Organize for Duim Will blo Jehovah

EVRIWEA lo world, staka religion, gavman, bisnis, and staka organization wea garem olketa difren goal, idea, and teaching nao stap. Bat wanfala organization hem barava difren. Bible showim klia datfala organization hem Olketa Jehovah’s Witness.

² From iu part lo organization blo Jehovah, datwan pruvim iu duim wat God laekem. (Ps. 143:10; Rome 12:2) Iu wanfala active pablisa wea waka tugeta witim olketa brata and sista raonem world wea garem love. (2 Cor. 6:4; 1 Pet. 2:17; 5:9) Olsem Bible promisim, datwan mekem iu kasem staka blessing and barava hapi. (Prov. 10:22; Mark 10:30) Taem iu faithful for duim wat Jehovah laekem distaem, iu redi for wanfala nambawan future wea bae stap for olowe.​—1 Tim. 6:18, 19; 1 John 2:17.

³ Nambawan Creator blo iumi garem wanfala spesol organization evriwea lo world wea organize lo theocratic wei. Diswan minim Jehovah nao rulim, and hem Hed lo evriwan. Iumi barava trustim hem. Hem nao Judge, Man wea givim Law, and King blo iumi. (Isa. 33:22) From hem God wea organize, hem mekem olketa arrangement for iumi “waka tugeta witim hem” for fulfillim plan blo hem.​—2 Cor. 6:1, 2.

⁴ From end blo disfala system hem klosap tumas, iumi followim lead blo King wea Jehovah appointim, Christ Jesus. (Isa. 55:4; Rev. 6:2; 11:15) Taem Jesus duim ministry blo hem lo earth, hem talem dat olketa disaepol blo hem bae duim waka winim waka wea hem duim. (John 14:12) Datwan bae tru bikos olketa disaepol blo Jesus bae staka and preach lo staka ples for longfala taem. Olketa bae talemaot gud nius abaotem Kingdom lo evri farawe ples lo earth.​—Matt. 24:14; 28:19, 20; Acts 1:8.

⁵ Iumi lukim diswan happen finis. Bat olsem Jesus talem, waka for preachim gud nius bae finis lo taem wea Jehovah markem. Evri profesi wea God talem lo Bible hem showim dat bigfala day blo Jehovah hem klosap.​—Joel 2:31; Zeph. 1:14-18; 2:2, 3; 1 Pet. 4:7.

⁶ Taem iumi luksavve lo wat Jehovah laekem lo disfala taem wea end hem barava klosap, iumi need for waka hard go moa for duim wat God laekem. Diswan shud mekem iumi for savve gud lo hao organization blo Jehovah waka and for waka tugeta witim. Hao organization waka hem followim olketa Bible principle, and olketa komandment, law, order, and olketa teaching wea insaed toktok blo God.​—Ps. 19:7-9.

⁷ Taem pipol blo Jehovah followim olketa direction hia wea kam from Bible, olketa garem peace and wan mind for waka gud tugeta (Ps. 133:1; Isa. 60:17; Rome 14:19) Wat nao strongim wan mind wea olketa brata and sista evriwea garem? Love. Iumi showim love for each other. (John 13:34, 35; Col. 3:14) Lo wei olsem, iumi gohed followim organization blo Jehovah lo heven.

ORGANIZATION BLO JEHOVAH LO HEVEN

⁸ Profet Isaiah, Ezekiel, and Daniel lukim olketa vision abaotem organization blo Jehovah lo heven. (Isa., chap. 6; Ezek., chap. 1; Dan. 7:9, 10) Aposol John tu lukim datwan lo wanfala vision and storyim lo buk blo Revelation. Hem lukim Jehovah sidaon lo throne and olketa angel wea stap raonem hem, olketa sei: “Jehovah God, wea hem nao datfala Olmaeti God wea stap bifor and wea stap distaem and wea bae hem kam, hem barava holy tumas.” (Rev. 4:8) John lukim tu wanfala “pikinini sheepsheep hem standap klosap long datfala throne” wea hem pikinini sheepsheep blo God, Jesus Christ.​—Rev. 5:6, 13, 14; John 1:29.

⁹ Disfala vision wea showim Jehovah sidaon lo wanfala throne, showimaot hem nao Hed blo disfala organization. 1 Chronicles 29:11, 12 sei olsem abaotem Jehovah and position blo hem: “O Jehovah iu barava hae tumas, iu garem bigfala paoa, iu gud tumas, iu garem glory, and iu barava nambawan, bikos evri samting lo skae and lo earth hem blo iu. O Jehovah, kingdom hem blo iu. Iu nao datwan wea mekem iuseleva hae for kamap hed ovarem evri samting. Olketa riches and glory hem from iu, and iu rul ovarem evri samting, paoa and strong hem lo hand blo iu, and iu fit for mekem evriwan garem bignem and for givim strong lo olketa.”

¹⁰ Jesus Christ wea waka tugeta witim Jehovah garem hae position lo heven, and Jehovah givim hem bigfala paoa. Tru tumas, God “putim evri samting anda long paoa bilong hem, and mekem hem hed ovarem evri samting for helpem kongregeson.” (Eph. 1:22) Aposol Paul sei olsem abaotem Jesus: “God givim hem position wea hae winim position bilong hem bifor. From God hem kaen tumas, hem givim hem nem wea winim evri nara nem, mekem long nem bilong Jesus, evriwan long heven and long earth and andanit long graon mas baodaon long hem, and evriwan mas talemaot Jesus Christ hem Lord, for mekhae long God, wea hem Dadi bilong iumi long heven.” (Phil. 2:9-11) So iumi savve barava trustim Jesus Christ wea hem lead lo raeteous wei.

¹¹ Profet Daniel lukim vision abaotem datfala Man from taem bifor kam sidaon lo throne blo Hem and olketa angel wea namba blo olketa hem “wan thousand taems staka thousand angel gohed waka for hem, and ten thousand taems ten thousand angel standap front lo hem.” (Dan. 7:10) Bible storyim staka angel hia olsem “spirit wea duim holy waka for helpem olketa wea bae sev.” (Heb. 1:14) Olketa angel hia organize ‘olsem olketa ruler, gavman, and olketa wea garem paoa.’​—Col. 1:16.

¹² Taem iumi markem taem for ting raonem olketa samting wea part lo organization blo Jehovah lo heven, iumi savve minim feeling blo Isaiah taem hem lukim datfala vision wea “Jehovah sidaon lo wanfala throne wea barava hae,” and “olketa seraph stap raonem hem.” Isaiah sei: “Sorre tumas lo mi! Mi barava no fit for laef, bikos mi man wea toktok blo mi no klin, and mi stap witim pipol wea toktok blo olketa no klin, bikos mi lukim finis King, Jehovah komanda blo olketa army!” Tru nao, Isaiah hem barava sapraes and hambol taem hem lukim part lo organization blo Jehovah. Samting wea hem lukim barava affectim hem, so taem hem herem voice from heven for hu nao bae talemaot judgment message blo Jehovah, Isaiah sei: “Mi lo hia! Sendem mi!”​—Isa. 6:1-5, 8.

¹³ Lo sem wei, taem iumi luksavve and tinghae lo organization blo Jehovah datwan savve encouragem iumi. Taem organization blo Jehovah gohed for muv, iumi traem best for muv witim. Iumi traem best for showim iumi trustim organization blo Jehovah distaem.

ORGANIZATION BLO JEHOVAH GOHED FOR MUV

¹⁴ Lo chapter 1 lo profesi blo Ezekiel, hem storyim Jehovah raedem wanfala big chariot lo heven. Disfala chariot hem representim part lo organization blo Jehovah wea iumi no savve lukim. Hem barava directim gud disfala chariot and hem iusim followim plan blo hem.​—Ps. 103:20.

¹⁵ Each wheel blo disfala chariot garem nara wheel insaed, wea garem sem diameter olsem wheel wea go akrosim. Datwan nao mekem olketa wheel hia for “muv lo eniwan lo fofala direction.” (Ezek. 1:17) Olketa wheel hia savve kwiktaem for change direction. Nomata olsem, Jehovah nao kontrolem disfala chariot. Jehovah no letem organization blo hem for go followim eni direction nomoa. Ezekiel 1:20 sei: “Olketa laef samting hia go lo ples wea spirit muvim olketa for go lo hem.” So Jehovah nao kontrolem organization blo hem for muv lo eni ples wea spirit blo hem leadim for go. Kwestin wea each wan mas tingim hem olsem, ‘Waswe, mi followim?’

¹⁶ For followim organization blo Jehovah hem no minim for attendim olketa meeting and joinim field ministry nomoa. Important samting, hem for iumi gohed grow lo spiritual wei. Iumi “luksavve lo olketa samting wea barava important” and up-to-date witim olketa spiritual kaikai wea iumi kasem. (Phil. 1:10; 4:8, 9; John 17:3) Iumi mas tingim tu, for wanfala organization hem organize, evriwan mas waka tugeta. So iumi mas luksavve why hem important for barava iusim gud olketa spiritual and material samting wea Jehovah provaedem for iumi duim waka blo hem. Taem iumi gohed followim chariot blo Jehovah lo heven, wat iumi duim lo laef bae fitim message wea iumi talemaot.

¹⁷ Witim help blo organization blo Jehovah, iumi gohed duim wat God hem laekem. Tingim, Man wea raedem disfala chariot lo heven hem Jehovah. Dastawe, taem iumi followim chariot blo hem datwan showim iumi respectim Jehovah and trustim hem for sevem iumi. (Ps. 18:31) Bible sei: “Jehovah bae givim strong lo pipol blo hem. Jehovah bae blessim pipol blo hem mekem olketa stap lo peace.” (Ps. 29:11) From iumi part lo organization blo Jehovah distaem, iumi kasem strong wea hem givim and garem peace wea hem blessim lo pipol blo hem wea organize. Yes, iumi no garem eni daot hao iumi bae gohed for kasem staka blessing taem iumi duim wat Jehovah laekem distaem and for olowe.