Gud Samting From Wei for Stap Anda lo Hedship Arrangement blo God

IF IUMI laek for organize for duim will blo Jehovah, hem important for stap anda lo God wea hem Sovereign blo universe. Iumi luksavve hao Son blo hem nao hed blo Christian kongregeson and iumi followim hedship arrangement lo olketa nara samting lo laef tu. Evriwan kasem gud samting from wei for stap anda lo hedship arrangement blo God.

² Wei wea olketa man stap anda lo olketa wea garem paoa hem start lo garden blo Eden. Hem stap lo komand blo God lo Genesis 1:28 and 2:16, 17. Olketa animal stap anda lo paoa blo olketa man, and Adam and Eve mas stap anda lo paoa blo God and duim wat hem laekem. For followim disfala arrangement bae mekem olketa organize and garem peace. Aposol Paul hem storyim datfala hedship arrangement lo 1 Corinth 11:3. Hem sei: “Mi laekem iufala for savve Christ hem hed bilong evri man, man hem hed bilong woman, and God hem hed bilong Christ.” Diswan showim iumi evriwan stap anda lo hedship arrangement bat Jehovah nao nomoa.

³ Staka pipol distaem no luksavve or followim disfala hedship arrangement. Why nao olsem? Datfala problem start lo Eden taem Adam and Eve chus for no stap anda lo God. (Gen. 3:4, 5) Bat tufala no barava free. Tufala stap anda lo wanfala wicked spirit wea hem nao Satan datfala Devil. From tufala againstim God, datwan mekem iumi olketa man stap farawe from God. (Col. 1:21) From datwan, staka pipol distaem stap anda lo paoa blo Satan.​—1 John 5:19.

⁴ Taem iumi lanem and followim truth lo Bible, iumi no stap anda moa lo paoa blo Satan. Iumi olketa Witness wea dedicate and baptaes finis acceptim Jehovah olsem Ruler blo iumi. Iumi agree witim King David wea luksavve Jehovah nao “hed ovarem evri samting.” (1 Chron. 29:11) Yes, iumi fit for sei: “Iufala mas savve dat Jehovah nao hem God. Hem nao man wea wakem iumi, and iumi blo hem. Iumi olketa pipol blo hem, and pipol wea hem lukaftarem.” (Ps. 100:3) Iumi luksavve Jehovah hem hae tumas, and hem barava fit for iumi stap anda lo hem from hem nao wakem evri samting. (Rev. 4:11) Iumi wea worshipim God, followim Jesus Christ wea showim perfect example lo wei for stap anda lo God.

⁵ Wat nao Jesus lanem from olketa samting wea hem safa lo hem taem hem lo earth? Ansa hem lo Hebrew 5:8 wea sei: “Nomata hem wanfala Son, olketa samting wea hem safa long hem teachim hem for obey.” Yes, Jesus gohed loyal for stap anda lo Dadi blo hem lo heven nomata hem kasem barava hard taem. And tu, Jesus no duim eni samting followim tingting blo hemseleva. Hem no talem samting followim tingting blo hemseleva, and no mekhae lo hemseleva tu. (John 5:19, 30; 6:38; 7:16-18) Taem hem duim ministry blo hem, hem hapi for duim wat Dadi blo hem laekem, nomata datwan mekem pipol for againstim and persecutim hem. (John 15:20) Jesus showim hem stap anda lo God and hem “hambol” nomata gogo hem “dae long wanfala post.” Staka gud samting kamaot from wei wea hem stap anda lo Jehovah, evriwan fit for kasem laef olowe, hemseleva garem hae position, and givim glory lo Dadi blo hem.​—Phil. 2:5-11; Heb. 5:9.

OLKETA WEA IUMI SHUD STAP ANDA

⁶ Taem iumi stap anda lo God lo wei for duim will blo hem, iumi bae no warim tumas staka samting and feel nogud olsem olketa wea no laek for stap anda lo rul blo Jehovah. Enemy blo iumi, Devil, evritaem trae hard for spoelem iumi. Bae iumi sef from Satan if iumi againstim hem and hambol for stap anda lo Jehovah.​—Matt. 6:10, 13; 1 Pet. 5:6-9.

⁷ Lo Christian kongregeson, iumi luksavve Christ nao hem hed and hem appointim “datfala wakaman wea faithful and wise.” Diswan affectim wei blo iumi and hao iumi treatim olketa narawan. For stap anda lo God lo kongregeson bae helpem iumi for followim toktok blo God lo evri part lo worship blo iumi. Diswan includim ministry blo iumi, wei for attendim and tek part lo olketa meeting, hao iumi fren witim olketa elder, and for waka tugeta for followim arrangement blo organization.​—Matt. 24:45-47; 28:19, 20; Heb. 10:24, 25; 13:7, 17.

⁸ Taem iumi stap anda lo God, datwan mekem Christian kongregeson for garem peace, stap gud, and organize. Olketa wea stap anda lo Jehovah, showim olketa wei blo hem. (1 Cor. 14:33, 40) Experience blo iumiseleva abaotem organization blo Jehovah mekem iumi for talem sem toktok wea King David talem. Taem hem lukim pipol blo Jehovah difren from olketa nogud pipol, David hapi for sei: “Pipol wea God blo olketa Jehovah olketa nao hapi!”​—Ps. 144:15.

⁹ Lo marit arrangement and famili, “man hem hed bilong woman.” Lo semtaem, man bae stap anda lo Christ, and hed blo Christ hem God. (1 Cor. 11:3) Olketa waef mas stap anda lo hasband blo olketa, and olketa pikinini mas stap anda lo parents. (Eph. 5:22-24; 6:1) Famili bae garem peace taem each wan lo famili followim hedship arrangement.

¹⁰ Hasband mas followim example blo Christ for showim love taem hem duim responsibility blo hem olsem hed. (Eph. 5:25-29) Taem hem no iusim rong paoa wea hem garem olsem hed, waef and olketa pikinini blo hem bae hapi for stap anda lo hem. Waka blo waef hem for helpem and sapotim hasband. (Gen. 2:18) Taem waef patient for sapotim and respectim hasband blo hem, datwan mekem hasband blo hem for hapi and datwan givim praise lo God. (1 Pet. 3:1-4) Taem olketa hasband and waef followim kaonsel lo Bible abaotem hedship, olketa showim gud example for pikinini blo olketa lo wei for stap anda lo God.

¹¹ Wei wea iumi stap anda lo God hem affectim tu hao iumi ting lo “olketa wea rul,” wea God nao givim paoa lo olketa. (Rome 13:1-7) Olsem pipol wea obeyim law, olketa Christian peim tax, olketa “givim go bak long King samting wea hem bilong King, and givim go bak long God samting wea hem bilong God.” (Matt. 22:21) And tu, olketa arrangement for kavarem territory mas followim olketa law wea protectim information blo pipol. From iumi stap anda lo gavman and obeyim olketa law blo hem wea no againstim law blo Jehovah, iumi bae fit for gohed iusim strong blo iumi for duim disfala preaching waka.​—Mark 13:10; Acts 5:29.

¹² For stap anda lo hedship arrangement blo God, hem affectim evri part lo laef blo iumi. From iumi garem faith, iumi lukim taem wea evriwan bae stap anda lo Jehovah God. (1 Cor. 15:27, 28) Olketa wea luksavve lo raet blo Jehovah for rul bae kasem blessing and gohed stap anda lo Jehovah for olowe!