Introducem Olketa Scripture Long Gudfala Wei

BIBLE nao faondeson bilong instruction wea iumi kasem long olketa meeting long kongregeson. And tu olketa Bible scripture nao main samting wea iumi mekhae long hem long field ministry. Bat, for mekem olketa scripture saportim wanem iumi storyim bae depend long gudfala wei wea iumi introducem olketa.

Diswan needim moa samting winim wei for talem wanfala scripture and invaetem samwan for readim witim iu. Taem iu introducem wanfala scripture, trae for kasem tufala goal: (1) Mekem man luk forward for herem, and (2) mekhae long reason why nao iu iusim datfala scripture. Iu savve iusim samfala difren teknik for kasem tufala goal hia.

Askem Wanfala Kwestin. Diswan hem barava gudfala wei sapos audience bilong iu no luksavve finis long ansa. Trae for askem datfala kwestin long wei wea mekem pipol tingting. Jesus duim diswan. Taem olketa Pharisee kam long hem long temple and testim savve bilong hem long olketa Scripture front long evri pipol, Jesus askem olketa: “Wanem nao tingting bilong iufala abaotem Christ? Hem son bilong hu?” Olketa ansa olsem: “Bilong David.” Then Jesus hem ask: “So, why nao David thru long holy spirit kolem hem ‘Lord’?” And then hem go ahed for talem toktok bilong Psalm 110:1. Olketa Pharisee kwaet nao. Bat, olketa pipol hapi tumas for lisin long Jesus.—Matt. 22:41-46.

For introducem samting long field ministry, iu maet iusim kaen kwestin olsem: “Iumi tufala garem nem. Waswe, God garem nem? Iumi savve faendem ansa long Psalm 83:18.” “Waswe, enitaem bae olketa man garem wanfala gavman nomoa? Lukim ansa bilong diswan long Daniel 2:44.” “Waswe, Bible barava storyim olketa samting wea happen long taem bilong iumi? Markem samting wea 2 Timothy 3:1-5 talem witim samting wea iu lukim.” “Waswe, enitaem wei for safa and dae bae finis? Iumi savve faendem ansa wea Bible givim long Revelation 21:4, 5.”

Long wanfala tok, gudfala wei for iusim olketa kwestin for introducem olketa scripture savve muvim audience for interest for lukluk long olketa scripture, nomata olketa savve finis long hem. Bat, bae olketa duim? Datwan maet depend long wei wea olketa really interest or nomoa long olketa kwestin wea iu askem. Nomata taem audience interest long datfala subject, mind bilong olketa maet wakabaot taem iu readim olketa scripture wea olketa herem staka taem finis. For stopem diswan, iu need for ting raonem hao for givim tok long interesting wei.

Storyim Wanfala Problem. Maet iu storyim wanfala problem and then readim wanfala scripture wea bae help for ansarem datwan. No mekem audience expectim tumas samting. Planti taem wanfala scripture givim part long ansa nomoa. Bat, taem iu readim datfala scripture, maet iu askem audience for ting raonem wanem instruction nao datwan givim for deal witim problem hia.

Long sem wei, maet iu talem wanfala principle saed long fasin wea followim God and then iusim wanfala Bible story for showimaot why nao hem wise for live followim datwan. Sapos wanfala scripture garem tufala (or maet moa) barava klia point wea join witim samting speaker storyim, samfala speaker askem audience for lukaotem olketa. Sapos luk olsem wanfala problem hem hard tumas for audience ansarem, iu savve muvim tingting bilong olketa long wei for storyim tu-thri difren ansa and then letem scripture and mining bilong hem showimaot ansa.

Point Go Long Bible Olsem Paoa. Sapos iu mekem grow finis interest long subject wea iu storyim and iu talem tu-thri idea wea pipol garem abaotem datwan, maet iu introducem wanfala scripture taem iu sei: “Lukim samting wea Word bilong God talem abaotem diswan.” For duim olsem showimaot why nao samting wea iu bae readim hem garem paoa.

Jehovah iusim olketa man olsem John, Luke, Paul, and Peter for raetem samfala difren part bilong Bible. Olketa raetem nomoa; bat really hem kam from Jehovah. For sei “Peter raetem” or “Paul talem” for introducem wanfala scripture, especially taem iumi story witim pipol wea no savve gud long olketa Holy Scripture, maet no garem sem paoa olsem wanfala introduction wea showimaot hao datfala scripture hem toktok bilong God. Hem interesting hao long samfala taem, Jehovah talem Jeremiah for introducem samting wea hem bae talemaot witim toktok hia: “Herem word bilong Jehovah.” (Jer. 7:2; 17:20; 19:3; 22:2) Nomata iumi iusim nem bilong Jehovah taem iumi introducem olketa scripture or nomoa, bifor iumi finisim datfala story, iumi shud trae for showim hao toktok insaed long Bible hem word bilong hem.

Tingim Olketa Verse wea Stap Raonem. Iu shud savve gud long olketa verse wea stap raonem wanfala scripture taem iu introducem datwan. Long samfala taem iu bae talem stret wanem nao olketa verse hia storyim; bat, olketa verse hia maet affectim samting wea iu talem long samfala nara wei tu. Olsem example, waswe, bae iu introducem toktok bilong Job wea fraet long God long sem wei wea iu introducem toktok bilong wanfala giaman fren bilong hem? Luke nao raetem buk bilong Acts, bat hem talem toktok bilong James, Peter, Paul, Philip, Stephen, and olketa angel, and tu Gamaliel and samfala nara Jew wea nating Christian. Hu nao bae iu sei raetem scripture wea iu talem? Olsem example, remember David no raetem evri psalm and Solomon no raetem full buk bilong Proverbs. Hem gud tu for savve hu nao datfala man wea raetem Bible hem story witim and wanem nao subject wea hem storyim.

Iusim Nara Information. Diswan hem barava help sapos iu savve showim hao samting wea happen long taem bilong datfala Bible story hem klosap semsem olsem samting wea iu story abaotem distaem. Long samfala nara taem maet iu need for iusim nara information for minim wanfala scripture. Olsem example, sapos iu iusim Hebrews 9:12, 24 long wanfala tok abaotem ransom, bifor iu readim datwan maet iu need for talem lelebet toktok abaotem datfala insaed rum bilong tabernacle, wea, olsem scripture showimaot, piksarem ples wea Jesus go insaed long hem taem hem go long heven. Bat no storyim tumas nara information long wei wea hem kamap moa important winim scripture wea iu introducem.

For kamap moabeta long wei for introducem olketa scripture, lukluk gud long wei bilong olketa speaker wea garem savve. Lukim olketa difren teknik wea olketa iusim. Ting raonem hao gud nao olketa wei hia. Taem iu preparem olketa tok bilong iu, luksavve long olketa main scripture, and tingting gud abaotem why nao iu bae iusim each wan. For mekem audience barava kasem point, planim gud wei for introducem olketa. Gogo, followim disfala teknik for evri scripture wea iu iusim. Taem disfala part long wei wea iu givim tok hem kamap moabeta, iu bae barava mekem Word bilong God hem main samting.