God Wakem First Man and Woman

Jehovah wakem wanfala garden wea nem blo hem Eden. Garden hia garem staka flaoa, olketa tree, and olketa animal. Then God wakem first man, Adam, from dust and blow insaed nose blo hem. Iu savve wat nao happen? Datfala man hem laef nao! Jehovah talem Adam for lukaftarem datfala garden, and God talem hem for nemim evri animal.

Jehovah talem wanfala important rul lo Adam. Hem sei: ‘Iu savve kaikaim frut blo evri tree lo garden, bat wanfala tree nao iu no kaikaim frut blo hem. If iu kaikaim frut blo datfala tree, bae iu dae.’

Then Jehovah sei: ‘Mi bae wakem wanfala helper for Adam.’ Hem mekem Adam for deepim sleep and God iusim wanfala rib blo Adam for wakem wanfala waef for Adam. Nem blo hem Eve. Adam and Eve nao first famili lo earth. Hao nao feeling blo Adam abaotem waef blo hem? Adam hapi tumas and sei: ‘Lukim, wat Jehovah wakem from rib blo mi! Diswan hem samwan wea olsem mi.’

Jehovah talem Adam and Eve for garem pikinini and fulimap disfala earth. Hem laekem tufala for waka tugeta for mekem full earth for kamap paradaes, or park wea luk naes, olsem garden blo Eden. Bat datwan no happen. Why nao olsem? Bae iumi lane moa abaotem datwan lo next leson.