Chapter Thirtin
Wanfala Big Crowd Front Long Throne Bilong Jehovah
1. (a) Bifor olketa savve kasem reward, wanem nao olketa servant bilong God bifor and datfala 144,000 mas kasem? (b) Wanem nao “wanfala big crowd” wea laef distaem fit for kasem?
OLKETA faithful servant bilong God from Abel go kasem John Baptaesa putim wei for duim will bilong God olsem first samting long living bilong olketa. Nomata olsem, evriwan dae finis and weit for resurrect long earth insaed niu world bilong God. Datfala 144,000 wea bae rul witim Christ insaed Kingdom bilong God long heven mas dae tu bifor olketa savve kasem reward bilong olketa. Nomata olsem, Revelation 7:9 showim hao insaed long olketa last day, “wanfala big crowd” from evri nation bae nating dae bat bae garem hope for laef olowe long earth. Waswe, iu wanfala long olketa?
Luksavve Long Datfala Big Crowd
2. Wanem nao lead go for olketa barava luksavve long hu nao datfala big crowd wea Revelation 7:9 storyim?
2 Long 1923, olketa servant bilong Jehovah luksavve hao “sheep” long parabol wea stap long Matthew 25:31-46 and “nara sheep” wea hem storyim long John 10:16 hem pipol wea garem chance for laef olowe long earth. Long 1931, olketa luksavve hao olketa wea garem mark long forhed wea Ezekiel 9:1-11 storyim, olketa nao sekson wea garem hope for stap long earth. Then, long 1935, olketa lanem hao datfala big crowd nao part bilong nara sheep sekson wea Jesus storyim. Distaem, namba bilong disfala big crowd kasem planti million.
3. Why nao disfala toktok “standap front long throne” hem no minim wanfala sekson for go long heven?
3 Revelation 7:9 no sei datfala big crowd stap long heven. Wei wea “olketa standap front long throne” bilong God no minim olketa stap long heven. Diswan minim God lukim olketa. (Psalm 11:4) Wei wea datfala big crowd, “wea no eni man savve kaontem,” hem no wanfala sekson for go long heven hem showaot klia taem iumi markem witim sekson wea Revelation 7:4-8 and Revelation 14:1-4 storyim. Long there hem showim namba wea Jehovah tekem from earth for go long heven hem 144,000.
4. (a) Wanem nao “big trabol” wea datfala big crowd laef thru long hem? (b) Olsem Revelation 7:11, 12 hem talem, hu nao lukluk long datfala big crowd and share for worship witim olketa?
4 Revelation 7:14 sei olsem abaotem datfala big crowd: “Olketa hia kamaot from datfala big trabol.” Olketa laef thru long trabol wea moa worse winim enitaem insaed history bilong man. (Matthew 24:21) Taem olketa sei thankiu long God and Christ for sevem olketa, then evri faithful creation long heven bae joinim olketa for sei: “Amen! Blessing and glory and wisdom and thankiu and honor and paoa and strong olketa bilong God bilong mifala for olowe and olowe. Amen.”—Revelation 7:11, 12.
Pruvim Olketa Fit
5. Hao nao iumi savve luksavve long olketa mark for kamap part bilong datfala big crowd?
5 Wei wea datfala big crowd laef thru long big trabol hem followim olketa raeteous mark bilong Jehovah. Bible story abaotem olketa fasin bilong sekson wea bae sev. Dastawe, pipol wea lovem raeteous fasin savve duim samting distaem for pruvim olketa fit for sev. Wanem nao olketa hia mas duim?
6. Why nao datfala big crowd olketa olsem sheep?
6 Olketa sheep garem kwaet fasin and followim leader bilong olketa. So taem Jesus sei hem garem nara sheep wea bae no go long heven, hem minim pipol wea want for stap olowe long earth and tu bae willing for followim olketa teaching bilong hem. Hem sei: “Olketa sheep bilong mi lisin long voice bilong mi, and mi savve long olketa, and olketa followim mi.” (John 10:16, 27) Olketa hia pipol wea really lisin and obeyim wanem Jesus talem, wea mekem olketa kamap olketa disaepol bilong hem.
7. Wanem nao olketa fasin wea olketa follower bilong Jesus need for mekem grow?
7 Wanem fasin moa bae each follower bilong Jesus hia need for mekem grow? Word bilong God givim disfala ansa: “Iufala mas lusim oldfala fasin wea followim wei bilong iufala bifor and . . . werem niufala fasin wea God wakem fitim will bilong Hem long trufala raeteous fasin and loyal fasin.” (Ephesians 4:22-24) Olketa mekem grow olketa fasin wea buildimap wei for garem wan mind midolwan long olketa servant bilong God—“love, hapi, peace, long-safaring, kaenfala fasin, gudfala fasin, faith, kwaet fasin, fasin for kontrolem seleva.”—Galatians 5:22, 23.
8. Wanem nao datfala big crowd bae feisim taem olketa saportim datfala remnant?
8 Datfala big crowd saportim smol namba bilong olketa wea garem hope for go long heven, wea leadim disfala preaching waka. (Matthew 24:14; 25:40) Olketa nara sheep hia saportim disfala waka, nomata olketa savve bae olketa feisim persecution bikos long start bilong olketa last day, Christ Jesus and olketa angel bilong hem torowem Satan and olketa demon bilong hem aot from heven. Diswan minim “trabol for earth . . . bikos Devil hem kamdaon finis long iufala, and hem kros tumas, from hem savve hem garem shortfala taem nomoa.” (Revelation 12:7-12) So, Satan mekem wei for againstim olketa servant bilong God kamap moa big taem end bilong disfala system kam klosap.
9. Wei for preachim gud nius wea olketa servant bilong God duim hem win long wanem wei, and why nao olsem?
9 Nomata olketa kasem raf persecution, preaching waka hem go ahed strong. Firstaem tu-thri thousand nomoa preachim Kingdom long end bilong World War I, bat distaem planti million duim from Jehovah bin promis: “Eni samting for faet againstim iu bae no win.” (Isaiah 54:17) Wanfala member bilong hae kot bilong olketa Jew tu luksavve hao waka bilong God no savve lus. Long first century hem sei olsem long olketa Pharisee abaotem olketa disaepol: “Leavim olketa; (bikos, sapos disfala plan or waka hem from olketa man, bae hem finis; bat sapos hem from God, iufala bae no fit for finisim olketa;) nogud maet iufala kamap pipol wea faet againstim God.”—Acts 5:38, 39.
10. (a) Wanem nao “mark” wea olketa bilong datfala big crowd garem hem minim? (b) Hao nao olketa servant bilong God obeyim datfala “voice from heven”?
10 Wanfala tokpiksa showim olketa bilong datfala big crowd bae kasem mark for stap laef. (Ezekiel 9:4-6) Datfala “mark” nao hem pruv wea showaot olketa dedicate long Jehovah, olketa baptaes olsem disaepol bilong Jesus, and traem best for mekem grow fasin olsem Christ. Olketa obeyim datfala “voice from heven” wea sei olsem abaotem rul bilong giaman religion bilong Satan evriwea long world: “Go aot from hem, pipol bilong mi, sapos iufala no want for share witim hem long olketa sin bilong hem, and sapos iufala no want for kasem eni trabol bilong hem.”—Revelation 18:1-5.
11. Long wanem important wei nao olketa bilong datfala big crowd showimaot olketa servant bilong Jehovah?
11 And tu, Jesus talem long olketa follower bilong hem: “From diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.” (John 13:35) Long wei wea difren evribit, olketa member long olketa religion bilong disfala world killim dae olketa nara member bilong olketa long war, planti taem reason hem bikos olketa kam from difren nation! Word bilong God hem talem: “Olketa pikinini bilong God and olketa pikinini bilong Devil showaot long disfala samting: Eniwan wea no go ahed for duim raeteous fasin hem no kam from God, and tu man wea no lovem brata bilong hem. . . . Iumi mas garem love for each other; no olsem Cain, wea hem kam from datfala nogud man and wea killim dae brata bilong hem.”—1 John 3: 10-12.
12. Long datfala big trabol, hao nao Jehovah bae deal witim ‘olketa tree’ bilong religion wea garem nogud frut?
12 Jesus sei: “Evri gudfala tree garem gudfala frut, bat evri rotten tree garem nogud frut; gudfala tree kanduit garem nogud frut, and rotten tree kanduit garem gudfala frut. Evri tree wea no garem gudfala frut bae olketa katem and torowem insaed long fire. Tru nao, from frut bilong olketa iufala bae luksavve long olketa man olsem.” (Matthew 7:17-20) Frut bilong olketa religion bilong world distaem showaot olketa olsem rotten “tree” wea klosap nao Jehovah bae distroem long datfala big trabol.—Revelation 17:16.
13. Hao nao datfala big crowd showaot olketa “standap front long throne” bilong Jehovah tugeta?
13 Revelation 7:9-15 story abaotem wanem nao lead go for mekem datfala big crowd for stap sef. Olketa “standap front long throne” bilong Jehovah tugeta and apim sovereign rul bilong hem. Olketa “wasim finis kaleko bilong olketa and mekem kamap white long blood bilong Lamb,” wea showaot olketa luksavve long wei wea sakrifaes bilong Jesus hem kavarem sin. (John 1:29) Olketa dedicatem olketa seleva long God and showimaot diswan taem olketa baptaes long wata. So olketa standap klin front long God, wea white kaleko hem piksarem, and givim “holy service long hem day and naet.” Waswe, samfala wei stap wea iu savve mekem laef bilong iu kamap moa klos fitim wanem disfala scripture hem storyim?
Olketa Gudfala Samting Distaem
14. Wanem nao samfala barava spesol samting wea olketa servant bilong Jehovah kasem distaem?
14 For sure iu lukim finis olketa barava spesol samting wea olketa wea servem Jehovah kasem long distaem tu. Olsem example, taem iu lane abaotem olketa raeteous purpose bilong Jehovah, iu minim hao wanfala naesfala hope stap for future. So distaem laef bilong iu garem purpose—for servem trufala God witim hapi hope for laef olowe long wanfala paradaes earth. Tru nao, King Jesus Christ “bae leadim [datfala big crowd] go long olketa springwata bilong laef.”—Revelation 7:17.
15. Hao nao Olketa Jehovah’s Witness kasem gud samting taem olketa followim olketa Bible principle saed long politik and fasin?
15 Wanfala nambawan samting wea datfala big crowd kasem distaem hem love, wan mind, and peace wea stap midolwan long olketa servant bilong Jehovah evriwea long world. From iumi evriwan kaikaim sem spiritual kaikai, iumi evriwan obeyim olketa law and principle wea semsem from insaed Word bilong God. Dastawe iumi no divaed saed long olketa idea bilong politik and nation. And tu, iumi followim olketa hae mark saed long fasin wea God askem from pipol bilong hem. (1 Corinthians 6:9-11) So, winim wei for raoa, no garem wan mind, and duim dirty fasin wea big tumas long world, pipol bilong Jehovah stap insaed wanfala spiritual paradaes. Lukim hao Isaiah 65:13, 14 storyim diswan.
16. Nomata olketa kasem problem wea planti pipol kasem long living, olketa bilong datfala big crowd garem wanem hope?
16 Tru, olketa servant bilong Jehovah long earth no perfect. And olketa kasem tu olketa problem wea planti pipol kasem long living, olsem hard taem saed long living or olketa safa taem war bilong olketa nation kamap. Olketa feisim tu sik, wei for safa, and dae. Bat olketa garem faith hao insaed long datfala niu world, God “bae aotem krae from eye bilong olketa, and dae bae nomoa, sorre and singaot and pain bae nomoa tu.”—Revelation 21:4.
17. Nomata wanem maet happen long iumi distaem, wanem nambawan future nao stap for olketa wea worshipim trufala God?
17 Nomata sapos iu dae distaem from iu olo, sik, accident, or persecution, Jehovah bae resurrectim iu for laef insaed Paradaes. (Acts 24:15) Then iu bae go ahed for enjoyim spiritual feast insaed datfala Thousand Year Rul bilong Christ. Love bilong iu for God bae kamap moa deep taem iu lukim olketa purpose bilong hem fulfill long nambawan wei. And olketa physical blessing wea Jehovah bae provaedem long datfala taem bae mekem love bilong iu for hem deep go moa. (Isaiah 25:6-9) Wanfala nambawan future stap for pipol bilong God!
Review
• Bible joinim datfala big crowd witim wanem bigfala samting wea bae happen?
• Sapos iumi barava want for insaed long datfala big crowd wea God appruvim, wanem nao iumi mas duim distaem?
• Hem hao important long iu for kasem olketa blessing wea datfala big crowd kasem distaem and bae kasem insaed niu world bilong God?
[Piksa long page 123]
Datfala big crowd wea kasem samfala million worshipim tru God tugeta