Encouragem Wei for Iusim Bible

IUMI want for leadim evriwan for ting strong long Word bilong God, Bible. Datfala holy buk hem faondeson bilong message wea iumi preachim, and iumi wantem pipol for luksavve hao samting wea iumi talem, hem no bilong iumi, bat bilong God. Pipol need for mekem grow wei for trustim Bible.

Long Field Ministry. Taem iumi prepare for field ministry, evritaem chusim wanfala or moa scripture for showim pipol wea willing for lisin. Nomata sapos iu kwiktaem for offerim Bible literature, planti taem hem gud for readim wanfala scripture wea fitim. Bible garem bigfala paoa winim eni samting wea iumi maet talem for leadim pipol wea olsem sheep. Long taem wea iu no savve read from Bible, iu maet disaed for talem toktok bilong hem. Long first century, no planti copy bilong olketa Scripture scroll stap for iusim. Nomata olsem, Jesus and olketa aposol bilong hem talem planti toktok from olketa Scripture. Iumi tu shud trae for baeheartim olketa scripture and iusim long wei wea fitim long ministry, maet samfala taem iumi talem toktok bilong hem nomoa.

Taem iu savve readim Bible, holem long wei wea haosholder savve luk followim taem iu read. Sapos haosholder savve luk followim long Bible bilong hemseleva, maet diswan savve affectim hem long wei wea moa big.

Bat, iu mas luksavve hao samfala wea transleitim Bible changem samfala samting long Word bilong God. Transleison bilong olketa maet no followim evribit languis wea olketa raetem Bible long hem firstaem. Planti transleison bilong distaem aotem nem bilong God, mekem hem hard for minim samting wea olketa firstfala languis talem abaotem man wea dae, and haedem samting Bible talem abaotem purpose bilong God for earth. For showim diswan long wanfala man, iu maet need for markem samfala important scripture from samfala difren Bible or from samfala oldfala transleison long sem languis. Long planti subject, Reasoning From the Scriptures hem markem olketa difren wei wea samfala transleison talem samfala important toktok long olketa verse wea pipol iusim planti taem. Eniwan wea lovem truth bae hapi for savve long trufala information.

Long Olketa Kongregeson Meeting. Evriwan shud kasem encouragement for iusim Bible long olketa meeting long kongregeson. Diswan duim planti gudfala samting. Hem helpem audience for ting strong long samting wea meeting storyim. Hem mekem eye lukim instruction wea speaker storyim. And hem strongim long mind bilong olketa niu wan wea interest hao Bible nao faondeson bilong olketa biliv bilong iumi.

Wei wea audience bae luk followim reading bilong iu long Bible bilong olketa seleva or nomoa, hem bae depend long bigfala wei long encouragement bilong iu for duim datwan. Best wei hem for askem olketa for openem Bible.

Hem saed bilong iu, olsem speaker, for chusim wanem scripture iu laek for strongim long wei for askem audience for lukim long Bible bilong olketa. Best wei nao hem for readim olketa scripture wea bae strongim olketa main point. Then, sapos iu garem inaf taem, addim go tu-thri moa wea saportim olketa point bilong iu.

Bat, planti taem wei for talem nem bilong scripture nomoa or for askem audience for lukim long Bible bilong olketa hem no inaf. Sapos iu readim wanfala scripture then go long narawan bifor audience garem taem for faendem first wan, olketa bae wikdaon and no trae moa for luk followim long Bible. Iu mas lukluk gud. Taem klosap evriwan faendem finis datfala verse, readim.

Ting firstaem. Givim inaf taem bihaen iu talem scripture for audience faendem bifor iu readim. Diswan bae katem daon wei for westem taem for weitim audience for faendem scripture. Nomata iu bae no storyim planti information from iu givim taem for audience faendem olketa scripture, gud samting bae kamaot from datwan.