LESON 6

Paradaes Hem Klosap!

Olketa nogud samting wea go ahed long world tuday showimaot hao datfala Paradaes hem klosap. Bible hem talem hao iumi bae lukim planti barava nogud samting taem Paradaes klosap for kam. Iumi stap long olketa taem olsem nao! Samfala samting wea Bible sei bae kamap hem olsem:

Olketa bigfala war. “Nation bae go againstim nation and kingdom againstim kingdom.” (Matthew 24:7) Disfala profesi kamap tru finis. Start long year 1914, tufala world war and planti nara bigfala faet kamap finis. Planti million pipol nao dae long olketa.

Sik kasem evri ples. “Long planti ples nogud sik” bae kamap. (Luke 21:11) Waswe, diswan happen? Tru nao. Cancer, sik long heart, TB, malaria, AIDS, and narakaen sik killim dae planti million pipol finis.

Short long kaikai. Evriwea raonem earth iu savve faendem pipol wea no garem inaf kaikai. Planti million pipol dae from hangre evri year. Diswan hem narafala saen wea showimaot Paradaes hem klosap kam. Bible hem sei: “Kaikai bae short.”—Mark 13:8.

Olketa earthquake. “Earthquake bae kamap long planti ples.” (Matthew 24:7) Diswan tu hem barava tru long taem bilong iumi. Winim wan million pipol dae finis from earthquake start kam from 1914.

Wanfala man mekem wanfala woman fraet witim gun

Wicked pipol. Pipol bae “lovem selen” and “lovem seleva.” Olketa bae “lovem hapitaem winim wei for lovem God.” Olketa pikinini bae “disobeyim dadi and mami.” (2 Timothy 3:1-5) Waswe, iu no agree hao planti pipol tuday olketa olsem? Olketa no garem eni respect for God, and olketa mek trabol for pipol wea trae for lane abaotem God.

Criminal fasin. Bae “fasin for brekem law hem kamap moa big.” (Matthew 24:12) Maet iu agree hao criminal fasin hem barava nogud winim olketa year bifor. Pipol evriwea insaed danger from man savve stealim, ravem, or spoelem olketa.

Evri samting hia showimaot hao Kingdom bilong God hem klosap. Bible hem sei: “Taem iufala lukim olketa samting hia happen, iufala savve hao kingdom bilong God hem kam klosap nao.” (Luke 21:31) Wanem nao Kingdom bilong God? Hem wanfala gavman bilong God long heven wea bae mekem Paradaes kamap long disfala earth. Kingdom bilong God bae changem olketa gavman bilong man.—Daniel 2:44.