Chapter 15

Hao Nao Jehovah Leadim Organization bilong Hem?

1. Wanem nao Bible showim aot abaot organization bilong Jehovah? Why nao diswan important long yumi?

THRU long olketa Scripture, Jehovah showim yumi lelebet samting abaot nambawan organization bilong hem long heven. (Isa. 6:2, 3; Ezek. 1:1, 4-28; Dan. 7:9, 10, 13, 14) Nomata yumi kanduit for lukim olketa spirit creature, hem talem yumi abaotem way wea work bilong olketa holy angel hem affectim olketa trufela worshiper long earth. (Gen. 28:12, 13; 2 Ki. 6:15-17; Ps. 34:7; Matt. 13:41, 42; 25:31, 32) Bible story tu abaot organization bilong Jehovah long earth and hem helpem yumi for meanim hao hem leadim diswan. Sapos yumi meanim olketa spiritual samting hia, diswan bae helpem yumi for “wakabaot fitim way bilong Jehovah mekem hem barava hapi.”​—⁠Col. 1:9, 10.

Luksavvy long Part Wea Stap long Earth

2. Start long Pentecost bilong 33 C.E. wanem nao kongregeson bilong God?

² For 1,545 year, nation bilong Israel hem kongregeson bilong God. But they fail for keepim Law covenant and they rejectim Son bilong God. So Jehovah startim wanfela niu kongregeson, and hem mekem wanfela niu covenant withim them. Olketa Scripture story abaot disfela kongregeson olsem “waef” bilong Kraest, wea garem 144,000 wea God choosim for stap withim Son bilong hem long heven. (Eph. 5:22-32; Rev. 14:1; 21:9, 10) Olketa first wan they kasem anointing withim holy spirit long Pentecost, 33 C.E. Thru long holy spirit Jehovah barava prove-im hao diswan nao kongregeson wea hem bae use-im for fulfillim purpose bilong hem.​—⁠Heb. 2:2-4.

3. Hu nao insaed long organization bilong Jehovah long earth distaem?

³ Distaem only wanfela remnant bilong 144,000 they stap long earth. But, long way wea fulfillim Bible profesi, wanfela great crowd bilong “other sheep” they hipap withim them. Jesus Kraest, datfela Nambawan Shepherd, hem joinim “other sheep” hia withim olketa wea they remnant bilong olketa follower bilong hem wea born long spirit mekem they kamap olsem “wanfela flock” under long hem long way wea hem “wanfela shepherd” bilong them. (John 10:11, 16; Rev. 7:9, 10) Everywan hia nao insaed long wanfela organization wea garem wan mind, organization bilong Jehovah long earth distaem.

Hem Followim Theocratic Way

4. Hu nao leadim organization, and hao nao hem duim olsem?

⁴ Disfela toktok long Scripture, “kongregeson bilong living God” showim aot klia hu nao hem leadim. Disfela organization hem theocratic, or God nao rulim. Jehovah leadim pipol bilong hem thru long dat wan wea Hem appointim for hed long kongregeson wea yumi no savvy lukim, Lord Jesus Kraest, and thru long Word bilong Hem, Bible.​—⁠1 Tim. 3:14, 15; Eph. 1:22, 23; 2 Tim. 3:16, 17.

5. (a) Wanem nao show aot God hem leadim kongregeson long first century? (b) Wanem nao show aot Jesus hem still hed bilong kongregeson?

⁵ Way wea hem lead long theocratic way hem barava show aot klia taem holy spirit hem muvim olketa firstfela member bilong disfela kongregeson for duim samting long Pentecost bilong 33 C.E. (Acts 2:1-4, 32, 33) Hem show aot klia taem angel bilong Jehovah leadim way for talemaot gud nius long Africa. (Acts 8:26-39) Long sem way, taem voice bilong Jesus hem talem samting wea change-im Saul bilong Tarsus and tu taem missionary work hem start long olketa Gentile. (Acts 9:3-7, 10-17; 10:9-16, 19-23; 11:12) But only samfela taem hem no leadim them long olketa spesel way olsem. Go-go no anywan savvy herem voice from heven, no anywan lukim angel and no anywan garem present bilong spirit for duim mira­kol moa. Nomata olsem Jesus promisim olketa faithful follower bilong hem: “Lukim! Mi stap withim yufela go kasem end bilong disfela system,” and every samting wea happen show aot diswan hem tru. (Matt. 28:20; 1 Cor. 13:8) Olketa Jehovah’s Witness luksavvy long hedship bilong hem, and tu planti samting prove-im hao they kanduit for go ahed for talemaot Kingdom message taem pipol barava againstim them sapos hem no helpem them.

6. (a) Hu nao insaed long “faithful and wise slave,” and why nao olsem? (b) Wanem kaen assignment nao hem givim long datfela “slave”?

⁶ Taem Jesus klosap for dae, hem talem olketa disaepol bilong hem abaot wanfela “faithful and wise slave” wea hem olsem Master, bae givim spesel responsibility long hem. Jesus say datfela “slave,” bae stap taem Lord hem go ap long heven and bae still stap laef taem Kraest hem kam back. Datwan no fitim wanfela man. But hem fitim faithful anointed kongregeson bilong Kraest olsem wanfela sekson. Jesus savvy hem bae buyim them withim blood bilong hemseleva, dastawe hem fit for say they “slave” bilong hem olsem wanfela sekson. Hem givim them work for duim, komandim everywan for mekem disaepol and then for go ahed for feedim them long spiritual way, givim “kaikai [spiritual] long them long proper taem.” Holy spirit hem approve-im appointment bilong them long Pentecost bilong 33 C.E.—Matt. 24:45-47; 28:19, 20; 1 Cor. 6:19, 20; lukim Isaiah 43:10.

7. (a) Wanem bigfela responsibility nao datfela “slave” garem? (b) Why nao hem important for yumi followim instruction from disfela way?

⁷ Taem Master hem kam back, sapos datfela “slave” hem faithful for duim work bilong hem, hem bae givim hem moa responsibility. Insaed long olketa year bihaen, hem taem for duim witness work abaot Kingdom raonem whole world, and wanfela “great crowd” bilong olketa worshiper bilong Jehovah bae hipap and luk forward for laef thru long “great tribulation.” (Matt. 24:14; Rev. 7:9, 10) Olketa hia tu, bae needim spiritual kaikai, and they bae kasem diswan from datfela sekson wea “slave,” olketa servant bilong Kraest wea spirit anointim. For mekem Jehovah hapi, yumi need for acceptim instruction wea hem provide-im thru long disfela way and live followim every bit.

8, 9. (a) Long first century wanem arrangement nao they garem for answerim olketa question abaot teaching and for talem samting wea they need for followim for preachim gud nius? (b) Wanem kaen sem arrangement nao stap distaem?

⁸ But hem tru, samfela taem olketa question abaot teaching and hao for followim maet kamap. Wanem nao they bae duim? Mek-15 chapter bilong Acts story long wanfela question wea kamap abaot samting wea olketa Gentile wea kamap Kristian mas duim and hao they stretem datwan. They askim olketa aposol and older man long Jerusalem, wea serve olsem wanfela main governing body. Olketa older man hia they no pipol wea no savvy mekem mistek. (Lukim Galatians 2:11-14.) But God use-im them. They lukluk long samting wea olketa Scripture talem abaot datfela point and samting wea prove-im hao holy spirit bilong God hem openem way for olketa Gentile, and then they decide-im samting. God blessim datfela arrangement. (Acts 15:1-29; 16:4, 5) From datfela main sekson, they sendem aot samfela for duim moa work for preachim gud nius for fitim samting wea Lord seleva hem komandim.​—⁠Acts 8:14; Gal. 2:9.

⁹ Long taem bilong yumi, Governing Body hem samfela brata wea spirit anointim wea kam from samfela different kantri. They stap long world headquarter bilong olketa Jehovah’s Witness. Long loyal way they luk aftarem olketa samting bilong klinfela worship under long hedship bilong Jesus Kraest. Olketa brata hia garem sem tingting olsem aposol Paul, wea raet olsem taem hem sendem spiritual kaonsel long otherfela Kristian: “Mifela no master bilong faith bilong yufela, but mifela work tugeta withim yufela for mekem yufela hapi, from faith bilong yufela nao mekem yufela stand ap.”​—⁠2 Cor. 1:24.

10. (a) Hao nao they choosim olketa elder or ministerial servant? (b) Why nao yumi mas work tugeta withim olketa wea garem position olsem?

¹⁰ Olketa Jehovah’s Witness everywea long world they ting hae long disfela theocratic arrangement. Every kongregeson bilong them work long wan mind withim hem. They luk long Governing Body for appointim olketa elder and ministerial servant for luk aftarem olketa kongregeson long gudfela way. Hao nao they choosim man for kasem appointment olsem? Bible hem talem stret olketa mark wea they mas kasem. Olketa elder wea recommendim them and olketa wea garem power for appointim them garem bigfela responsibility front long God for followim olketa mark hia. (1 Tim. 3:1-10, 12, 13; 5:22; Titus 1:5-9) Olketa member bilong kongregeson no electim or vote-im anywan. But, for followim samting wea olketa aposol duim long first century taem they appointim samwan, olketa ovaseer wea garem responsibility for recommendim samwan, and bihaen olketa wea appointim hem, they pray for help bilong spirit bilong God and lukluk long Word bilong hem for leadim them. (Acts 6:2-4, 6; 14:23; lukim Psalm 75:6, 7.) Taem yumi followim samting wea olketa elder talem, yumi show aot yumi ting hae long loving samting wea Kraest provide-im long “olketa present olsem man” for helpem yumi everywan for kasem “wan mind long faith.”—Eph. 4:8, 11-16.

11. (a) Wanem nao olketa gudfela samting wea olketa woman duim insaed long theocratic arrangement? (b) Wanem taem nao they need for coverim hed bilong them, and why nao olsem?

¹¹ Olketa Scripture show aot hao position for luk aftarem kongregeson hem samting wea olketa man nao mas garem. Diswan hem no samting wea spoelem olketa woman, from planti long them bae rul long Kingdom bilong heven. Olketa Kristian woman wea garem klinfela fashion, and work hard for luk aftarem famili bilong them they share tu for givim gudfela nem long kongregeson. (Titus 2:3-5) Planti taem they duim bigfela work for faendem olketa niu wan wea interest and bringim them long organization. (Ps. 68:11) But way for teach insaed long kongregeson hem samting wea olketa man wea kasem appointment nao mas luk aftarem. (1 Tim. 2:12, 13) And sapos no any man wea fit hem stap long wanfela meeting wea kongregeson arrangim, then wanfela woman mas coverim hed bilong hem withim kaleko taem hem luk aftarem diswan or taem hem pray.a There nao, hem show aot respect for arrangement bilong Jehovah, olsem example bilong Jesus for everywan, long taem hem stap under long Father bilong hem.​—⁠1 Cor. 11:3-16; John 8:28, 29.

12. (a) Wanem kaen tingting nao Bible encouragim olketa elder for garem long position bilong them? (b) Wanem nambawan privilege nao yumi everywan savvy share insaed?

¹² Insaed long world pipol ting long man wea garem haefela position olsem important man, but insaed long organization bilong God, rul hem olsem: “Man wea hem small tumas midlwan long yufela nao hem man wea big.” (Luke 9:46-48; 22:24-26) So olketa Scripture givim kaonsel long olketa elder for lukaot for no kamap bigman ovarem olketa bilong God but, kamap olsem example long flock. (1 Pet. 5:2, 3) No just fewfela wea they choosim nomoa, but every Jehovah’s Witness, man and woman, garem nambawan privilege for stand for Sovereign bilong universe, tok abaotem nem bilong hem long humble way and talem pipol everywea abaotem Kingdom bilong hem.

13. Use-im olketa scripture for story abaot olketa question wea stap long end bilong disfela paragraf.

¹³ Hem gud for askim yumi seleva olsem: “Waswe, yumi barava ting hae long way wea Jehovah leadim organization bilong hem long earth? Waswe, tingting, toktok and samting yumi duim showim aot datwan?” Way for reason long olketa point long daon savvy helpem yumi wanwan for lukluk gud long diswan:

Sapos yumi really stap under long Kraest olsem hed bilong kongregeson, then, olsem olketa scripture hia they showim aot, wanem nao yumi bae go ahed for duim? (Matt. 24:14; 28:19, 20; Luke 21:34-36; John 13:34, 35)

Taem they trae hard for kamap olketa gudfela Kristian, long wanem way nao everywan wea insaed long organization mas depend long God and Kraest? (John 15:5; 1 Cor. 3:5-7)

Taem olketa elder trae for stretem tingting bilong pipol for fitim samting wea organization followim, diswan hem show aot kaenfela fashion bilong hu nao? (Eph. 4:7, 8, 11-13; 2 Cor. 13:11)

Taem yumi ting hae long olketa spiritual samting wea kam from datfela “slave” class and Governing Body bilong hem, hu nao yumi show aot respect long hem? But waswe sapos yumi tok daonem them? (Luke 10:16; lukim 3 John 9, 10.)

Why nao yumi mas no tok againstim olketa elder? (Acts 20:28; Rom. 12:10)

14. (a) Way wea yumi ting abaot theocratic organization showim aot wanem samting? (b) Long way olsem, wanem chance nao yumi garem for prove-im Devil hem wanfela liar and for mekem heart bilong Jehovah hapi?

¹⁴ Jehovah hem use-im organization bilong hem long earth wea stap under long Kraest olsem hed for deal withim yumi distaem. So hao yumi ting long disfela organization bae show aot hu nao yumi saed withim long disfela question abaot hu nao fit for rul. (Heb. 13:17) Satan hem say samting wea muvim yumi everywan nao hem from yumi wantim gudfela samting for yumi seleva. But sapos yumi hapi for serve long anyway, and long sem taem yumi stap klia for talem and duim samting wea mekem other pipol ting hae long yumi, then yumi bae prove-im Devil hem wanfela liar. Sapos yumi love-im and respectim olketa wea ‘lead’ midlwan long yumi, followim faith bilong them, but stap klia long way for kamap olketa wea ‘praisim pipol for kasem gudfela samting for seleva,’ yumi bae mekem heart bilong Jehovah hapi. (Heb. 13:7; Jude 16) Sapos yumi mekem grow way for respectim organization bilong Jehovah every bit and duim work wea hem talem withim whole heart, yumi prove-im hao Jehovah nao hem really God bilong yumi and yumi wan mind long worship bilong hem.​—⁠1 Cor. 15:58.

[Footnote]

Samting for Review

● Wanem nao organization bilong Jehovah long earth distaem? Wanem nao purpose bilong hem?

● Hu nao hed bilong kongregeson? Thru long wanem samting long earth nao hem leadim yumi long loving way?

● Wanem gudfela tingting abaot olketa responsibility and olketa insaed long organization nao yumi mas mekem grow?