu hem short and iu talem stret. Sapos iu givim pablik tok, followim gud taem wea olketa markem for introduction. Body bilong tok nao bae storyim information wea barava important for audience.

Samfala taem maet iu story long wanfala audience wea maet daot or wea againstim iu. Hao nao iu savve kasholem interest bilong olketa? Olketa tekem Stephen, wanfala long olketa first Christian wea “fulap witim spirit and wisdom,” front long Jew Sanhedrin. Long there hem story gud tumas for defendim Christian Wei. Hao nao hem start? Long wei wea showimaot respect hem storyim samting wea evriwan agree long hem. “Lisin olketa man, olketa brata and olketa dadi. God bilong glory showim hemseleva long laen dadi bilong iumi Abraham.” (Acts 6:3; 7:2) Long datfala Areopagus long Athens, aposol Paul changem introduction bilong hem for fitim wanfala audience wea difren evribit, taem hem sei: “Olketa man bilong Athens, mi lukim hao long evri samting, iufala nao fraet long olketa god winim nara pipol.” (Acts 17:22) From olketa gudfala introduction, tufala grup hia willing for herem moa samting.

Taem iu long field service tu iu need for kasholem interest bilong pipol. Sapos haosholder no savve iu bae kam long hem, hem maet busy witim narafala samting. Long samfala ples long world, visitor wea no kasem invitation firstaem mas kwiktaem talem why nao hem kam. Long samfala nara ples, man mas talem or duim samfala samting bifor hem talem why nao hem visit kam.—Luke 10:5.

Nomata wanem, wei for kaen long man savve help for mekem story kamap. Planti taem hem gud for startim story witim samting wea stap long mind bilong datfala man. Wanem nao bae helpem iu disaed wanem for talem? Waswe, haosholder hem duim samting taem iu arrive? Maet hem waka long garden, klinim area raonem haos bilong hem, fixim trak, kuki, waswas, or lukaftarem olketa pikinini. Waswe, hem lukluk long samting—wanfala niuspepa or samting wea happen klosap? Waswe, area bilong hem showaot hem interest long fishing, sports, music, travel, computer, or nara samting? Planti taem pipol interest long samting olketa herem long radio or lukim long television no longtaem go finis. Wanfala kwestin or shortfala koment abaotem samting olsem maet lead go long naesfala story.

Datfala taem wea Jesus story witim wanfala Samaritan woman long well klosap long Sychar hem nambawan example long hao for startim story witim goal for givim witness.—John 4:5-26.

Iu mas preparem gud introduction bilong iu, especially sapos kongregeson bilong iu duim territory planti taem. Sapos nomoa, maet iu no savve givim witness.

Mekem Klia Subject Bilong Iu. Insaed long Christian kongregeson, wanfala chairman or samwan wea garem part bifor iu, bae announcem title bilong tok bilong iu and introducem iu. Nomata olsem, hem gud tu for iu remindim audience abaotem subject bilong iu insaed introduction. For duim diswan iu savve talem moa full theme bilong iu or maet main idea bilong hem. Nomata wanem wei iu duim, theme bilong iu shud showaot klia insaed long tok. Iu shud mekhae long subject bilong iu insaed long introduction.

Taem hem sendem go olketa disaepol bilong hem for preach, Jesus talem klia datfala message wea olketa shud story abaotem. “Taem iufala go, preach, and sei, ‘Kingdom bilong heven hem kam klosap.’” (Matt. 10:7) Jesus sei abaotem taem bilong iumi: “Olketa bae talemaot disfala gud nius bilong kingdom.” (Matt. 24:14) Iumi kasem encouragement for “preachim word,” wea minim for followim evritaem Bible taem iumi givim witness. (2 Tim. 4:2) Bat, bifor iumi openem Bible or story abaotem Kingdom, planti taem iumi need for storyim samting wea pipol wari abaotem distaem. Maet iu storyim criminal fasin, wei wea pipol no garem waka, wei wea no followim justice, war, hao for helpem young pipol, sik, or dae. Bat no storyim tumas olketa nogud samting; message bilong iu hem mekhae long gudfala samting. Trae for tanem datfala story long Word bilong God and Kingdom hope.

Showim Why Datfala Subject Important Long Audience. Sapos iu bae givim tok long kongregeson, iu savve feel sure audience bilong iu bae interest long samting iu tok abaotem. Bat waswe, bae olketa lisin olsem man wea lanem samting wea barava affectim hem? Waswe, bae olketa interest bikos olketa luksavve hao samting olketa herem fitim living bilong olketa and bikos iu muvim olketa for want for duim samting saed long datwan? Ansa bae yes only sapos iu tingting gud abaotem audience bilong iu—living, wari, and tingting bilong olketa—taem iu preparem tok bilong iu. Sapos iu duim olsem, talem samting insaed introduction wea showimaot datwan.

Nomata sapos iu givim tok long platform or iu witness long man wanwan, wanfala best wei for mekem pipol interest long wanfala subject hem for mekem olketa join insaed. Showim hao problem bilong olketa, need bilong olketa, or kwestin wea olketa tingim hem join witim datfala subject wea iu storyim. Sapos iu mekem klia hao iu bae storyim olketa difren part bilong datfala subject and no olketa main samting nomoa, olketa bae interest tumas for lisin. For duim olsem iu mas prepare gud.

Wei wea Iu Talem. Samting iu talem long introduction bilong iu hem barava important, bat wei wea iu talem tu savve mekem interest kamap. So taem iu prepare, no tingim nomoa samting wea iu bae talem bat tu wei wea iu bae talem datwan.

For kasem goal bilong iu hem important for iusim olketa stretfala word, so maet hem gud for preparem olketa firstfala sentence long careful wei. Olketa sentence wea short and simpol nao best. For wanfala tok long kongregeson, maet iu raetem olketa sentence hia insaed note bilong iu, or maet iu disaed for baeheartim, mekem firstfala toktok bilong iu garem feeling wea fitim. For talem wanfala gudfala introduction long isisi wei savve helpem iu feel relax for givim tok.

Wanem Taem for Preparem Introduction. Planti difren tingting stap long diswan. Samfala speaker wea garem savve sei for preparem introduction firstaem. Olketa narawan wea studyim wei for toktok long pablik sei for preparem introduction bihaen iu preparem finis body bilong tok.

Hem tru, iu mas savve long subject bilong iu and olketa main point wea iu ting for storyim bifor iu savve tingim introduction wea fitim. Bat waswe sapos iu preparem tok bilong iu from wanfala aotlaen wea set finis? Bihaen iu readim finis datfala aotlaen, sapos iu tingim idea for introduction, hem gud nomoa for raetem datwan. Remember tu, for garem gudfala introduction iu mas tingim audience bilong iu and information long datfala aotlaen.