Hao Olketa Organizem and Lukaftarem Kongregeson

LO FIRST leta blo aposol Paul for olketa lo Corinth, hem talem wanfala important truth abaotem God. Hem sei: “God hem no laekem evri samting for olobaot bat hem laekem peace.” Then hem gohed for sei olsem abaotem olketa kongregeson meeting: “Duim evri samting long wei wea hem stret and wea no olobaot.”​—1 Cor. 14:33, 40.

² Lo start blo datfala leta, aposol Paul givim kaonsel abaotem wei wea kongregeson lo Corinth no wan mind. Paul encouragem olketa brata lo there for “mas agree long toktok” and for “wan mind long tingting bilong [olketa].” (1 Cor. 1:10, 11) Then hem gohed for givim kaonsel abaotem olketa samting wea savve spoelem wei wea kongregeson wan mind. Hem iusim illustration abaotem body blo iumi olketa man, for showim why hem important for wan mind and waka tugeta. Hem encouragem evriwan lo Christian kongregeson, nomata wanem waka nao olketa duim, for mas lovem and lukaftarem each other. (1 Cor. 12:12-26) Wei for waka tugeta olsem insaed kongregeson showim olketa mas organize.

³ Bat hao nao Christian kongregeson bae organize? Hu nao bae organizem? Hao nao bae olketa organize? Hu nao bae duim samfala waka wea olketa markem? Bible bae helpem iumi for ansarem olketa kwestin hia.​—1 Cor. 4:6.

ORGANIZE LO THEOCRATIC WEI

⁴ Christian kongregeson hem start lo Pentecost 33 C.E. Wat nao iumi savve lanem abaotem kongregeson lo first century? Olketa organizem and lukaftarem lo theocratic wei, wea minim, anda lo rul (Greek kraʹtos) blo God (Greek, the·osʹ). Tufala word hia stap lo 1 Peter 5:10, 11. Story abaotem samting wea happen lo Jerusalem klosap 2,000 years ago mekem iumi sure God nao startim kongregeson blo olketa anointed Christian. (Acts 2:1-47) Hem nao buildim, hem famili blo hem. (1 Cor. 3:9; Eph. 2:19) Olketa Christian kongregeson distaem tu followim sem wei wea olketa lo first century organize and waka tugeta.

⁵ Taem first kongregeson start hem garem samting olsem 120 disaepol. Olketa hia nao first wan wea kasem holy spirit wea datwan fulfillim Joel 2:28, 29. (Acts 2:16-18) Bat lo sem day, 3,000 moa olketa baptaes lo wata and kam insaed lo kongregeson blo olketa wea kasem holy spirit. Olketa acceptim teaching abaotem Christ and “gohed lane from olketa aposol.” Afta datwan, “Jehovah gohed for sevem pipol and olketa hia kamap disaepol.”​—Acts 2:41, 42, 47.

⁶ Wei wea kongregeson lo Jerusalem gohed for grow, hem mekem olketa hae priest for komplen and sei Jerusalem fulap witim teaching blo olketa disaepol. Staka priest blo olketa Jew kamap niu disaepol lo kongregeson lo Jerusalem.​—Acts 5:27, 28; 6:7.

⁷ Jesus sei: “Iufala bae talem pipol abaotem mi long Jerusalem, long evri ples long Judea and long Samaria, and long evri farawe ples long earth.” (Acts 1:8) Taem persecution happen lo Jerusalem afta Stephen hem dae, olketa disaepol wea stap lo there go lo Judea and Samaria. Bat lo eni ples wea olketa go, olketa gohed talemaot gud nius and staka moa kamap disaepol, includim samfala lo Samaria tu. (Acts 8:1-13) Bihaen, olketa preachim gud nius lo pipol wea no circumcise lo nation wea no Jew. (Acts 10:1-48) From olketa gohed for preach, samfala niu kongregeson moa kamap lo olketa difren ples from Jerusalem.​—Acts 11:19-21; 14:21-23.

⁸ Wat nao olketa arrangement wea olketa mekem for mek sure each niu kongregeson hem organize and olketa lukaftarem lo theocratic wei? Thru lo holy spirit blo God, olketa markem olketa shepherd for lukaftarem olketa sheepsheep. Lo olketa kongregeson wea Paul and Barnabas visitim lo first missionary gogo blo tufala, tufala appointim olketa elder. (Acts 14:23) Luke storyim meeting blo Paul witim olketa elder lo kongregeson lo Ephesus. Paul sei lo olketa: “Holy spirit hem markem iufala for elder long kongregeson bilong God wea hem baem long blood bilong Son bilong hem. So iufala mas lukluk gud long iufala seleva and lukaftarem olketa sheepsheep.” (Acts 20:17, 28) Olketa qualify for elder bikos olketa kasem olketa requirement wea Bible storyim. (1 Tim. 3:1-7) Olketa markem Titus wea waka witim Paul for appointim olketa elder lo kongregeson blo Crete.​—Titus 1:5.

⁹ Taem staka niu kongregeson kamap, olketa aposol and elder lo Jerusalem gohed for waka olsem olketa overseer for lukaftarem olketa Christian kongregeson wea stap lo first century. Olketa waka olsem governing body.

¹⁰ Taem aposol Paul raet for kongregeson lo Ephesus, hem storyim hao kongregeson bae gohed wan mind if olketa waka followim holy spirit blo God, and followim hedship blo Jesus Christ. Hem encouragem olketa Christian lo there for hambol and gohed garem ‘wan mind wea holy spirit helpem olketa for garem’ mekem olketa stap gud witim evriwan lo kongregeson. (Eph. 4:1-6) Then hem quotem Psalm 68:18 and storyim dat Jehovah provaedem olketa man wea qualify lo spiritual wei for helpem kongregeson olsem olketa aposol, profet, missionary, shepherd, and teacher. Olketa man hia olketa present from Jehovah, wea bae helpem full kongregeson for grow lo spiritual wei and mekem God hapi.​—Eph. 4:7-16.

OLKETA KONGREGESON DISTAEM FOLLOWIM SEM SAMTING WEA OLKETA APOSOL DUIM

¹¹ Distaem, evri kongregeson blo Olketa Jehovah’s Witness organize followim sem wei. Olketa kongregeson hia evriwea lo world wan mind witim olketa anointed wan. (Zech. 8:23) Jesus Christ nao mekem datwan for happen. Hem duim wat hem promisim taem hem faithful for stap witim olketa anointed wan “go kasem taem wea world hem finis.” Pipol wea kam insaed kongregeson tinghae lo datfala gud nius from God, dedicatem laef blo olketa lo Jehovah, and baptaes for kamap disaepol blo Jesus. (Matt. 28:19, 20; Mark 1:14; Acts 2:41) Olketa luksavve lo datfala “nambawan man for lukaftarem olketa sheepsheep” Jesus Christ, olsem Hed blo evri sheepsheep, wea hem olketa anointed Christian and olketa “nara sheepsheep.” (John 10:14, 16; Eph. 1:22, 23) “Wanfala sekson” hia gohed wan mind taem olketa faithful for luksavve lo hedship blo Christ and willing for followim datfala channel, wea hem nao “datfala wakaman wea faithful and wise” wea Christ appointim. Iumi laek for gohed trustim datfala channel distaem.​—Matt. 24:45.

WAKA BLO RELIGIOUS CORPORATION

¹² For provaedem spiritual kaikai lo barava taem and for preachim disfala gud nius abaotem Kingdom bifor end kam, datwan needim samfala corporation. Olketa corporation hia fitim olketa law blo each kantri, and olketa waka tugeta. Datwan mekem hem isi for preachim gud nius evriwea lo world.

HAO OLKETA ORGANIZEM WAKA LO BRANCH

¹³ Taem wanfala branch office hem start, olketa bae appointim thrifala or winim thrifala elder for insaed Branch Komiti for lukaftarem waka lo datfala kantri or olketa nara kantri wea stap anda lo datfala branch. Wanfala member blo datfala komiti bae serve olsem coordinator blo Branch Komiti.

¹⁴ Olketa divaedem olketa kongregeson anda lo each branch lo olketa circuit. Olketa circuit hia hem no semsem, depend lo ples, languis and namba blo olketa kongregeson. Circuit overseer nao kasem appointment for lukaftarem olketa kongregeson lo each circuit. Branch office givim direction lo circuit overseer lo hao for hem duim waka blo hem.

¹⁵ Olketa kongregeson luksavve lo hao organization hem organize, wea datwan mekem iumi evriwan for kasem gud samting. Olketa acceptim wei wea olketa appointim olketa elder wea lukaftarem waka lo olketa branch, circuit, and kongregeson. Olketa depend lo datfala wakaman wea faithful and wise for provaedem spiritual kaikai lo barava taem. Datfala faithful wakaman distaem barava stap anda lo hedship blo Christ, followim olketa Bible principle, and kwiktaem for followim direction wea kam from holy spirit. Taem iumi wan mind for waka tugeta, iumi enjoyim gud samting wea olketa Christian lo first century tu kasem: “Faith bilong olketa long olketa kongregeson hem gohed for kamap strong, and evriday plande pipol moa olketa biliv.”​—Acts 16:5.