Wanem Nao Evriting Hia Minim?

JESUS CHRIST hem sei iumi bae luksavve long “taem bilong end bilong disfala world” taem iumi lukim war, kaikai hem short, sik, and olketa earthquake.—Matthew 24:1-8; Luke 21:10, 11.

Start long 1914, olketa war wea kamap midolwan olketa kantri and olketa difren tribe barava spoelem man. Planti taem diswan from olketa bigman bilong religion join insaed politik and distaem from olketa attak bilong terrorist.

Nomata science kamap moabeta long saed bilong kaikai, staka handred million pipol evriwea long world no garem inaf kaikai. Each year staka million pipol dae from olketa no garem inaf kaikai.

Olketa sik wea isi for spred hem wanfala part tu long saen wea Jesus talem. Bihaen World War I, wanfala kaen flu hem spred and killim dae winim 21,000,000 pipol. Sik hia no olsem olketa big sik bifor wea kamap long wanfala ples nomoa. Hem kasem olketa kantri evriwea long world, nomata long samfala island tu. Distaem AIDS spred evriwea long world, and tu kaen sik olsem TB, malaria, river blindness, and Chagas’ disease gohed for spoelem pipol long olketa poor kantri.

Olketa report showimaot hao planti thousand big and smol earthquake kamap evri year. Nomata distaem olketa savve gud hao for markem and talemaot hao big nao olketa earthquake, olketa disaster from earthquake long area wea planti pipol stap hem kamap long nius olowe.

Bible talem finis: “Iu mas savve, insaed long olketa last day nogud taem wea hard for deal witim bae kamap. From olketa man bae lovem olketa seleva, lovem selen, mekhae long seleva, bighed, tok daonem God, no obeyim dadi and mami, no savve sei thankiu, no loyal, no garem love, no savve agree, tok laea againstim narawan, no savve kontrolem seleva, raf tumas, no lovem gudfala fasin, brekem trust, followim mind bilong seleva, fulap long praod fasin, lovem hapitaem winim wei for lovem God, hem luk olsem olketa worship long wei wea lovem God bat datwan nating affectim laef bilong olketa; and from olketa hia tanawe.”—2 Timothy 3:1-5.

Waswe, iu agree hao iumi stap long “nogud taem wea hard for deal witim”?

Waswe, iu lukim hao pipol ova tumas for lovem olketa seleva, lovem selen, and praod fasin nao muvim olketa?

Iumi evriwan agree hao world hem fulap witim pipol wea laekem samting for olketa seleva nomoa bat no savve sei thankiu, no savve agree, no loyal.

Waswe, iu savve hao fasin for no obeyim mami and dadi and fasin for no garem love for narawan hem barava kamap moa big, no long samfala ples nomoa bat evriwea long world?

For sure iu luksavve hao iumi stap insaed wanfala world wea ova tumas for lovem hapitaem bat no lovem gudfala fasin.

Hem nao wanem Bible talem abaotem olketa fasin wea bae kamap big long “olketa last day.”

Waswe, iu needim moa samting for pruvim hao iumi stap insaed olketa last day? Jesus talem tu hao insaed disfala semtaem, samfala bae talemaot gud nius bilong Kingdom bilong God evriwea long earth. (Matthew 24:14) Waswe, diswan hem gohed?

Olketa printim Wastaoa, wea hem wanfala Bible magasin wea talemaot gud nius abaotem Kingdom bilong Jehovah, long moa languis winim eni nara magasin wea eni nara organization printim evritaem.

Evri year, Olketa Jehovah’s Witness iusim winim wan billion hour for preach long olketa man wanwan abaotem Kingdom bilong God.

Distaem, Olketa Jehovah’s Witness wakem olketa buk wea explainim Bible long 400 difren languis. Insaed diswan hem olketa languis bilong olketa smolfala grup wea stap farawe. Olketa Jehovah’s Witness preachim gud nius long evri kantri; olketa preach tu long planti island and area wea pipol long politik no interest long hem from olketa smol tumas. Long klosap evri kantri, olketa garem Bible education program wea kamap evritaem.

Tru nao, olketa gohed for talemaot gud nius bilong Kingdom bilong God evriwea long earth, no for changem world, bat for witness abaotem datwan. Pipol evriwea kasem chance for showimaot sapos olketa interest long hu nao wakem universe and earth and sapos olketa bae showimaot olketa respectim olketa law bilong hem and showimaot love bilong olketa for narawan.—Luke 10:25-27; Revelation 4:11.

Klosap, Kingdom bilong God bae aotem evri wicked pipol from disfala earth and mekem hem kamap wanfala paradaes.—Luke 23:43.

[Box long page 6]

Olketa Last Day Bilong Wanem?

Hem no olketa last day bilong olketa man. Bible givim hope for laef olowe for olketa wea duim will bilong God.— John 3:16, 36; 1 John 2:17.

Hem no olketa last day bilong disfala earth. Word bilong God hem promis hao disfala earth bae stap for olowe.—Psalm 37:29; 104:5; Isaiah 45:18.

Really hem olketa last day bilong disfala world wea pipol raf and no garem love, and tu, bilong pipol wea hol strong long olketa fasin bilong disfala world.—Proverbs 2:21, 22.

[Box/Piksa long page 7]

Waswe, Bible Hem Really Word Bilong God?

Olketa profet long Bible planti taem raetem disfala toktok: “Diswan nao samting wea Jehovah talem.” (Isaiah 43:14; Jeremiah 2:2) Jesus Christ, Son bilong God hem strongim tu hao hem ‘no talem samting bilong hemseleva.’ (John 14:10) Bible seleva talem klia: “Full Bible hem kam from God.”—2 Timothy 3:16.

Bible hem buk wea stap long planti languis winim eni nara buk. United Bible Societies talem hao Bible stap long winim 2,200 languis. No eni nara buk hem stap long staka ples long world winim Bible wea distaem winim foa billion copy stap. Waswe, iu agree hao wanfala message from God mas olsem nao?

For moa information abaotem olketa samting wea showim hao Bible hem really kam from God, lukim datfala buk Savvy wea Lead Go Long Laef Olawe or brochure A Book for All People, wea Olketa Jehovah’s Witness pablisim.

Sapos iu readim Bible and agree hao hem barava Word bilong God, iu bae barava kasem gud samting from datwan.

[Box/Piksa long page 8]

Wanem Nao Kingdom Bilong God?

Hem wanfala spesol gavman long heven wea tru God Jehovah, Creator bilong universe and earth, hem startim.—Jeremiah 10:10, 12.

Bible showimaot klia hao Jesus Christ nao datwan wea God givim paoa for rul long hem. (Revelation 11:15) Taem hem stap long earth, Jesus showimaot hao hem garem finis nambawan paoa from God—paoa wea mekem hem savve kontrolem olketa samting olsem wind and sea, for healim evrikaen sik, and for mekem olketa wea dae finis for laef bak tu. (Matthew 9:2-8; Mark 4:37-41; John 11:11-44) Olketa Bible profesi wea kam from God talem hao God bae givim tu “wei for rul and honor and kingdom, mekem evri pipol, nation and languis mas servem hem.” (Daniel 7:13, 14) Bible kolem datwan Kingdom bilong heven; Jesus Christ hem gohed for rul from heven distaem.

[Piksa long page 7]

Preaching abaotem gud nius kamap evriwea long world